Text copied!
CopyCompare
Buka Helaga - NUMERA - NUMERA 20

NUMERA 20:4-25

Help us?
Click on verse(s) to share them!
4Dahaka dainai Lohiabada ena orea taudia be inai taunimanima idia noho lasi tano dekenai oi hakaua vadaeni? Ai be aiemai ubua gaudia danu do ai mase hebou totona, a?
5Dahaka dainai Aigupito dekena amo ai oi hakaua mai inai gabu dikana dekenai? Inai gabu dekenai be aniani ta ia vara lasi, uiti lasi, fig lasi, vain ena huahua lasi, bona apolo lasi.”
6Mose bona Arona be hebou taudia dekena amo idia raka lao, Palai Dubu ena iduara vairanai idia tui diho, bona edia vairana be tano dekenai idia atoa diho. Unai neganai Lohiabada ena diaridiari be Mose bona Arona ese idia itaia.
7Lohiabada ese Mose ia hamaoroa, ia gwau,
8“Taravatu Maua ena vairanai ia noho itotohi do oi abia, bona oi bona Arona ese taunimanima do umui haboua. Vadaeni unai taunimanima edia vairanai, unai nadi badana do oi hereva henia, bona ranu be ia dekena amo do ia heau mai. Unai dekena amo oi ese ranu unai nadi badana dekena amo do oi abia, bona unai ranu be hebou taudia dekenai do oi henia, bona edia ubua gaudia dekenai do oi henia, do idia inua.”
9Vadaeni Mose ese itotohi ia abia, Lohiabada ia oda henia hegeregerena.
10Vadaeni Mose bona Arona ese Israela ena orea ibounai idia haboua, unai nadi badana ena vairana dekenai. Mose ese ia gwau henidia, ia gwau, “Kamonai lasi taudia e, umui kamonai, inai nadi dekena amo emui ranu do ai haheaua mai, a?”
11Vadaeni Mose ese itotohi ia abia daekau, nadi ia botaia nega rua. Ranu be ia heau mai, bada herea. Vadaeni Israela taudia mai edia ubua gaudia danu ese ranu idia inua.
12To Lohiabada ese Mose bona Arona ia gwau henidia, ia gwau, “Umui ese lau dekenai umui abidadama henia lasi, bona lauegu siahu helagana Israela taudia edia vairanai umui gwauraia hedinarai lasi. Unai dainai umui ruaosi ese inai orea do umui hakaudia vareai lasi, lau ese lau henidia vadaeni tano dekenai.”
13Inai ranu ena ladana be Meriba, badina be unuseni Israela taudia ese Lohiabada dekenai idia maumau. Bona unuseni Lohiabada ese iena siahu helagana idia dekenai ia hedinarai henia.
14Mose ese Kadesi dekena amo iena hesiai taudia be Edoma ena king dekenai ia siaia. Idia gwau, “Inai hereva be oiemu tadina Israela dekena amo. Oi diba vadaeni ai dekenai idia vara hisihisi gaudia ibounai.
15Aiemai sene taudia Aigupito dekenai idia lao, unuseni nega daudau ai noho. Aigupito taudia ese ai dekenai bona aiemai sene taudia dekenai idia dagedage.
16Lohiabada dekenai ai taitai, vadaeni ia ese aiemai taitai ia kamonai, aneru ta ia siaia, bona Aigupito dekena amo ai ia hakaua mai. “Hari ai be Kadesi hanua, oiemu tano ena hetoa gabuna dekenai ai noho.
17Mani emu kara, oi dekenai ai noinoi, aiemai dala do oi kehoa, oiemu tano do ai raka hanaia. Uma ta dekenai do ai raka lasi, vain idia vara gabuna dekenai do ai raka lasi, bona umui emui ranu guri ta dekena amo do ai inua lasi. To king ena dala sibona dekenai do ai raka, unai dala do ai rakatania lasi, lauri kahana o idiba kahana dekenai do ai lao lasi.”
18To Edoma ena king ia haere, ia gwau, “Aiemai tano do umui raka hanaia lasi! Bema umui karaia toho, ai ese umui do ai tuari henia.”
19Israela taudia ese ma idia noinoi, idia gwau, “Laolao dala badana sibona dekenai do ai raka. Bona bema ai o aiemai ubua gaudia ese emui ranu ai inua neganai, ai be davana do ai henia. Ai ura aena dekenai do ai raka hanaia sibona.”
20To Edoma taudia ma idia haere henia, idia gwau, “Umui raka hanaia lasi.” Vadaeni Edoma tuari taudia momo mai goadadia ese Israela taudia edia vairana dekenai idia mai, tuari henia totona.
21Vadaeni Edoma taudia ese edia tano dekenai Israela taudia edia hanaia dala idia koua dainai, Israela taudia idia giroa, bona dala idauna ta dekenai idia lao.
22Israela taudia ibounai ese Kadesi idia rakatania, bona Horo Ororo dekenai idia ginidae.
23Inai Horo Ororo be Edoma ena tano hetoa gabuna kahirakahira. Unuseni Lohiabada ese Mose bona Arona ia hamaoroa, ia gwau,
24“Arona be Israela taudia dekenai lau henidia vadaeni tanona do ia raka vareai lasi. Ia be kahirakahira do ia mase, badina be umui ese Meriba ranu gabuna dekenai lauegu hereva umui utua.
25Arona mai ena natuna Eleasara danu do oi abia, Horo Ororo dekenai do umui daekau lao.

Read NUMERA 20NUMERA 20
Compare NUMERA 20:4-25NUMERA 20:4-25