16 Lohiabada dekenai ai taitai, vadaeni ia ese aiemai taitai ia kamonai, aneru ta ia siaia, bona Aigupito dekena amo ai ia hakaua mai. “Hari ai be Kadesi hanua, oiemu tano ena hetoa gabuna dekenai ai noho.
17 Mani emu kara, oi dekenai ai noinoi, aiemai dala do oi kehoa, oiemu tano do ai raka hanaia. Uma ta dekenai do ai raka lasi, vain idia vara gabuna dekenai do ai raka lasi, bona umui emui ranu guri ta dekena amo do ai inua lasi. To king ena dala sibona dekenai do ai raka, unai dala do ai rakatania lasi, lauri kahana o idiba kahana dekenai do ai lao lasi.”
18 To Edoma ena king ia haere, ia gwau, “Aiemai tano do umui raka hanaia lasi! Bema umui karaia toho, ai ese umui do ai tuari henia.”
19 Israela taudia ese ma idia noinoi, idia gwau, “Laolao dala badana sibona dekenai do ai raka. Bona bema ai o aiemai ubua gaudia ese emui ranu ai inua neganai, ai be davana do ai henia. Ai ura aena dekenai do ai raka hanaia sibona.”
20 To Edoma taudia ma idia haere henia, idia gwau, “Umui raka hanaia lasi.” Vadaeni Edoma tuari taudia momo mai goadadia ese Israela taudia edia vairana dekenai idia mai, tuari henia totona.
21 Vadaeni Edoma taudia ese edia tano dekenai Israela taudia edia hanaia dala idia koua dainai, Israela taudia idia giroa, bona dala idauna ta dekenai idia lao.
22 Israela taudia ibounai ese Kadesi idia rakatania, bona Horo Ororo dekenai idia ginidae.
23 Inai Horo Ororo be Edoma ena tano hetoa gabuna kahirakahira. Unuseni Lohiabada ese Mose bona Arona ia hamaoroa, ia gwau,
24 “Arona be Israela taudia dekenai lau henidia vadaeni tanona do ia raka vareai lasi. Ia be kahirakahira do ia mase, badina be umui ese Meriba ranu gabuna dekenai lauegu hereva umui utua.
25 Arona mai ena natuna Eleasara danu do oi abia, Horo Ororo dekenai do umui daekau lao.
26 Unuseni Arona ena dabua helagadia do oi kokia, iena natuna Eleasara dekenai unai dabua do oi atoa. Arona be unai gabu dekenai do ia mase, iena sene taudia dekenai do ia haboua.”
27 Mose ese Lohiabada ena oda hereva hegeregerena ia karaia. Israela taudia ibounai edia vairana dekenai idia toiosi be Horo Ororo dekenai idia daekau lao.
28 Vadaeni Mose ese Arona ena dabua helagadia ia kokia, Eleasara dekenai ia atoa. Vadaeni Arona be ororo ena ataiai dekenai ia mase, to Mose bona Eleasara be ororo dekena amo idia diho mai.
29 Israela taudia ibounai ese idia diba Arona ia mase, vadaeni idia ibounai be dina 30 lalonai ia dainai idia taitai.
