Text copied!
Bibles in Hiri Motu

NUMERA 18:5-19 in Hiri Motu

Help us?

NUMERA 18:5-19 in Buka Helaga

5 Oi bona oiemu natuna tau sibona ese Helaga Gabuna bona boubou patana edia gaukara do umui karaia, egu badu ese Israela taudia do ia hadikaia lou garina.
6 “Lau Lohiabada ese oiemu varavara, Levi taudia Israela orea edia huana dekena amo lau abia hidi, bona oi dekenai lau henidia. Idia be lau Lohiabada, egu, bona unai dainai Palai Dubu lalonai gaukara idia karaia diba.
7 “To oi bona oiemu natuna tau ese hahelagaia taudia edia gaukara, boubou patana dekenai, bona Helaga Herea Gabuna dekenai do umui karaia. Inai be emui gaukara korikori, badina be lau ese hahelagaia taudia edia dagi be umui dekenai lau henia vadaeni. To bema idau tauna ese helaga gaudia kahirakahira ia mai neganai, ia be do ia mase.”
8 Lohiabada ese Arona ma ia hereva henia, ia gwau, “Taunimanima ese lau dekenai idia henia bouboudia, gabua ore lasi gaudia, be lau ese oi dekenai lau henia. Lau ese oi, bona oiemu natuna, tubuna taudia dekenai inai boubou helagadia lau henidia inai, idia be emui, ela bona nega ibounai.
9 “Boubou helagadia edia kahana, lahi dekenai idia gabua lasi gaudia, do umui abia be inai: Paraoa bouboudia, kara dika bouboudia, kerere totona bouboudia. Lau dekenai idia henia boubou helagadia ibounai be oi bona oiemu natuna tau emui.
10 Umui ese gabu helagana ta dekenai inai aniani do umui ania. Tau bona memero sibona ese idia ania diba, inai aniani be helaga.
11 “Ma inai danu do umui ania diba: Israela taudia ese idia henia harihari gaudia idauidau, hahelagaia taudia ese lauegu vairanai idia davea gaudia. Lau ese umui dekenai lau henidia, oiemu natuna tau, oiemu natuna hahine danu ela bona nega ibounai. Emui bese taudia ibounai, bema egu taravatu dekenai idia goeva neganai, inai aniani bouboudia idia ania diba.
12 “Lau ese inai aniani umui dekenai lau henia: Olive dehoro namo herea, bona uaina matamata namo herea, bona uiti namo herea do idia mailaia, Israela taudia edia uma anina vara guna, bona edia vain huahua vara guna, Lohiabada dekenai idia mailaia gaudia.
13 Idia be umui emui, bona miro lasi taudia ibounai emui ruma dekenai inai aniani gaudia idia ania diba.
14 “Israela dekenai idia noho gaudia ibounai, lau Lohiabada dekenai idia henia, idia helaga, gaudia ibounai be umui ese do umui ania diba.
15 “Mauri gaudia edia natuna vara guna ibounai, taunimanima edia natudia vara guna, bona ubua gaudia edia natuna vara guna, be lau Lohiabada dekenai do idia henia. Idia ibounai be umui emui. To taunimanima edia vara guna natudia, bona gau mirodia edia vara guna natudia totona, edia davana do idia karaia umui dekenai.
16 “Natuna matamata, hua tamona sibona maragidia, be umui dekena amo do idia hoia lou, edia davana be siliva moni 5, Helaga Gabuna ena sikele hegeregerena.
17 “To boromakau, mamoe bona nanigosi edia vara guna natudia be do umui hoia lou lasi. Idia be lauegu momokani, bona boubou totona do umui aladia mase. Edia rarana be boubou patana ena latanai do umui negea, bona edia digara be do umui gabua ore, bonana namo herea gauna lau dekenai totona.
18 “Unai bouboudia edia vamuna be umui emui. Ma boubou ta, egu vairanai umui davea gauna, iena aena idibana, bona iena kemena, idia danu be umui emui.
19 “Harihari gaudia helagadia, Israela taudia ese lau Lohiabada dekenai idia henia, idia davea boubou totona gaudia, be oi bona oiemu bese taudia, oiemu natuna tau bona natuna hahine taudia edia, ela bona nega ibounai. Inai be lauegu gwauhamata taravatuna, makohia diba lasi gauna, Lohiabada bona oi, bona oiemu natuna, oiemu tubuna danu ela bona hanaihanai.”
NUMERA 18 in Buka Helaga