NUMERA 16:9-33

⁹Israel Diravana ese umui vada e abimui hidi Israel oreana taudia bogaragidia amo, ba raka henia kahi, Iehova ena dubu ai ba ḡaukara, bona hebou taudia vairadiai ba gini, iena hesiai taudia. Una na ḡau pipikina a?

¹⁰Ia ese vada e boirimui, umui bona varavaramui Levi taudia iboudiai, ia ba raka henia kahi. Be, hahelaḡa dagina danu o tahuamu a? a

¹¹Matona, oi bona emu orea taudia iboudiai vada o hebou, Iehova vada o heai henia. Aaron be daika, umui ese ia o maumauraiamu a?

¹²Bena Mose ese Datan Eliab bona Abiram Eliab e boiridia. A idia eto, Ai na basia vasi.

¹³Rata bona bada-ranuna e arumu tanona amo vadao hakaumai lasi, tano ḡaḡaena ai baia mase dahaka, harihari emai pavapava ai baola o tomu. Una na ḡau pipikina a?

¹⁴Ina danu, rata bona badaranuna tanona ta ai asio hakaumai vareai, uma bona vine imeadia asio henimai, ai ahumai. Ini taunimanima na matadia ba hakepuludia a a Ai na basia vasi.

¹⁵Mose na e badu dikadika, Iehova e noia, eto, Edia boubou basio abi dae. Lau be edia doniki ta asina dadia, bona idia ta asina hadikaia.

¹⁶Bena Mose ese Kora e hamaoroa, eto, Kerukeru emu orea taudia ida baoma, Iehova vairanai ba gini, oi bona emu orea taudia bona Aaron.

¹⁷Emui gida keberedia helaḡadia danu bavabi kau, muramura mai bonadia ba uda; ta ta ena kebere ena kebere bae mailaidia Iehova vairanai, kebere helaḡadia sinahu-rua imahui. Oi danu emu ba mailaia. Aaron danu ena baine mailaia.

¹⁸Taunabunai, idia na ta ta ena kebere ena kebere e abi, gida e uda, bona muramura mai bonadia gida latadiai; bena hebou kalagana iduarana ai e gini, Mose bona Aaron ida.

¹⁹Bena Kora ese orea idoinai e haboudia idia vairadiai, hebou kalagana iduarana ai. Bena Iehova diaridiarina e hedinarai, hebou taudia iboudiai ese e itaia.

²⁰Bena Iehova ese Mose bona Aaron e hamaorodia, eto,

²¹Ena hebou amo ba raka siri, bena baina habuadia tari.

²²Bena idia na tano ai e goru goru :diho, eto, Dirava e, taunimanima iboudiai laumadia Diravana, tau tamona baine kara dika dainai ina hebou idoinai ba badu henidia a?

²³Bena Iehova ese Mose ma e hamaoroa, eto,

²⁴Hebou taudia ba hamaorodia, Kora bona Datan bona Abiram edia kalaga amo bae raka oho.

²⁵Bona Mose e tore isi, Datan bona Abiram dekedia ela; Israel tau-badadia ese e ḡavaia.

²⁶Bena ia ese hebou taudia e hamaorodia, eto, Ene kara havara taudia edia kalaga amo ba raka oho, bona edia ḡau ta basio daua toho, idia edia dika ai ba dika na garina.

²⁷Taunabunai, idia na Kora bona Datan bona Abiram edia kalaga amo e raka siri. Bena Datan bona Abiram e raka lasi, idia bona adavadia bona natudia badadia bona natudia maraḡidia, edia kalaga iduaradia ai e gini.

²⁸Bena Mose eto, Ini amo ba diba, Iehova ese vada e siaigu, ini ḡaukara iboudiai ikaradia totona; dia lau sibogu asina kara.

²⁹Ini tatau be taunimanima iboudiai vaevae edia mase dalana ai bema mase, bona taunimanima iboudiai vaevae edia dika dalana ai bema dika, ba diba Iehova ese se siaigu.

³⁰A Iehova ese kara matamatana ta bema havaraia, tano uduna bema hahaḡaia idia bona edia ḡau iboudiai bema hadonodia, mauridia ai mase taudia edia gabu ai bema diho, vada ba diba idia ese Iehova vada e dadaraia.

³¹Ena hereva e doko ai, idia henudia tanona e parara;

³²tanobada ese uduna e hahaḡaia bona e hadonodia, mai edia ruma taudia ida, bona Kora ena orea taudia iboudiai mai edia kohu ida.

³³Taunabunai, idia mai edia orea idoinai na mauridia ai mase taudia edia gabu ai e diho. Tano ese e habubunidia, hebou taudia bogaragidiai e mase ore.