NUMERA 16:26-44

²⁶Bena ia ese hebou taudia e hamaorodia, eto, Ene kara havara taudia edia kalaga amo ba raka oho, bona edia ḡau ta basio daua toho, idia edia dika ai ba dika na garina.

²⁷Taunabunai, idia na Kora bona Datan bona Abiram edia kalaga amo e raka siri. Bena Datan bona Abiram e raka lasi, idia bona adavadia bona natudia badadia bona natudia maraḡidia, edia kalaga iduaradia ai e gini.

²⁸Bena Mose eto, Ini amo ba diba, Iehova ese vada e siaigu, ini ḡaukara iboudiai ikaradia totona; dia lau sibogu asina kara.

²⁹Ini tatau be taunimanima iboudiai vaevae edia mase dalana ai bema mase, bona taunimanima iboudiai vaevae edia dika dalana ai bema dika, ba diba Iehova ese se siaigu.

³⁰A Iehova ese kara matamatana ta bema havaraia, tano uduna bema hahaḡaia idia bona edia ḡau iboudiai bema hadonodia, mauridia ai mase taudia edia gabu ai bema diho, vada ba diba idia ese Iehova vada e dadaraia.

³¹Ena hereva e doko ai, idia henudia tanona e parara;

³²tanobada ese uduna e hahaḡaia bona e hadonodia, mai edia ruma taudia ida, bona Kora ena orea taudia iboudiai mai edia kohu ida.

³³Taunabunai, idia mai edia orea idoinai na mauridia ai mase taudia edia gabu ai e diho. Tano ese e habubunidia, hebou taudia bogaragidiai e mase ore.

³⁴Bena Israel taudia, e ginidia heḡeḡe taudia, ese edia tai lolololo e kamonai ai, e heau karoho; eto, Tano ese baine hadonoda na garina.

³⁵Bena lahi na Iehova ena amo e diho, hari tatau sinahu-rua imahuiosi, muramura maibonadia e gabu taudia, e aradia ore.

³⁶Bena Iehova ese Mose ma e hereva henia, eto,

³⁷Hahelaḡa tauna Aaron natuna Eleasara ba hamaoroa, Iahi bogaragina amo kebere helaḡadia baine abidia lasi, gidadia baine bubu nege; badina be idia na hehelaḡa.

³⁸Ene kara havara daidiai vada e mase taudia edia gida keberedia na hehelaḡa: ba hododia severa-severa, ihaboulaina patana iḡovana ḡaudia aibaela, badina be Iehova vairanai e hahelaḡadia, taunabunai idia na hehelaḡa. Unu amo idia na toa ai baela, Israel taudia edia.

³⁹Taunabunai, hahelaḡa tauna Eleasara hari auri labora-labora keberedia, lahi ese e aradia taudia edia kebere, e abidia, e hododia severa-severa, ihaboulaina patana iḡovana,

⁴⁰bona helalo-tao toana, Israel taudia ese bae laloa tao, idau tauna ta, dia Aaron garana, na Iehova basine raka henia kahi, muramura mai bonana igabuna totona; Kora mai bamona ida heḡereḡeredia ai baela na garina. Iehova ese Eleasara unu e hamaoroa toma, Mose uduna amo.

⁴¹Kerukeru, Israel oreana taudia ibouboudiai ese Mose bona Aaron e maumauraidia, eto, Umui ese Iehova ena orea taudia vada o aladia mase.

⁴²Ibouboudiai na Mose bona Aaron ialadia totona e hebou; bena e roha lao, hebou kalagana e itaia, ori ese vada e ḡovaia ahu, bona Iehova diaridiarina vada e hedinarai.

⁴³Bena Mose bona Aaron na hebou kalagana iduarana amo e raka lasi.

⁴⁴Bena Iehova ese Mose e hamaoroa, eto,