18Taunabunai, idia na ta ta ena kebere ena kebere e abi, gida e uda, bona muramura mai bonadia gida latadiai; bena hebou kalagana iduarana ai e gini, Mose bona Aaron ida.
19Bena Kora ese orea idoinai e haboudia idia vairadiai, hebou kalagana iduarana ai. Bena Iehova diaridiarina e hedinarai, hebou taudia iboudiai ese e itaia.
20Bena Iehova ese Mose bona Aaron e hamaorodia, eto,
21Ena hebou amo ba raka siri, bena baina habuadia tari.
22Bena idia na tano ai e goru goru :diho, eto, Dirava e, taunimanima iboudiai laumadia Diravana, tau tamona baine kara dika dainai ina hebou idoinai ba badu henidia a?
23Bena Iehova ese Mose ma e hamaoroa, eto,
24Hebou taudia ba hamaorodia, Kora bona Datan bona Abiram edia kalaga amo bae raka oho.
25Bona Mose e tore isi, Datan bona Abiram dekedia ela; Israel tau-badadia ese e ḡavaia.