NUMERA 10:9-33

⁹Bema umui dekenai idia tuari henia taudia ese emui tano dekenai umui idia hadikaia, bona umui idia tuari henia neganai, kibi do umui hiriria kwadogi, to mai regena bada. Unai neganai lau, Lohiabada, emui Dirava, ese umui do lau laloa, bona umui do lau hamauria, umui idia hadikaia taudia dekena amo.

¹⁰“Emui moale dinadia neganai danu, emui hua matamatana guriguri aria, bona emui guriguri aria haida dekenai danu, umui ese kibi do umui hiriria. Emui gabua ore bouboudia bona maino karaia bouboudia umui henia neganai danu kibi do umui hiriria. Unai neganai lau ese umui do lau laloa bona durua. Lau be Lohiabada, emui Dirava.”

¹¹Lagani iharuana, hua iharuana ena dina namba 20 dekenai, ori ese Palai Dubu, Lohiabada ia noho ena toana, ia rakatania, ia daekau lao.

¹²Israela taudia ese Sinai ena taunimanima noho lasi tano idia rakatania hamatamaia. Ori be ia lao, ela bona Parana ena taunimanima noho lasi tano dekenai ia ginidae.

¹³Israela taudia ese edia kamepa gabuna idia rakatania nega ginigunana be unai, bona Lohiabada ese Mose ia hamaoroa dalana dekena amo idia raka lao.

¹⁴Iuda iduhu taudia be idia raka guna edia pepe henunai, mai edia iduhu tuari orea toi: Iuda iduhu tuari orea, edia gunalaia tauna be Nasona Aminadaba.

¹⁵Isakara iduhu tuari orea, edia gunalaia tauna be Netanele Suara.

¹⁶Sebuluno iduhu tuari orea, edia gunalaia tauna be Eliaba Helona.

¹⁷Vadaeni Palai Dubu idia kokia, bona Geresone bona Merari iduhu taudia ese idia huaia lao.

¹⁸Idia edia murinai, Rubena iduhu taudia, edia pepe henunai idia raka lao, mai edia tuari orea toi: Rubena iduhu tuari orea, edia gunalaia tauna be Elisuru Sedeuru.

¹⁹Simeona iduhu tuari orea, edia gunalaia tauna be Selumiele Surisadai.

²⁰Gado iduhu tuari orea, edia gunalaia tauna be Eliasapa Reuele.

²¹Vadaeni Kohata taudia ese kohu helagadia idia huaia. Kamepa matamata do idia ginidae lasi neganai, Palai Dubu be Levi taudia haida ese gabu matamata dekenai idia haginia lou guna vadaeni.

²²Idia edia murinai, Eparaima iduhu taudia, edia pepe henunai, idia raka lao, mai edia tuari orea toi: Eparaima iduhu tuari orea, edia gunalaia tauna be Elisama Amihuda.

²³Manase iduhu tuari orea, edia gunalaia tauna be Gamaliela Pedasuru.

²⁴Beniamina iduhu tuari orea, edia gunalaia tauna be Abidana Gideoni.

²⁵Vadaeni murina dekenai idia mai iduhu idia raka lao, Dano iduhu taudia ese idia gunalaia, mai edia tuari orea toi: Dano iduhu tuari orea, ena gunalaia tauna be Ahiesere Amisadai.

²⁶Asere iduhu tuari orea, edia gunalaia tauna be Pagiele Okarana.

²⁷Bona Napatali iduhu tuari orea, edia gunalaia tauna be Ahira Enana.

²⁸Israela taudia idia toreisi negadia ibounai edia laolao dalana be unai bamona, orea ta ta dekena amo idia raka lao.

²⁹Mose ese iena nakimi Hobaba Reuele, Midiana tauna dekenai ia hereva, ia gwau, “Ai ese laolao ai hamatamaia inai, Lohiabada ese ai dekenai ia gwauhamata vadaeni ai dekenai do ia henia tano dekenai do ai lao. Unai dainai oi danu do oi mai, bona namo do oi davaria, badina be Lohiabada ese ia gwauhamata vadaeni, gau namodia momokani dekena amo Israela do ia hanamoa bada.”

³⁰Hobaba ia haere, ia gwau, “Lasi, lau be umui danu do lau lao lasi, egu tano korikori dekenai do lau giroa lou, egu varavara dekenai do lau lao.”

³¹Mose ma ia gwau, “Mani emu kara ai do oi rakatania lasi, badina oi be taunimanima noho lasi tano ena kamepa gabudia namodia oi diba, bona oi ese ai oi hakaua diba.

³²Bema ai danu oi mai neganai, Lohiabada ese ai dekenai do ia henia gau namodia, be oi danu do ita haria.”

³³Unai neganai Sinai, Lohiabada ena ororo idia rakatania, bona dina toi idia raka lao. Lohiabada ena Taravatu Maua danu be dina toi lalonai idia edia vairana dekenai idia huaia lao, edia laga-ani gabuna ia tahua.