NUMERA 10:1-34

¹Iehova ese Mose e haḡania, eto,

²Kibi rua ba kara, silver amo ba korodia. Reḡedia na taunimanima ihaboudia bona taruha ikokina toadia ai baela.

³Kibi ruaosi bae hiriri negadia ai, taunimanima iboudiai na dekemu ai bae hebou, hebou kalagana iduarana ai.

⁴A tamona bae hiriria negadia ai, bese lohiadia, Israel iduhudia ikwaradia, na dekemu ai bae hebou.

⁵Kibi bae hiriri lalo-dika negana ai, mairiveina kahana taruhana bae kokia, bae huaia lao.

⁶Nega iharuana ma bae hiriri lalo-dika negana ai, diho kahana taruhana bae kokia, bae huaia lao. Hari kibi reḡedia be edia tore-isitoana.

⁷A taunimanima ihaboudia ba ura negadia ai, kibi na bae hiriri, to basie hiriri lalo-dika.

⁸Hahelaḡa taudia, Aaron garana, ese kibi bae hiriri: emui kibi taravatuna bunai, ela bona uru iboudiai.

⁹Inaimui ese bema hadikamui emui tano ai, bena boma tuari henidia, una negana ai kibi boma hiriri lalo-dika; bena Iehova emui Dirava ese baine lalomui, bona inaimui imadia amo baine hamaurimui.

¹⁰Emui moale dinadia ai danu, bona emui aria dinadia ai, eiava hua matamata negadia ai, emui ḡole-oho bouboudia bona emui herohemaino bouboudia ba hahelaḡadiamai kibi ihiriridia ida; unu amo emui Dirava ese baine lalomui tao. Lau binai Iehova, emui Dirava.

¹¹Laḡani iharuana ai, hua iharuana dinana iharuahuina ai, ori ese taravatu mauana dubuna e daetania.

¹²Israel taudia ese Sinai tano ḡaḡaena e rakatania, eha laolao, ela bona ori na Paran tano ḡaḡaena ai e diho.

¹³Edia laolao gini-gunana binai, Iehova ese Mose e haḡanilaia dalana amo e laolaova.

¹⁴Guna Iuda taruhana taudia edia orea ta ta amo edia pepe murina amo e raka; edia orea e gunalaidia tauna na Nason Aminadab.

¹⁵Isakara taudia edia orea igunalaidia tauna na Netanele Suara.

¹⁶Sebulun taudia edia orea igunalaidia tauna na Eliab Helon.

¹⁷Bena dubu e kokia, Gereson natuna bona Merari natuna ese e huaia lao.

¹⁸Idia muridiai Ruben taruhana taudia edia orea ta ta amo edia pepe murina amo e raka; edia orea e gunalaidia tauna na Elisuru Sedeuru.

¹⁹Simeon taudia edia orea igunalaidia tauna na Selumiele Surisadai.

²⁰Gad taudia edia orea igunalaidia tauna na Eliasaf Reuele.

²¹Bena Kohat taudia ese kohu helaḡadia e hua; idia do asie kau ai dubu be vada e haginia guna.

²²Idia muridiai Efraim taruhana taudia edia orea ta ta amo edia pepe murina amo e raka; edia orea e gunalaidia tauna na Elisama Amihud.

²³Manase taudia edia orea igunalaidia tauna na Gamaliel Pedasuru.

²⁴Beniamina taudia edia orea igunalaidia tauna na Abidan Gideoni.

²⁵Bena gabe oreadia e tore isi. Dan taruhana taudia edia orea ta ta amo edia pepe murina amo e raka; edia orea e gunalaidia tauna na Ahiesere Amisadai.

²⁶Asere taruhana taudia edia orea igunalaidia tauna na Pagiele Okran.

²⁷Napatali taruhana taudia edia orea igunalaidia tauna na Ahira Enan.

²⁸Israel taudia e tore isi negana ai edia laolao dalana be unuheto, orea ta ta amo e raka.

²⁹Mose ese ihana Hobab Reuele, tau Midian, e hereva henia, eto, Ai na baia laolaomu, Iehova ese vada e hamaoromai baine henimai e tomu tanona baia lao henia. Taunabunai ba bamomai, bena namo ba davaria; badina be Iehova ese ḡau namodia vada e abi heḡeḡae, Israel taumai emai.

³⁰A ia e haere, eto, Lau na basina bamomui, egu tano korikori baina lou henia, varavaragu dekedia bainala.

³¹Mose ma eto, Basio rakatanimai; badina be oi dibamu ai na tano ḡaḡaena ai baia taruha, bena oi na ai matamai ai baola.

³²Ba bamomai, bena Iehova ena herahia ḡaudia amo oi ahumu do baia henimu.

³³Taunabunai, idia na Iehova ena ororo amo e laolao matama, dina toi eha laolao, Iehova ena taravatu mauana danu dina toiosi ai idia vairadiai e huaia lao, edia laḡa-ani gabuna e tahua.

³⁴Dina ai, Iehova ena ori esee hahekerukerudia, edia taruha e toretania negadia iboudiai.