Numbers 24:3-18

³gei mee ga helekai aga nia helekai kokohp aanei: “Deenei telekai a Balaam, tama Beor, nia helekai o tangada dela e mee di mmada gi nia mee huogodoo haga madammaa.

⁴E mee di longono nnelekai a God. Ogu golomada guu ala gi daha, au guu mmada gi di haga modongoohia mai baahi o God Koia e Aamua.

⁵Nia hale laa digau Israel le e mmaadanga,

⁶gadoo be nia niu ala e hagatau adu, ge e hai gadoo be nia hadagee i taalinga di monowai. Nia maa e hai gadoo be nia laagau ‘aloe’ ala ne dogi go Dimaadua, ge e hai gadoo be nia laagau ‘cedar’ i taalinga nia wai.

⁷Di uwa la ga nnoo mau i nadau baahi, gei nadau lii laagau gaa dogi gi lodo di gelegele gu tiutiu hagahumalia. Di king digaula ga aamua i di king go Agag, ge nia mahi o dono henua ga modoho hua beelaa.

⁸God ne laha mai digaula gi daha mo Egypt, gei e madamada humalia i digaula i lodo tauwa, gadoo be di kau daane lodo geinga dela e maaloo dangihi. Digaula e holo nadau hagadaumee, gei e oho nadau iwi mo di hadihadi nia amu maalei digaula.

⁹Digaula e hai gadoo be di laion maaloo. Mee gaa kii gei nia daangada huogodoo e mmaadagu di hangahanga a mee. Tangada dela ma ga haga maluagina a Israel, geia hogi e haadanga lamalia, gei tangada dela ma ga haga halauwa Israel, geia hogi e halauwa.”

¹⁰Balak gu hagawelewele huoloo gi Balaam, gaa llomi ono lima, ga helekai gi Balaam, “Au ne gahi mai goe belee haga halauwa ogu hagadaumee, gei goe ne hagahumalia digaula nnolongo e dolu.

¹¹Tuu i daha, hana gi doo hale! Au gu hagababa bolo au e hui goe, gei Dimaadua gu daa gi daha di hui deenei mo goe.”

¹²Balaam ga helekai anga, “Au guu lawa di hai gi digau kae hegau ala ne hagau mai kooe boloo,

¹³‘Ma e aha maa Balak belee gaamai gi di au nia goolo mono silber huogodoo o dono hale, gei au e deemee loo di hunahuna taganoho Dimaadua, i dagu hai dahi mee i dogu hiihai, dela hua dagu mee gi heia go di mee a Dimaadua ne hai mai gi di au.’”

¹⁴Balaam ga helekai labelaa gi Balak, “Dolomeenei gei au gaa hana gi baahi ogu gau, malaa, i mua dogu hana, gei au e hagi adu gi iloo e goe di mee digau Israel ma gaa hai ang gi au daangada i nia laangi ala ga lloomoi.”

¹⁵Malaa, Balaam ga helekai aga nnelekai kokohp aanei: “Deenei telekai Balaam, tama Beor, guu hai tangada e mee di mmada gi nia mee huogodoo haga madammaa.

¹⁶Geia tangada e mee di longono nia helekai a God, gei e mee di kae di manawa kabemee dela e hanimoi mai Tangada Aamua Muginua. Ogu golomada gu aala, au guu mmada gi di haga modongoohia mai baahi o God Koia e Aamua.

¹⁷Au e mmada gi lodo di madagoaa dela e hanimoi, gei au e mmada gi teenua go Israel. Di king dela e hai gadoo be di heduu maahina ga gila aga i lodo tenua deelaa. Mee e hanimoi i Israel e hai gadoo be di heduu dingidingia. Mee ga daaligi nia dagi o Moab, ga daaligi nia daangada o Seth huogodoo.

¹⁸Mee ga haga magedaa ono hagadaumee i lodo Edom, ga hai mee gi tenua digaula. Israel ga noho hua beelaa i dono maaloo.