Numbers 23:12-23

¹²Me fulweg Balaam ni ga’ar, “Kemus ni thin nike yog SOMOL ngog e rayag ni gog.”

¹³Me ga’ar Balak ngak Balaam, “Mu un ngog ngdarow ngabang ni ga ra par riy ma kemus ni boch piyu Israel e ga ra guyrad. U rom e ngam yibil riy ngam bucheg wa’athrad.”

¹⁴Me fek ngranow nga daken bangi flang u Zofim ni bay u p’ebgul e Burey ni Pisgah. Miki ubung medlip e altar u rom, mra reb fapi altar miki maligachnag reb e garbaw ni pumo’on nge reb e saf ni pumo’on u daken.

¹⁵Me ga’ar Balaam ngak Balak, “Mu sak’iy u to’oben e maligach rom ni mo’oruf, mu gu wan aram nggu mada’gow Got.”

¹⁶Me yib SOMOL ngak Balaam me yog ngak e n’en ni nge yog, me l’oeg nge sul ngak Balak ni nge weliy e thin rok ngak.

¹⁷Me sul me pir’eg Balak ni kab sak’iy u to’oben e maligach rok ni mo’oruf ni yad fapi tayugang’ nu Moab. Me fith Balak ngak e n’en nike yog SOMOL,

¹⁸me weliy Balaam e re yi’iy ni ba’aray ngak: “Balak ni fak Zippor, moy ngam telim ko n’en ni nggog.

¹⁹Got e gathi bod e girdi’, nma ban; Gathi ba girdi’ nma thiliyeg laniyan’. Tin nma micheg ni nge rin’ e ma rin’; Ra non ma kem’ay i ngongliy.

²⁰Keyog Got ngog ni nggu fal’eg wa’athay, Ma nap’an nra fal’eg Got wa’athay, ma dabkiyag ni nggu rin’ ban’en ngay.

²¹Kug guy ndariy e buch wa’athan ara kireb ni nge yib ngak yu Israel. I SOMOL ni Got rorad e bay rorad; yad be tolulnag ni Ir e pilung rorad.

²²I Got e ke fekrad nga wuru’ yu Egypt; Ma cham ni pa’rad ni bod rogon ba garbaw ni pumo’on nib damumuw.

²³Dariy ba mmotokan ara bmit e pig, Nra yib angin ko nam nu Israel. Chiney e bayi yog e girdi’ murung’agen yu Israel ni bayi lungurad, ‘Mu sapgad ko tin nike rin’ Got!’