Numbers 23:12-23

¹²Balaam ga helekai, “Au e mee hua di helekai i nia mee a Dimaadua ne gaamai gi di au bolo gi helekai ai.”

¹³Balak ga helekai gi mee, “Gidaua gaa hula gi di gowaa dela i golo, gii mmada goe gi hunu gau hogoohi o Israel, gei goe ga haga halauwa digaula i di gowaa deelaa.”

¹⁴Mee gaa lahi a Balaam gi lodo di gowaa maalama go Zophim dela i hongo di Gonduu Pisgah. Mee gaa hau labelaa ana gowaa dudu tigidaumaha e hidu i di gowaa deelaa, gaa hai dana tigidaumaha gi di kau daane ge tei siibi daane i hongo nia gowaa hai tigidaumaha dagidahi.

¹⁵Balaam ga helekai gi Balak, “Goe gaa noho i baahi dau tigidaumaha deenei, au e hana malaa e heetugi gi God i golo.”

¹⁶Dimaadua ga heetugi gi Balaam ga helekai anga, “Hana gi baahi o Balak, helekai gi mee i agu helekai ala e hai adu gi di goe.”

¹⁷Balaam gaa hana ga heetugi gi Balak e noho hua igolo i baahi dana tigidaumaha dudu madalia nia dagi Moab. Balak ga heeu be Dimaadua ne helekai bolo aha.

¹⁸Balaam ga helekai aga i nia kokohp aanei: “Balak, tama Zippor, hanimoi malaa, goe hagalongo gi humalia gi dagu mee dela ga helekai ai.

¹⁹God la hagalee hai be tangada dela e helekai tilikai, ge hagalee hai be tangada dela e huli ana maanadu. Mee gaa hai dana hagababa i dahi mee, ge Ia e haga gila aga di maa. Mee e helekai hua, gei di maa guu hai.

²⁰Mee gu helekai mai gi di au bolo au gi haga maluagina ina aga. Di mee a God gu haga maluagina aga, gei au e deemee di huli.

²¹Au digi gida dahi mee huaidu i baahi digau Israel, be di haga haingadaa i di madagoaa ga hanimoi maalia. Dimaadua, go di nadau God le e madalia digaula. Digaula e haga modongoohia aga bolo Mee go di nadau king.

²²God gu laha mai digaula gi daha mo Egypt, gei e madamada humalia i digaula i lodo tauwa, gadoo be di kau daane lodo geinga dela e maaloo dangihi.

²³Deai di buubuu e mee di hai ang gi digau Israel ai. Deenei di madagoaa nia daangada e helekai aga i di hai o digau Israel boloo, ‘Mmada gi di mee haga goboina a God dela guu hai ang gi ana daangada!’