Numbers 21:9-31

⁹Me ngongliy Moses ba porchoyog ko wasey ni bronze nge tay nga p’ebgul ba ley i gek’iy nge suweg ngalang. Mra k’ad e porchoyog be’ me yan i sap ko re porchoyog ni bronze nem ma dabki yim’.

¹⁰I yan piyu Israel ngranod ra n’ufed e Tent rorad nga Oboth.

¹¹Tomuren nra chuwgad u Oboth, mranod ra pired nga Abarim ni bang i daken e ted ni bay ngalan e ngek ko binaw nu Moab.

¹²Miyad chuw u rom ngranod ra pired ngalan e loway u Zered.

¹³Mu ku ra chuwgad u rom ngranod ra pired nga ba’ ni lel’och e Lul’ nu Arnon, ni bang i n’en ni go’ garger nib wub ngalan e binaw nu Amor. (Arnon e mathil u thilin yu Moa ngu Amor.)

¹⁴Iraram fan ni Fare Babyoren e Mael rok SOMOL e ga’ar riy “. . . fare binaw nu Waheb u lan yu Sufah, nge fapi loway; fare Lul’ nu Arnon,

¹⁵nge yungi n’en nib log ngalan e yupa’ i loway nib wub i yib ko binaw nu Ar me yan u rom ko mathil nu Moab.”

¹⁶Mu ku ra chuwgad u rom ngranod ngabang i n’en ni yima yog yu Wells ngay, ni aram e gin ni ga’ar SOMOL riy ngak Moses, “Mu kunuy e girdi’ nga ta’bang, ma bay gu pi’ e ran ngorad.”

¹⁷Aram e ngiyal’ ni yin’ e girdi’ nu Israel e re tang ni ba’aray: “Luwed mu pi’ e ran; Ma bay gun’ed tangin —

¹⁸Fare luwed ni fu’og e pumo’on ni fak e pilung, Nge pi’in yad ma yog e thin, Nni ker ngab sog ko pilung Nge pi sog rorad.” Miyad chuw u daken e ted ngranod nga Mattanah,

¹⁹miyad chuw u rom ngranod nga Nahaliel, mranod u Nahaliel nga Bamoth,

²⁰miyad yan u Bamoth nga loway ko binaw nu Moab, u to’oben p’ebgul e Burey nu Pisgah, ni yira guy riy daken e ted.

²¹Me pi’ yu Israel e thin ngak Sihon ni Pilung nu Amor nra ga’argad:

²²“Mu pagmad nggu warod u lan tafnam; dab gu thum’gad nga daken e flang rom fa milay’ rom; ma dab gu unumed e ran ko luwed rom; nggu warod u Kanawo’ ko Pilung, nge taw ko ngiyal’ ni kug thumurgad u daken tafnam.”

²³Machane Sihon e de pag yu Israel ni nga ranod u lan tafen. I kunuy e pi salthaw rok nga ranod ngak piyu Israel nga daken bang i ted, rabad nga Jahaz ngar chamgad ngak yu Israel.

²⁴Ma piyu Israel e rli’ed bayo’or e salthaw ko mael ngar koled e binaw rorad ni tabab ko Lul’ nu Arnon nge yan u rom nga Jabbok, nge mus ko Ammon, ni bochan e mathil nu Ammon e bfel’ rogon ni yima matanagiy.

²⁵Ma aram me kol e girdi’ nu Israel urngin e binaw rok piyu Amon, nib mu’un yu Heshbon ngay nge urngin e yochi binaw nib liyeg, ngar pired riy.

²⁶Heshbon e tafen e pilung ko Amorite ni aram Sihon ni Pilung, ni fa’ani cham ko fabin ni immoy e pilung u Moab nge kol urngin e binaw rok ni ga’ngin ni yan nge mda ko Lul’ nu Arnon.

²⁷Aramfan ni yon’ fapi girdi’ nma tung tang e tang ni ga’ar, “Moy nga Heshbon, ko binaw rok Sihon ni Pilung! Gamad ba’adag ni ngan fal’eg bayay ngki sul nga rogon.

²⁸Immoy bingyal’ ni re binaw nem nu Heshbon e yan e salthaw rok Sihon riy nga m’on ni gowa ba nifiy; I gathay fare binaw nu Ar u lan yu Moab Me ful’ e yochi burey ni bay nga talang u Arnon.

²⁹Gafgow gimed e girdi’ nu Moab; gimed e pi’in gimed be tayfan Kemosh e kam awgad nga fithik’ e kireb! Fare got romed e ke pag e pumo’on kar malethaygad, ma pi’in ni ppin e kar manged kalbus ko pilung nu Amor.

³⁰Ma chiney e kan thang mit e pi’in owcharad, Ni mus u Heshbon nge yan nga Dibon, me yan u rom nga Nashim nge yan nga Nofah, u charen yu Medeba.”

³¹Ma aram me dumow yu Israel u daken e binaw nu Amor ngar pired riy,