Numbers 15:8-41

⁸Ma nap’an nra pi’ ba garbaw ni pumo’on ngak SOMOL ni maligach ni mo’oruf fa ba maligach nib mathang malfith u ban’en ni ognag ni nge pi’ fa ba maligach nma gapaseg thilin Got nge girdi’,

⁹ma ba maligach ni grain ni nel’ e pawn e flour ni kan athkuy aningeg e pint e gapgep ni olive ngay e nge pi’,

¹⁰ma ku ra dachuguy aningeg e pint e wayin ngay. Rib fel’ u wan’ SOMOL bon e pi ggan ni maligach ney.

¹¹Ireram e n’en nra chagiy nga reb garbaw ni pumo’on, ara ba saf ni pumo’on, ara ba saf, fa ba kaming ni nge pi’ ni maligach.

¹²Ra yo’or ko ta’reb e gamanman ni nge pi’ be’ ni maligach, ma aram e ku ra yo’ornag e pin’en ni nge dachuguy ngay, ngi i par nib papaluw oren.

¹³Gubin e girdi’ nu Israel ni ngu’ur rin’ed e pin’ey ni aray rogon nnap’an ni yad ra pi’ e ggan ni maligach, ni bfel’ bon u wan’ SOMOL.

¹⁴Ma demturug e ngiyal’ nra leamnag be’ u reb e nam ni be par u fithik’med, ndemturug ko ba ngoch nap’an ara ba n’uw nap’an, ni nge pi’ ba maligach ni ggan ni bfel’ bon u wan’ SOMOL, ma kura fol ko pi gafal ney.

¹⁵Ma chiney i yan ngaram e ta’bogi gafal e ngam faned nge girdi’ u boch e nam ni yad ma par u fithik’med. Ta’reb rogomed nge pi cha’nem u mit SOMOL;

¹⁶ta’bogi motochiyel nge gam’ing e gimed bay u tanggin, gimed nge yad.

¹⁷Me yog SOMOL ngak Moses ni nge pi’

¹⁸e pi gafal ni ba’aray ngak e girdi’ nu Israel ni ngu’ur folgad riy u lan fare nam ni bayi pi’ ngorad.

¹⁹Nap’an ni yira kay e ggan ni yib u yong’olen e but’ u rom, ma yira fael boch nga bang nib mal’eag ni f’oth rok SOMOL.

²⁰Ma gimed ra lith e flowa ma bin nth’abi som’on e lof ni gimed ra lith ko grain nib be’ech e gimed ra pi’ ngak SOMOL nib f’oth nib mal’eag. Ren’ey e yira pi’ ngak ni bod rogon ni gimed ra pi’ fare f’oth nib mal’eag ngak ko grain ni gimed ma n’ag keru’.

²¹Chiney i yan ngaram e ngu’um pi’ed ngak SOMOL e re tow’ath ney nib mal’eag ko pi flowa ni gimed be lith.

²²Machane susun e bay be’ ni gathi leam rok me kal ni de fol u boch e pi gafal ney ni pi’ SOMOL ngak Moses.

²³Ma fa’anra munmun ma dabkiyag rok yu Israel ni ga’ngin ni ngu’ur rin’ed urngin e pin’en nike tay SOMOL chiylen ngak Moses.

²⁴Ma ra ke buch ni aray rogon ni bochan e oloboch rok yu Israel ni ga’ngin, ma ngar pi’ed ba garbaw ni pumo’on ni maligach ni mo’oruf ni bfel bon u wan’ SOMOL, nib mu’un e maligach ni grain nge wayin ngay nrogon ni yima pi. Ma ku yad ra chagiy ngay ba kaming ni pumo’on ni nge mang maligach ni fan ko denen.

²⁵Ma fare prist e ra pi’ fapi maligach ni fan ngak piyu Israel ni ngar be’echgad bayay, mra n’ag Got fan e kireb rorad, ya fare oloboch e gathi leam rorad, ma kar feked e maligach ni fan ko denen rorad i yib nib maligach ni ggan ngak SOMOL.

²⁶Ma ga’ngin yu Israel nge fapi girdi’ nu boch e nam ni yad be par u fithik’rad e yigo’ ra n’ag Got fan e denen rorad, ni bochan e gubin e girdi’ ma bl’ag ko fare oloboch.

²⁷Fa’anra ta’abe’ e ke denen ni kal riy, ma nge pi’ ba kaming ni bpin nike gaman e ta’reb e duw yangren nib maligach ni fan ko denen rok.

²⁸Ma fare prist e ra fal’eg u altar bangbengin e machalbog ni nge be’echnag facha’ ko denen rok, ma yira n’ag machan rok.

²⁹Yi go’ aray rogon ni ngi i rin’ gubin e girdi’ ni yad ra denen nra kalgad riy, ndemturug ko be’ nu Israel ara be’ nu bang nma par u Israel.

³⁰Machane demturug be’ nra denen nri tafinay rok, ndemturug ko be’ nu Israel fa be’ nu reb e nam ni be par u Israel ma bbuch e rok, ya be dariyfannag SOMOL, ere yira thang e pogofan rok,

³¹ni bochan e ke pi’ keru’ ko n’en nike yog SOMOL ma ke th’ab ni leam rok. Ere ra yim’ ma ir e ke girengiy e yam’ nga daken.”

³²Nap’an ni bay e girdi’ nu Israel u daken fagi ted, me reb e Sabbath mi ni pir’eg be’ nib mo’on ni be kunuy e l’ud.

³³Mi ni fek i yan ngak Moses, nge Aron, nge gubin piyu Israel.

³⁴Mi ni tay e matnag rok facha’ ni bochan e dawori tamilangan’uy ko n’en ni ngan rin’ ngak.

³⁵Ma aram me ga’ar SOMOL ngak Moses, “Re mo’on nem e thingar ni thang e pogofan rok; piyu Israel ni gubin e ngar malang niged nge yim’ u wuru’ e gin yad be par riy.”

³⁶Ma aram me fek piyu Israel ni yad gubin facha’ nga wuru’ e gin ni yad ma par riy ngar malang niged nge yim’, ni bod nike yog SOMOL.

³⁷I motochiyel SOMOL ngak Moses

³⁸ni nge yog ko girdi’ nu Israel: “Mu ngongliyed e pi matharthar u tabthungen e mad romed nra reb mi gimed m’ag ba yil’ i gaf nib ra’en mak’ef ngay. Ngam rin’ed e ren’ey e chiney i yan ngaram ni gubin e mfen.

³⁹Pi matharthar ney e nge mang puguran ngomed, ya nge gubin ngiyal’ ni gimed ra guy me yib ngan’med urngin e tin kugog ni ngu’um folgad riy; nge dab mu pi’ed keru’med ngog ngam leked fiti lanin’med nge tin kam mm’ad ni bochan.

⁴⁰Fapi matharthar e bayi pugurag ngomed ni ngu’um folgad ko urngin e tin kugog, ma bay mu pired nike milfamed ngog ni polo’.

⁴¹I gag SOMOL ni Got romed; kug fekmed nga wuru’ yu Egypt ni nggu mang Got romed. I gag SOMOL.”