Numbers 14:36-45

³⁶Ragag fapi pumo’on nranod ngar lekged fare nam miyad sul nga rogned thin nde fel’ ni yad tapgin ni gun’gun’ e girdi’ nib togopluw ngak SOMOL.

³⁷Fapi pumo’on nrogned murung’agen fare nam nde fel’, e aw e gechig ngorad ngar m’ad u p’eowchen SOMOL.

³⁸Machane Joshua nib mo’on ni fak Nun nge Kaleb nib mo’on ni fak Jefunneh e yow e darm’ow u fithik’ fapi pumo’on npi’rad ni ngar damit niged fare nam.

³⁹Fa’ani weliy Moses ngak urngin e girdi’ nu Israel e thin nike yog SOMOL me ri kireban’rad.

⁴⁰Me reb e rran riy nri kakadbul miyad yan ni ngranod ko gin nib mak’ burey, ni be lungrad, “Chiney e ngdarod ko fare nam nike weliy SOMOL murung’agen ngodad. Ya riyul’ ni kad denengad.”

⁴¹Me ga’ar Moses, “Ere mangfan ni nge dab kum folgad rok SOMOL e chiney? Ya dabiyag ni ngam bunggad ngabang!

⁴²Dab mmarod. Ya SOMOL e dabi un ngomed, ma mmudugil ni gimed ra waer rok e pi to’ogor romed.

⁴³Ya gimed ra mada’ e pi Amalekite nge piyu Kanaan ma gimed ra yim’ u fithik’ e mael; ya SOMOL e dabi un ngomed ngam marod, ya kam siyegned ni ngam folgad rok.”

⁴⁴Miyad gelnag lanin’rad ngar sorgad ko fa gin’en ni go’ burey, ni yugu aram rogon nde un fare Kahol ko M’ag rok SOMOL ngorad nge Moses.

⁴⁵Me yib e pi Amalekite nge piyu Kanaan ni be par u rom ra maelgad ngorad ngar gelgad ngorad, miyad lol’oegrad ngar mada’gad nga Hormah.