Ntendwa 10:3-20

³Yendaga sachenda yamsi, umo awonaga uwoni nomsi, amwona mndima ywa kwembingu ywa Chohile pwilili akamgamba, “Koneliyo!”

⁴Amsinya uyo mndima ywa kwembingu kwa woga na kumuza, “Zumbe, kunambwani?” Mndima ywa kwembingu ahitula, “Chohile kahokela malombezi yako na malavyo yako kuwambiza wachiwa, havijale.

⁵Haluse sigila wantu waite Yafa wakamwitange mntu yumwenga akwitangwa Simoni zina dyakwe tuhu etangwa Petulo.

⁶Uyo emwenyumba ya msuma mikota akwitangwa Simoni, akwikala hajihi ne bahali.”

⁷Mndima ywa kwembingu niyo ahalawa, Koneliyo ewetanga wandima wakwe waidi wa kukaya na mnkondo, mntu akutoza sila ya kumvikila Chohile yumwenga mwa wandima wakwe mwenye.

⁸Kawagambila chilaile nakuwasigila uko Yafa.

⁹Zuwa ditimile, umo wemwe sila wakasogeila Yafa, Petulo akwela kulanga kwedigulu mwesa mtandatu nomsi akamlombeze Chohile.

¹⁰Nakalumwa ni sala, nakonga adye nkande, umo nkande ikadamanywa, niyo engilwa ni uwoni.

¹¹Awona mbingu ikagubuka nakuwona chintu saviya suche nkulu ikuselezwa kulaila kulanga kuno itozwa mwe ntendele nne.

¹²Umo namna chila namna ya nyama na vikutambala na wadege wo ulanga.

¹³Izwi dyamgamba, “Petulo chimala, chinja udye.”

¹⁴Mna Petulo agamba, “Zumbe havikudahika, sinati kudya chintu hachikuwagila kudigwa hegu chizavu.”

¹⁵Izwi dyamgamba naho, “Usekulonga chochose hachikuwagilwa kudigwa icho Chohile aungile chidigwe.”

¹⁶Vino vilaila nkanana ntatu, chintu icho niyo chavuzwa kwembingu.

¹⁷Umo Petulo akatenda kehelwa kuno akazungula amawono yagaze, wadya wantu wasigilwe ni Koneliyo wabunkula ikaya akwikala Simoni, niyo wachimala holwivi.

¹⁸Wetanga nakuza, “Hano hana mjeni akwitangwa Simoni Petulo?”

¹⁹Petulo nachei akajeza kukombaganya amawono ayo nayakagaze, aho Muye amgamba, “Tegeleza, hana wantu watatu wakukuzungula.

²⁰Sunguza sela usekutenda na nkama kwita nawo kwaviya nimiye niwasigile.”