Nnegau 2:22-43

²²“Nia daane o Israel! Hagalongo gi agu helekai aanei: Jesus o Nazareth, dela ne hai mee gi di mogobuna o God, dela gu haga modongoohia aga go nia mogobuna mono mee hagagoboina huogodoo ala ne hai go God mai dono baahi. Tangada nei mo tangada nei i goodou gu iloo nia mee aanei, idimaa, nia mee aanei ne hai i godou mua.

²³Taane deenei dela ne gowadu go God gi goodou la di hagahonu o dana bilaan, gei goodou ne daaligi a Mee i di wanga a Mee gi digau huaidu, e daudau gi di loobuu.

²⁴Gei God gu haga mouli aga a Mee, gu hagamehede a Mee gi daha mo di mogobuna o di made, idimaa, di made le e deemee di galabudi a Mee.

²⁵Deenei di mee David ne helekai ai di hai o maa: ‘Au gu gidee Dimaadua e noho i ogu mua i nia madagoaa huogodoo. Mee e hoohoo mai gi di au, gei au e deemee di tale gi di haingadaa.

²⁶Malaa, ogu lodo e tenetene huoloo, agu helekai e honu i di tenetene. Ma e aha maa dogu huaidina le e mooho gi daha, gei au dogu hagadagadagagee i golo,

²⁷idimaa, Goe hagalee diiagi au gi lodo di gowaa o digau mmade, gei Goe hagalee diiagi tuaidina dau dangada hai hegau dabu gii bala i lodo taalunga.

²⁸Goe gu haga modongoohia mai nia ala e dagi gi di mouli, gei doo noho i dogu baahi ga haga honu au gi di tenetene.’

²⁹“Ogu duaahina nei, au e hai loo gi helekai adu gi goodou haga madammaa di hai o tadau damana King David. Mee ne made, gaa danu, gei dono daalunga la i ginei i tadau baahi, gaa dae mai loo gi dolomeenei.

³⁰Mee di soukohp, gei mee e iloo di hagababa a God ne hai gi mee: God ne hagamodu ang gi mee bolo Ia gaa dugu Tangada mai di madawaawa o David, gii king gadoo be David.

³¹David gu gidee di hai a God dela gaa hai maalia, gei mee ga helekai i di mouli aga o di Mesaia boloo, ‘Di mouli o Maa la hagalee diiagi gi lodo di gowaa o digau mmade, gei dono huaidina hagalee bala i lodo taalunga.’

³²“God ne haga mouli aga a Jesus mai i di made, gei gimaadou huogodoo ala go digau haga modongoohia ni di mee deenei.

³³Mee gu haga menege aga gi di baahi gau donu o God, go dono Damana, gei gu hai mee gi di Hagataalunga Dabu be dana hagababa. Gei di godou mee dela e gidee ge e longono dolomeenei, la go dana wanga dehuia dela ne dugu mai gi gimaadou.

³⁴Idimaa, hagalee go David dela ne hana gi di langi. Mee ne helekai boloo, ‘Dimaadua gu helekai gi dogu Dagi: Noho i dogu baahi gau donu,

³⁵gaa dae loo gi dogu madagoaa ma gaa dugu o hagadaumee gi lala o babaawae.’

³⁶“Digau Israel huogodoo la gi iloo humalia bolo ma go Jesus dela ne daudau go goodou gi di loobuu, go Mee dela ne haga gila aga go God gaa hai di Tagi mo di Mesaia.”

³⁷Digaula ga longono gei digaula gu manawa gee huoloo, ga helekai gi Peter mono gau agoago hagau, “Madau duaahina nei, malaa dehee di madau hai gaa hai?”

³⁸Peter ga helekai, “Tangada nei mo tangada nei i goodou gii bida maliu gi daha mo ono huaidu, gi babdais i di ingoo o Jesus Christ, gei godou huaidu ga maahede, gei goodou ga hai mee gi di wanga dehuia a God, go di Hagataalunga Dabu.

³⁹Idimaa, di hagababa a God la ne hai adu gi goodou mo godou dama mo digau huogodoo ala e noho mogowaa, digau huogodoo ala gaa gahi Dimaadua go tadau God ang gi de Ia.”

⁴⁰Peter gaa hai dana hagamaamaa gi digaula, ga agoago hagamaaloo ge hagamahi, ga helekai, “Goodou hula gi daha mo di hagaduadua dela gaa wanga gi digau huaidu aanei!”

⁴¹Nia daangada dogologo gu hagadonu ana agoago, gu babdais, holongo e dolu mana (3,000) daangada ne haga puni gi di buini deelaa i di laangi hua deelaa.

⁴²Digaula guu noho madalia digau agoago hagau, e kabe nadau mee gi digaula, gei gu hai hegau madalia digaula i nia hagamiami mo nia hai dalodalo.

⁴³E logo nia mee haga goboina ne hai go digau agoago hagau, gei digau huogodoo gu goboina huoloo.