Nnegau 13:34-49

³⁴“Deenei di mee a God dela ne helekai ai i dana haga mouli aga a Mee mai i di made, bolo tuaidina o Maa la ga hagalee bala i lodo taalunga: ‘Au ga gowadu gi di goe nia hagahumalia dabu ge donu ala ne hagababa ko Au gi David.’

³⁵“Gii hai be dana hai dela ne helekai ai i tuai gowaa: ‘Goe ga hagalee dumaalia gi dau dangada hai hegau dabu gi mooho i lodo taalunga.’

³⁶“David, i lodo dono madagoaa, la nogo hai hegau gi nia haganoho a God, gei mee guu made, guu danu i baahi ono maadua mmaadua, gei dono huaidina la guu bala i lodo taalunga.

³⁷Malaa di mee deenei la digi heia gi Tangada dela ne haga mouli aga go God mai i di made.

³⁸“Ogu ihoo hagaaloho digau Israel, au bolo goodou huogodoo gi iloo donu bolo ma go Jesus dela ne hidi ai di agoago o di wwede o nia huaidu dela e agoago ai gimaadou adu gi goodou. Goodou gi iloo bolo tangada ma ga hagadonu a Mee, geia gu mehede mai gi daha mo ono huaidu huogodoo. Nnaganoho Moses le e deemee di haga maahede goodou gi daha mo nia huaidu.

⁴⁰Goodou gii pula i goodou gi de gila aga hua i godou baahi nia helekai nia soukohp ala e hai boloo:

⁴¹‘Mmada, goodou ala e haganneennee! Goodou gi hagamaanadu ge gii mmade, idimaa agu mee ala gaa hai ko Au dangi nei, la go nia mee ala hagalee hagadonu go goodou, ma e aha maa tangada ga hagamodongoohia nia maa adu gi goodou!’”

⁴²Di hagatanga a Paul mo Barnabas mai synagogee, gei nia daangada ga helekai gi meemaa bolo gi loomoi labelaa i di Laangi Sabad dela i golo, e agoago gi ginaadou labelaa gi nonua, i nia mee ala i golo.

⁴³I muli hua nia daangada ne hula gi daha mo synagogee, Paul mo Barnabas gu daudali go digau o Jew dogologo mo digau tuadimee dogologo ala ne hagadonu gaa huli ga daumaha gi taumaha digau o Jew. Meemaa ga helekai gi digaula, gu haga maaloo digaula bolo ginaadou gi mouli hua i lodo tumaalia dehuia a God.

⁴⁴Di Laangi Sabad nomuli, nia daangada dogologowaahee hoohoo digau huogodoo di waahale gu lloomoi belee hagalongo gi nnelekai a Dimaadua.

⁴⁵Di madagoaa digau o Jew ne gidee ginaadou digau dogologowaahee, digaula gu de hiihai huoloo, gu dubua. Digaula ga hai baahi ang gi nia helekai a Paul ge e haga balumee a mee.

⁴⁶Gei Paul mo Barnabas ga helekai manawa maaloo ang gi digaula boloo, “Koia e humalia di gowadu i mua nnelekai a God gi goodou. Gei di maa goodou ala e de hiihai gi di mouli dee odi, gei gimaua ga diiagi goodou, gaa hula gi digau tuadimee.

⁴⁷Deenei taganoho a God dela ne gaamai gi gimaua, ‘Au ne hilihili aga goe belee hai di maalama ang gi digau tuadimee bolo gii mee ai di haga mouli digau huogodoo ala i henuailala.’”

⁴⁸Di nadau longono hua nia mee aanei, gei digau tuadimee gu tenetene, gei gu hagaamu nia helekai a Dimaadua. Digau ala ne hilihili ang gi di mouli dee odi, la gu hagadonu.

⁴⁹Nia helekai a Dimaadua la guu dele gi nia madagowaa huogodoo i lodo tenua deelaa.