Niqiqoosa 7:46-54

⁴⁶Ánutufa Dafidina andeeqára óosana qáfamaseenoo minára rufanoo Dafidifa Ánutunara irámmirinoo qinau. Óo Yakooboona Ánutu, aní máaqa úqiqaana maqa kai máridanoo. Amanée qinée aní afeeka máaqa usakáqaananee minakí márinnaree.

⁴⁷Ánutufa sía Dafidinara qinau. Miná ámaaku Sooroomoonara qufanoo mifá afeeka maqa usakánau.

⁴⁸Ínnee aiqáma íriaqa firaaqóo uqanna úriqarara Ánutufa máridanoo. Sía amana faiqí nísaukunnoo usakára maqaki amana máriannoo. Tamummáqara fasiqa Ánutuna ufa minára maaqí qímaqoofa máridanoo fee qinau.

⁴⁹Innaarúnai qiní máaqa máridanoo qinée rakísinnimaqara maqusa máridanoo. Maqásaa ínnee máriafa qiní qíku réemarunafa káqikaa ainaina fífau ainaina máridanoo. Ínnee nána maqee qiníara usakéefaree. Qiní qimana idooára máqusa yái fee máridanoo fee.

⁵⁰Aiqáma máaqa áuqimaria ainaina qeeqá kai áuquafanausa máridaqa.

⁵¹Sateefeenafa tamummáqara fasiqa ufa qímannimiseenoo níqidanoo qinau. Ínnee maaqóo súqimariasa qiní ufa íriaqa. Ínnee aamína fasiqa miqírausa máriafanoo óoni máriafanoo náaqoo aunírausa sía Ánutuna ufa írimariafanoo. Ínneeqa nikeekú nikaakú nínaakusa miqírausa máriafanoo Ánutuna maraquna fannoo ínniki ánirarímarifaqa ínneeqa qáoo qímariasa máriafanoo.

⁵²Ínni nikeekú náaku sía moodáa tamummáqara fasiqa sía mandáikamannimaqanau. Aiqáma mandáikamánnimaqee maríqau. Óoqai Ánutuna andeeqára ainainira faiqi Yísunara kooroo ímaru tamummaqara fasiqauqa faqa nárí mariqau. Dóo maqee faqa ínnee miná uqanna ueeqásee kuqá nárí maríasa máriafanoo.

⁵³Ínnee Ánutuna sándufa qangiroo ásaukukinaana máree maríasa sía minara írimariafanoo káqirunna fímariafanoo.

⁵⁴Miqí qímasoofaqa faiqí súqimarusa miná Sateefeena ufa írufanoo minára níranaqeenoo nífai sandúrinau.