Niqiqoosa 5:14-27

¹⁴Faiqí faqa ánaasee faqa moómoosa faasaambáasaana Yísunasaa írirana rusísoosa sía úriqararausara rufíaqau nifaaqa quqáseeqa niqiqoo fásiqausasaa atooqáfi nímariqau.

¹⁵Yísufa niqiqoo fásiqausa moómoo faiqí dadaaqíra ainaina áuqee márufaqa faiqí ánaasee miná qáfamasee náriqa máaqakiaqa faiqí aurúsa faqa mandáikusa faqa dinee quqoosa faqa qaindúsumaree aanásaa qaarí qamunna ufíqiseeqa miqóo quqée maríqau. Miqímasoofanoo Peetooroofa aatáta fímarufanoo miná amana fannoo misá mandaaqóofaqa aurírafa teeroo taikáani fee qímasee míni quqée máriqau. Peetooroofa moómoo andeeqánnisaidanoo óonauqee ánauqee maasáindi sía amanaikíandoora qímasee aanásaa quqée maríqau.

¹⁶Faiqí ánaasee Yeerusaree dínni dínni márufaqa nári aurí marúsa faqa fuéenaikí marúsa faqa nífiqaida niqiqoosá máruqoo quqásoofaqa aiqáma uqanna idaaqamánnisee maríqau.

¹⁷Amaana máqasaa aanáiqikirafa úriqararafa Sadikai ámaana ufa qímarufa narí aqoónausa faqa Yísufa niqiqoo fásiqausa áuqu ainainara káaqa rairaa qídaqa misá maaqí qiqau faiqí ánaasee maasá minnísee misíannai atooqáidaqa. Sáinaqa maasá misá rumbáanaura.

¹⁸Miqí qímaseeqa misá Yísuna faiqi námu niqiqoo fásiqausa maréeqee karabúsaki quqáqau.

¹⁹Miqímasoofanoo eendákina Ánutuna qangiroo moó fannoo qumuréenoo íreeda karabúsa kooqí atúaseenoo niqiqoo fásiqausa aiqáma maréeqeenoo mádaanai quqánau.

²⁰Quqáseenoo maaqí qímasee qímanniminau. Ínnee fáfaa iqáqainaqa náaquqara firaa amaana maqaki kéeqafi kikíqiaqa. Miqí mámbiqa maa-fuka mariránara Yísuna ufamáu fíranara faiqí ánaasee naamúaqimannimiaqa.

²¹Niqiqoo fásiqausa iriséeqa eedóo qímasee iqáqoofaqa amaana máqaki kéeqafuafaqa faiqí ánaasee Yísuna fasáasa qímannimiqau. Qímannimimárufanoo amaana máqasaa rakísirafa aanáiqiki márufa mifá faiqí firaasá kanasóorauqa faqa moómoo aiqáma suqú quqáseenoo Yísuna faiqi námu karabúsaki káqi máriaa foo qímasee amaana máqasaa rakísi marú poorísausa niqiqéenoo ínnee karabúsakinaasa Yísuna faiqi námu niqiqoo fásiqauqa idukúsee nífiqee úruaqa.

²²Poorísa karabúsa maaqai óoquree randásee qáfoofanoo sía máriqau. Óoqurandee kansóorauqa suqímarunaki kéeqafinoo qímanniminau.

²³Maasá karafúsa máaqaki óoquree ámiqimasee qáfaunanoo kooqí ámiqimandee mundínoo máriinoo kooqíki mária poorisáusa faqa kikíqiqa máridaqa rakísidaqa. Maasá kooqí atúasee qáfaunanoo sía faiqí moó fannoo minakí máridanoo.

²⁴Amaana máqa poorísauqa rakísirafa faqa aanáiqiki márusa faqa miná iriséeqa misára óonu máfi iriséeqa randáqau.

²⁵Misá miqímasee randée márufanoo faiqí moó fannoo aniréenoo qímanniminau. Ínnee íriaqa eendá karabúsa máaqaki quqáasa misá amaana máqaki kikíqiqa máridaqa faiqí ánaasee naamúaqira ufa qímannimidaqa.

²⁶Miqí qímasoofaqa poorísa rakísirafa narí poorísauqa faqa amaana máqaki óonuree óonu íreeda kai niqiqoo fásiqauqa amaana máqakinaana nífiqee ániqau. Áranaiqi óonu misá nífiqee ánianaqa faiqí ánaasee minakí márusa óonisamu ainnasámu qumáree dárifoo qímasee íreeda kai óonu nífiqee ániqau.

²⁷Nífiqamaree mini súqimaru kansoorausa nífusaa kikíqamasaqau. Amaana máqasaa aanáiqiki márusa úriqararafa misá mara quqásee qímanniminau.