Niqiqoosa 2:4-21

⁴Idáuru̱ miqírafa Yísuna ufa íri marúsasaa áqufufanoo Ánutuna náaquqara andeeqara maraquna náakufufaqa naundurá qumbiqánoo márinau. Qumbiqáfinoo Ánutuna maraquna fannoo ánoonaikufaqa moo máqannaa ufa nári sía írimaru ufausa qímariqau.

⁵Mi-fasannái Yuda máqannaasa káaqa Ánutunara rímarusa ánaamurunni dáraaniqa máriusa óonurandee aniréeqa Yeerusaree máqusai qoomáqa suqánarara qúsimaríqau.

⁶Yeerusareenni súqimarusa úfai úqira ufa iriséeqa moómoosa Yísuna faiqi námu máruqoo suqíqa máriqau. Ánaamurukiqari ani márusa Yísuna faiqi námu ufa iriséeqa akasáa qeeqá maqannaa ufa qídee qímasoofanoo náaquqanau.

⁷Náaquqoofaqa randéeqa narí qímami narí qímami qiqau, Máa̱ ufa qímaria fasiqausa Kariree máqannaasa kai máridaqa.

⁸Misá maasá ufakíqari andeeqásee kai qída qiafaqa íridaqa. Náqi fee mándee maasá ufa íridee, sía maasá maqúsai máriaasa maasá ufauqá qídaqa. Maasá moómoo maqa maaqaindari ánunausa máridaqa.

⁹Maasá akaqáusa Paratia máqusaindari ánunausa. Akaqáusa Meedia máqa maaqaindari ánunausa. Akaqáusa Eeramma máqa maaqaindari ánunausa. Akaqáusa Meesoopootamia máqa maaqaindari ánunausa. Akaqáusa Yudeeaa máqa maaqaindari ánunausa. Akaqáusa Kapadoosia máqa maaqaindari ánunausa. Akaqáusa Poontiusa máqa maaqaindari ánunausa. Akaqáusa Asia máqa maaqaindari ánunausa.

¹⁰Akaqáusa Firikia máqa maaqaindari ánunausa. Akaqáusa Pamafiria máqa maaqaindari ánunausa. Akaqáusa Isipa máqusaindari faqa, Ribia máqa maaqa Sireenee aaqá máriasakiqari faqa ániqa. Akaqáusa Roomma máqusaindari ánunausa.

¹¹Yuda máqannaasa faqa ánaamuru Yuda amaana ufa írimariasa faqa ánunausa. Akaqáusa Kareetee máqa maaqaindari ánunausa. Akaqáusa Arabia máqa maaqaindari ániqa. Maasá moómoo maqúsaindari dáadu dáadu ufa qímarunausa ani máridaqa nári ufakíqari andeeqásee qiafaqa íridaqa. Misá Ánutuna firaa ainaina áuqunara qiafaqa íridaqa.

¹²Misá aiqáma náaquqeenoo naundurá dapíkufaqa narí qímami narí qímami qiqau. Maaná nána oosanee kambíqaidanoo maaqídanoo fee. Maasá miná óosanara randáidaqa.

¹³Akaqáusa Yísuna faiqinámuara naakada qiqau. Maa-fasiqáusa nammári moómoo néeneesee fúrufarida fífau faafau aiqáma máqannaa ufa qídaqa sía misá ufa íriaqa.

¹⁴Peetooroofa miná iriséenoo Yísuna faiqi námusaimbaqa qísaukuqara taikásee qíku nooqu qaara marasée qírausasaimbaqa fíndifufanoo firaaqóo namméera qímasee maaqí qímasee suqíqa marúsa qímanniminau. Qiní máqannaa Yuda máqannaasa ínnee aiqáma Yeerusareenni ani máriasa qiní ufa íriaqa. Qinée maqee qímannimianaqa ámiqimandee íriaqa.

¹⁵Maa-fasiqáusa sía nammárifau námasee fúrufaridau. Ínnee qáfaaqa kanánaana máridanoo súani maqee ururáidanoo. Minára sía amana nammárifau námaqaqee miqídafau ia.

¹⁶Maa-amiqira fuka ainaináfa kambíqaina Ánutuna tamummáqara fasiqa Yooeerafa óoqai ákara rúmaqoofa miná ánoona dóo maqee ínni nífusaa kambíqeenoo. Yooeerafa maaqí qímasee óoqai ákara rúmaqoofa.

¹⁷Ánutufa qinau, Taikáinna fáasaana maa-ainainná quqáanaura. Qinée qeeqá maraquna faiqí aiqámausa nifaaqaí nammáriara foora téeqimannimaqaanaura. Mi-afeekánannai ínni faiqinámu níraamuqmaaka náaru kambíqaaninna ainainara maqee qímasainanoo náaru kambíqaannoo. Ínni kumaaráauqa faqa qainá ánoona qainá qáfeefaranoo. Faiqí asooqá náuraasa qainá misá nífunni áreefaranoo.

¹⁸Mi-fasannái qinée Ánutusa káiqeesa aináinímariasa faiqí faqa ánaaseeuqa faqa nifaaqasáa qiní maraquna adíama nímaqasaanaqa misá tamummáqeefaranoo.

¹⁹Qinée mirínni innaarúnai moo áinaina óosana óosana uqannífiqasaanaqa maqásaaqari qáfeefaranoo. Maa-maqánasaa moo náaquqara firaa ainaina áuqusaanaqa qáfamasee qiní afeeka óosana qáfeefaranoo. Fidíka faqa idá faqa idá múna firaaná faqa máriannoo.

²⁰Asukuna fannoo súani afu áruannoo. Fidíka andandirafa quqoona ititáannoo. Karaambáiqa firaa kaaqa qara faasaana radíqisee qumuráannee qínna kamuqoo maa-ainainnáusa kambíqaannoo.

²¹Mi-fasannái yáfa yáfee Karaambáiqa áuquara fifímasee áarée maríasa misá kai Karaambáiqa asumu máreefaranoo. Yooeerafa mi-ufáusa ákara rúmaqoofa máridanoo.