Niqiqoosa 17:18-33

¹⁸Ateensa máqusai írirana fíqararausa maqee maqee súqida márunaki súqimariqau. Óosana óosana sukúraki kéeqeeusa Ateensa máqusai maqee maqee súqimariqau. Eepikurianna sukúra tisáauqa moó íriranamau fímariasa faqa Sitookika sukúra tisáauqa misá moo íriranamau fímariasa faqa Pauroona ufa átikai iriséeqa nóori uqéeraseeqa Pauroonara maaqí qimasee uteéti qídaqa qiqau. Maa-iriranná síai fasiqafa narí afaaqa fífau amooqída nána úfee qídanoo fee. Akaqáusa maaqí qiqau. Mifá ánaamuru Ánutusara qídanoo. Pauroofa Yísufa kúqiranakiqari fíndifunara qímannimufaqa misá tautúmasee dapi ufa qídaqa uteéti qímariqau.

¹⁹Misá miqí qímasee Pauroona áfiqamaree firaa akara maaqa miná áuqu Areeoopakusa mi-maqánaki fiqau. Firaa irirana faqáasa kai minakí súqimarunaki áfiqee fiqau. Minakí suqúseeqa Pauroonara irámmiriqa qiqau. Anée fúka ufa qímannimianaqa maasá miná írirara súqidaqa.

²⁰Mi-ufána qíannanaki maasá akaqáinainara randáidaqa.

²¹Ateensa máqusanaasa faqa ánaamuru animárusa faqa óosana óosana fúka írirana írianee qídaqa minára kai irimáree fímariqau. Misá minára Pauroona irámmirí maríqau.

²²Pauroofa miná iriséenoo misá nóorinni fíndifinoo qímanniminoo qinau. Óo ínnee Ateensa máqusanaasa qinée maí ánidaqa ínni óosanara qáfaidaqa íridaqa káaqa ínnee Ánutuna óosana óosana ainainannái nimana áuquseeqa maasá Ánutusee qímasaidaqa innaaru qiqánuasa.

²³Qinée ínni maqúsai óonuree anirée níniíqa ínneeqa aandáu̱ arusée tatúfimari qaindausa qáfeeqa. Ínnee moómoo Ánutusara óosana óosana innaaru qímariasa máriafaqa qinée qáfeeqa. Aiqáma qáindauqasaa mi-anutúsa núqu ákara rinoo márifaqa qáfeeqa. Mooqáindasaa ákara kai rinoo márifaqa qáfeeqa. Sía maasá írunna Anutunee qímasee ákara kai rúmaqaafaqa qáfeeqa. Mee ínnee sía írimaria Ánutuna minára innaaru qímarianara miná áuqu óosana koorooianáura.

²⁴Ánutufa innaarúna faqa maqá faqa aundurákinaa ainaina márina mináuqa áuqu Ánutufa máridanoo. Mifá innaarúna faqa maqá faqa áuqufa mi-ainainná karaambáiqa máridanoo. Sía faiqí nísaukunnai áuqueeqee amaana máqaki quqáqaafau máridanoofau.

²⁵Mifá narí kai náanna faqa márirana faqa faiqí faiqi nímimarifa máridanoo. Mifá nána ainainaree sárauímarifa márinaqee maasá qeeqá íriranannai kadáapirumeeqee ámianauree, sía amana. Aiqáma ainaina narí kai áuquqoofa kai máridanoo.

²⁶Mifá kai moodáa fasiqa áuquqoonasaaqari kai aiqáma máqannaa kambíaqa máridaqa. Mifá naríkai óosana ároonakiqari aiqáma ánaamuru quqánnisáqoosa kai máridaqa. Mifá qufaqa misá márirana óosumma nímaqóonakiaqa kai marimáree fímariafanoo.

²⁷Sía fífau, óoqai Ánutufa miqínau. Asukunakí máridaqa Ánutunara míkimmakidaqa randáidaqa paqúrinafa paqúriaqee qímaqoona miqímaqoona miqí maríafanoo. Sía Ánutufa faiqí níanai márifa máridanoo. Faiqí naaqá máridanoo.

²⁸Miná máriranaki kásiranaki maasá máridaqa. Ínni ufasáa rakísirausa misá faqa minára maaqí qímariafanoo maasá faqa miná faiqi námu kai máridaqee qídaqa.

²⁹Misá miqí qímaqoona qinée minára minakína ookáamasee qinée maaqí qídaqa. Maasá Ánutuna faiqi námu máridaqa náqimásee maasá quándakina qeeqá qíkoona amana kóorannai siruáannai óoninnai miná ámmeemmee rianáuree. Sía andeeqánoo máridanoo.

³⁰Óoqai faiqí misá Ánutunara randáidaqa asukunakínai míkimaki ánidaqa máriqau. Ánutufa mi-kamúqoora dóo aunúseenoo sía misá fúrufarirana ákiaqara nárinau maqee maa-kamúqoo aiqáma ánaamuru nári mandáinainakiqari quándakiqa Ánutufinai ubeekaaqée qídanoo.

³¹Mifá aiqáma máqannaasa moodáa fáasaana ufa irisée narí andeeqáranannai andeeqánnisáannoo. Dóo mifá útaaqamáqaifanoo mi-faasaannáfa máridanoo. Ufa írimari fasiqafa faqa utáaqamaqaifa máridanoo. Mi-ufána írimari fasiqana Ánutufa kúqiranakinaana mara fíndifunannai kooroo inóo máridanoo.

³²Írirana faqaasa súqimarusa kúqiranakiqari fíndifunara qímannimufaqa akaqáusa naanaidara qímariqau. Akaqáusa kafáa moo kári írianee qiqau.

³³Miqí qímasoofanoo Pauroofa ráudamakinoo finau.