Niqiqoosa 15:1-18

¹Yudeeaa máqa maaqakinaasa Yísuna ufa írimarusa akaqáusa Antiooka máqusai óoqureeqa Yísuna ufa írimarusara maaqí qímasee únna qídaqa naamúa qiqau. Ínnee Yísuna ufamáu kai fídaqa sía Mooseena sándamau fímariafanoo sía fáinanduqirausa sía innaarúnai asumu máreefaranoo fee qiqau.

²Pauroosa Baranabasisa mi-Yudeea máqannaa fasiqáusara qáoo qímasee mi-ufánara firaaqóo ufa qí qísee ufa raináqau. Miqí qímaseeqa misá moodáa ufa qímaseeqa qiqau Pauroosa Baranabasisa akaqáusa maaqóoqaraasa sáimbaqa Yeerusareenni óoru fúaqa. Óorureeqa Yísuna afaaqasáa áqoondiuqa qímannimifaqa maa-ufánara náqaa náqaa fee qífaqa óorurandee qumurée qífaqa íria.

³Antiooka máqusanaasa Yísuna ufa írimarusa misá niqiqámasoofaqa Yeerusareenni óoru fídaqa óoriqaree Fooeenisia máqa maaqai faqa Samaria máqa maaqai faqa Pauroosa Baranabasisa náriqa níniunara faqa ánaamuru moómoosa quándaki Ánutufinnai ubeekoonára faqa qímannimiqa fímariqau. Yísuna ufa írimarusa minára iriséeqa firaaqóo asasiqau.

⁴Yeerusareenni minamúsa óoruroofaqa Yísuna ufa írimarusa miqóo márusa faqa nári faiqí firaasá faqa Yísuna afaaqasáa áqoondiuqa minamúsa óoqu nífiqeeqee quqásoofaqa máridaqa Baranabasisa Pauroosa nári níniuna óosana óosana aamína máqannaa moómoosa Yísunasaa atooqéeuna mi-fasaasáusa qímannimimariqau.

⁵Farisai ámaana ufa qímarusa akaqáusa Yísuna ufa irisée miná áiku ásauku faqa miqóo Yeerusareenni máriqau. Misá faqa Baranabasina faqa Pauroona faqa ufa irisée fíndifiqa maaqí qiqau. Ánaamuru máriasa Yísuna ufara eedóo qídaqa sía káqi máriaqa maasá Yuda máqannaa fáinanduquséeqa Mooseena sándamau fídaqa innaarúna aana máreefaranoo.

⁶Yísuna faiqi námu niqiqoo fásiqausa moómoosa misá faiqí firaasá faqa minára iriséeqa moodáanaki suqúfufaqa ufa qímariqau.

⁷Kísaaqasaa mi-ufána qída maríqau. Miqí márufanoo níndafoosia Peetooroofa fíndifi maaqí qímasee qímanniminoo mi-ufána rafáaqafinau. Qiní qíkaqaafasaa Ánutufa sía maasá kaifau, ánaamuru faqa ámiqira fasaasa ufa irisée eedóo qiaqée qímaseenoo ínnikinaana qiní qumáreenoo, anée óosana aréenana ánaamuru qímannimia qufaqa miqímmiqiafana.

⁸Ánutufa faiqí aiqáma nímuqusa naundurá írimarifa máridanoo. Mifá ánaamuruara faqa eedóo qímaseenoo náaquqara maraquna maasá undée miqíkai ínoo misá faqa níminau.

⁹Sía maasá faqa misá faqa rainéenoofau qinau, amanamana kái fee qímasee misá mandáinaina numoo náriqa Yísuna saqárikiranannai míninnisanau.

¹⁰Ánutufa miqímmaqaifaqa ínnee nánaree firaa qumaara maréeqee fífau misá nífaariki quqáidee. Mooseena sándufa qaaraíkinoo máridanoo ámiqirafa faqa ummaara nímarifa faqa márinara maasá qikeekú qikaakú maasá faqa qumaara táfirana sía amanaikí máriafanausa máridaqa.

¹¹Ínnee sía miqíaqa. Maasá Yísuna saqárikamásoofanoo Karaambáiqa Yísufa narí áfaariranannai maasá útaaqeenoo. Ánaamuru miqí kai másaafanoo dóo misá faqa miqíkaimminoo útaaqamánnimaqeenoo.

¹²Peetooroofa miqí qímasoofaqa aiqáma dái̱mámbi írimarufanoo Baranabasisa Pauroosa nári níniunara óosana óosana qímannimufaqa íriqau. Miqandá ánaamurukiaqa nímarufanoo Ánutufa miqandánnai faiqí sía áuqaaqaa ira ainaina áuqusoofaqa faiqí ánaasee qáfoonara mi-ufána miqóo Yeerusareenni súqimariasa qímannimimariqau.

¹³Baranabasisa Pauroosa ufa taikásoofanoo Yameesafa fíndifinoo ufa moó qímanniminau. Óo qiní qíkaqaafasaa qiní ufa íriaqa.

¹⁴Ánutufa ánaamuruara ámuqusufanoo misákinaana akaqáusa maréeqeenoo naríara naríndikiaqeera máranau. Mi-ainainna óosanara Peetooroofa fáasai maasá dóo qímaqiminoo.

¹⁵Dóo miqúnaki óoqai tamummáqara fasiqa ákara kooroo ináu. Minára maaqí qímaqoona.

¹⁶Qinée kásooqaqee kafáa qúmuanauree qinau. Qumuréeqa Dafidina áiku ásauku máaqa rapéeiara foo ínoo márifaqa kafáa qumurée usakáanaura. Miná maqúsa úrisinoo márifaqa miná faqa rukíanaura.

¹⁷Miqía̱naqa máaqanna máaqanna karaambáiqara randáaqeera. Aiqáma máqannaasa náaraanausa qiní ufara ánifaranoo.

¹⁸Qinée karaambáiqa óoqai maa-ufáusa kooroo qíafanausa máridaqa.