Ninaedi rina Tinoni 21:6-33

⁶Meke garunu ni noki variva mate e Zihova sari na tinoni Izireli meke garati si arini, meke soku rina tinoni Izireli si mate.

⁷Meke mae zama guahe koe Mosese sari na tinoni Izireli: “Ele tavete va sea si gami sipu zama va karia gami se Zihova, meke zama va karigo tugo gami si agoi. Ke mamu tepa la koe Zihova kamahire pude va rizu seui sari na noki koa gami.” Meke varavara tokani e Mosese sari na tinoni.

⁸Meke zama la koe Mosese se Zihova, “Mu tavetia keke noki boronizi, mamu va sigotia koa keke dedegere turuna, meke sari doduru pu ta garata si kaqu doṉo sage la koasa meke toa.”

⁹Ke tavetia Mosese si keke noki boronizi, meke va sigotia sa pa batuna keke dedegere huda, meke be garatia noki si keke tie si kaqu doṉo sage la koasa noki boronizi meke toa si asa.

¹⁰Sari na tinoni Izireli si ene la meke koa paki pa Obati.

¹¹Topue rini pa Obati si la koa pule pa Lae Abarimi, koasa soloso qega, sapu koa pa kali gasa rimata, pa popoa Moabi.

¹²Beto asa si la koa paki pa lolomo Zeredi.

¹³Topue vasina, si ene pule meke la koa paki pa kali latu koasa ovuku Anoni, pa korapa qega, sapu hola la pa kali popoa Amoraiti. Anoni si koasa volosona, pa varikorapa Moabi meke sari na tie Amoraiti.

¹⁴Gua asa, ke ta Zamae koari na vinaripera koasa buka te Zihova “Sa vasileana nomana pa Vahebi, pa korapa popoa Supa meke sari na lolomo, koasa ovuku Anoni,

¹⁵meke koari na lolomo saripu gore la gua koasa vasileana nomana pa Are, meke kenuna sa volosona Moabi.”

¹⁶Taluarae si arini vasina meke ene la pa Bia. Koa nana si keke berukehe, vasina zama se Zihova koe Mosese, “Mu varigarani sari na tinoni, maqu poni kolo,” gua.

¹⁷Koasa totoso hie, si kera nia ri na tinoni Izireli sa kinera hie: “Bukaha vura, agoi na berukehe Kaqu kera qetu nia gami pa kinerakera.

¹⁸Ta geli koari na baṉara sa berukehe, meke koari na koimata tadi na tinoni. Gelinia kolu qolo tana baṉara rini, meke koari na dia kolu hodu.” Topue koasa soloso qega meke ene la pa vasileana Matana si arini

¹⁹taluarae vasina, si ene la pa Nahalieli meke Bamoti si arini.

²⁰Topue pa Bamoti si arini meke ene la koasa lolomo pa Moabi, pa batuna sa toqere Pisiqa meke doṉo gore la gua koasa qega.

²¹Va garunu la tie paleke inavoso sari na tinoni Izireli koe Sihoni sa baṉara tadi na tie Amoraiti, sapu zama guahe:

²²“Mu va malumu gami pude ene hola gua pa mua popoa lopu kaqu taluarae si gami meke sari na mami rovana bulumakao koasa siraṉa, meke la koari na mia inuma huiti ba be inuma vaeni; lopu kaqu napoi gami sari na kolo koari na mia berukehe; kote pa siraṉa mo si koa gami osolae hola taloa koasa mua kali popoa.”

²³Ba lopu va egoi Sihoni sari na tinoni Izireli, pude ene hola gua koasa nana kali popoa. Varigara ni sa sari nana qeto minate, meke ene la si arini pa Zahazi pa korapa qega meke la varipera koari na tinoni Izireli.

²⁴Ba sokudi ri na kana si va matei rina tinoni Izireli. Vagia rini sa dia popoa, podalae pa Ovuku Anoni pa kali mae meke kamo la pa Ovuku Zaboki, duta kamoa volosona sa popoa Amoni d. Sa volosona sa popoa Amoni si ta lavelavei va ṉiṉira sisigiti.

²⁵Gua asa, ke vagi betoi ri na tinoni Izireli sari doduru vasileana lavata pa popoa tadi na tie Amoraiti, Hesiboni meke sari doduru vasileana nomadi pa vari likohaena, meke koa vasina si arini.

²⁶Hesiboni si na ṉati vasileana lavata te Sihoni pa popoa tadi na tie Amoraiti, sapu varipera koasa baṉara pa popoa Moabi pukerane meke vagi sa sari doduru nana popoa, kamo la gua tu koasa ovuku Anoni.

²⁷Gua asa ke ta kerae pa kinubekubere; “Mae pa Hesiboni, koasa vasileana lavata te Sihoni sa baṉara! Hiva nia gami pude kuri pulea na va vaqura pulea.

²⁸Keke totoso koasa vasileana lavata pa Hesiboni si topue ene la guana nika sari na tie varipera te Sihoni; Huara va inetia sa sa vasileana lavata pa Ara pa popoa Moabi Va inapahi sa sari doduru toqere pa kali sagena sa Ovuku Anoni.

²⁹Malaṉa hola si gamu, tinoni pa popoa Moabi! Gamu na tie pu vahesia se Kemosi si ele tava kilasa! Vata raovi sa mia tamasa sari na tie, La ta pusi koe Sihoni sa baṉara tadi na tie Amoraiti sari na barikaleqe.

³⁰Ba kamahire sari na tutidia si ele tava inapaha beto. Doduruna podalae pa Hesiboni kamoa Diboni, Taluarae pa Nasimi kamoa Nopa, tata pa Medeba.”

³¹Gua asa ke koa ia ri na tinoni Izireli sa kali popoa tadi na tie Amoraiti,

³²garuni Mosese sari na tie pude hata ia sa siraṉa sapu leana hola, pude rapatia sa vasileana lavata pa Zazera. Vagi turaṉae nia ri na tinoni Izireli si asa, meke sari na vasivasileana nomadi pa vari likohaena, meke hadu va seu i rini sari na tie Amoraiti pu koa vasina.

³³Ene sage la gua koasa siraṉa la gua pa Basani sari na tinoni Izireli, ene mae se Oqo sa baṉara pa Basani, meke sari nana tie varipera, pude varipera koa rini pa Ederei gua.