Ninaedi rina Tinoni 19:1-19

¹Zamai e Zihova sari Mosese meke Eroni,

²pude poni koa ri na tie Izireli sari na tinarae hire: “Mamu turaṉa mae nia gamu na tie Izireli koari Mosese e Eroni si keke bulumakao mamaqota ziṉarana loke ari kisakisana, sapu lopu ele va tavetavetia rini pa inuma.

³Meke kaqu la ponia rini koe Eleaza sa hiama si asa. Kaqu ta turaṉa la pa valena sa vasina koa sari na tie pa dia ipi, meke kaqu tava mate pa kenuna sa si asa.

⁴Beto asa, si kaqu noti lania Eleaza, sa kakarutu limana pa ehara meke siburu nia sa sa ehara koasa Ipi Hopena te Zihova ka zuapa totoso.

⁵Doduruna sa kurukuru meke sa kapuna, masana, eharana, meke sari na laguna si kaqu tava uqu palae beto pa kenuna sa hiama.

⁶Beto asa si kaqu vagia sa hiama si keke kukuru huda sida, keke lelaṉa huda hisope, meke keke kukuru lozi ziṉara, meke kaqu oki lani sa pa nika.

⁷Mudina sapu gua asa, si kaqu va via i sa sari nana poko, meke kaqu zoropo nia kolo sa sa tinina soti, meke tiqe kaqu somana pule pa vinarigara tie si asa, ba lopu kaqu via tugo si asa osolae kamo totoso lodu sa rimata.

⁸Sa tie sapu suluna sa bulumakao si kaqu va via i tugo sari nana poko, meke zoropo nia kolo tugo sa sa tinina soti, ba lopu kaqu via tugo si asa osolae kamo totoso lodu sa rimata.

⁹Beto asa, si keke tie sapu via pa dinoṉo te Zihova, si kaqu vagi sari na ebana sa bulumakao, meke kaqu vekoi koasa vasina viana, pa valena sa vasina koa rina tie, vasina si kaqu ta kopue sa eba pude tadi na butubutu Izireli pude tanisa tinavete vina via pa kolo. Sa vina via hie si pude tana vinulasana sa sinea.

¹⁰Sa tie vagi varigarani sari na eba si kaqu va via sari nana poko, ba lopu kaqu via tugo si asa osolae kamo totoso lodu sa rimata. Sa tinarae hie si kaqu koa hola doduru totoso koari na rane vugo repere koari na tie Izireli meke sarini pu lopu na tie Izireli saripu koa koa rini.

¹¹Sa tie sapu tiqui sari na tie matedi si lopu kaqu via ka zuapa rane.

¹²Koasa rane vina ṉeta meke vina zuapa si kaqu va via pule nia tinina pa kolo tana vinavia meke kaqu tiqe via si asa. Ba be lopu va via pule nia si asa, koasa vina ṉeta meke vina zuapa rane si lopu kaqu via si asa.

¹³Asa sapu tiqua sa tie matena, meke lopu va via pule nia pa kolo vina via, ura lopu zoropo nia kolo sa sa tinina, si lopu kaqu via tugo si asa, ba kaqu koa hola sa bonina, sina lopu ta zoropo kolo vina via si asa. Be ene tata si asa pa Ipi Hopena si va bonia sa sa Ipi Hopena te Zihova; namu lopu kaqu hite koa hola koari na tie te Tamasa si asa.

¹⁴Be guana keke tie si mate pa korapa ipi poko sapu koa ia gamu, sari doduru tie pu koa pa korapana sa ipi pa totoso asa si kaqu boni beto si arini. Be keke votiki tie si nuquru pa ipi asa si boni tugo si asa, meke kaqu ta evaṉae boni si arini ka zuapa rane.

¹⁵Doduru vovoina kolo na raro saripu loke tukutukudi pa korapana sa ipi vasina mate sa tie, si kaqu boni beto tugo si arini.

¹⁶Be tiqua keke tie sa tie matena, sapu tava mate koa keke tie babe keke tie sapu mate hokara nana mo, babe na susuri tie matena si tiqua sa, babe keke lovu, si kaqu boni tugo si asa ka zuapa rane.

¹⁷Pude tava via pule sari na boni, kaiqa ebana sa bulumakao ziṉara, sapu tava uqu pude va via i sari na binoni, si kaqu ta vagi meke ta voi pa keke raro, meke zoropo tomo nia kolo.

¹⁸Beto asa keke tie sapu viana pa dinoṉo te Zihova, si kaqu vagia sa lelaṉa huda hisope, poṉa ia pa korapa kolo tana vina via, meke siburu la nia koasa ipi meke koari doduru likakalae pa korapana, meke koari na tie saripu koa vasina saripu tava boni sina mate vasina sa tie. Ta hivae tugo pude siburu lani sarini pu tiqua sa susuri tie matena, sa lovu, sa tini matena pu tava mate pa tie babe mate hokara nana mo.

¹⁹Koasa rane vina ṉeta, meke koasa rane vina zuapa, sa tie sapu viana, si kaqu siburu la nia sa sa kolo madina koasa tie sapu lopu viana. Koasa rane vina zuapa, si kaqu via sa tie, pa mudina sipu va via i sa sari nana poko meke zoropo pule nia kolo telena, meke kaqu tiqe via si asa pana lodu sa rimata.