Ninaedi rina Tinoni 13:6-32

⁶Koasa butubutu Ziuda, sa koimata si e Kelebi, sa tuna koreo e Zepune.

⁷Koasa butubutu Isaka, sa koimata si e Iqala, sa tuna koreo e Zosepa.

⁸Koasa butubutu Iparemi, sa koimata si e Hosea, sa tuna koreo e Nani.

⁹Koasa butubutu Benisimane, sa koimata si e Paleti, sa tuna koreo e Rapu.

¹⁰Koasa butubutu Zeboloni, sa koimata si e Qadieli, sa tuna koreo e Sodi.

¹¹Koasa butubutu Manase, sa koimata si e Qadi, sa tuna koreo e Susi.

¹²Koasa butubutu Dani, sa koimata si e Amieli, sa tuna koreo e Qemali.

¹³Koasa butubutu Asa, sa koimata si e Setura, sa tuna koreo e Mikueli.

¹⁴Koasa butubutu Napitalai, sa koimata si e Nabi, sa tuna koreo e Vopesi.

¹⁵Koasa butubutu Qadi, sa koimata si e Qeueli, sa tuna koreo Maki.

¹⁶Arini sari na koimata, saripu garuni e Mosese pude la dogoria sa popoa. Sa pozapoza Hosea, sa tuna koreo e Nani, si hobe nia pozapoza Zosua e Mosese.

¹⁷Sipu garunu taloani Mosese, si tozini sa si arini, “Mi taluarae tani, mamu ene hola la gua pa korapana sa popoa qega meke ene hola la tu pa kali la koari na vasina toqetoqeredi.

¹⁸Mamu la vilitia sapu veguguana sa popoa asa, ve sokudi gua sari na tinoni pu koa vasina, meke vea ṉiṉira gua si arini.

¹⁹Mamu la dogoria be leana babe kaleana sa popoa, koa pa bara patu ululudi sari na tinoni pa vasileana babe lokari?

²⁰Mamu la vilitia be guana masuruna sa pepeso, babe koa ia na hudahuda sa popoa. Lopu muliṉi nia, mamu paleke pule maeni kaiqa vua huda saripu toqolo vasina.” Koasa totoso asa si podalae komiha sari na vua qurepi.

²¹Ke podalae ene sage la vilitia rini sa popoa, meke la gua koasa soloso qega ta pozae Zini pa kalina mae, meke kamo la gua pa Rehobi, sapu tata koasa karovoana pa toqere sapu ta pozae Hamati.

²²Kekenu si la paki si arini, koasa kukuruna sa popoa qega kalina mae ta pozae Neqevi d, meke kamo la pa vasileana Heboroni, vasina pu koa sari na butubutu tadi Ahimani, e Sesai meke se Talamai, saripu tuti malivi, pu ta pozae Anaki. Ka zuapa vuahenina sipu lopu ele ta kuri gua sa vasileana lavata Zoani pa popoa Izipi, si ta kuri sa vasileana Heboroni.

²³Sipu mae kamoa rini sa lolomo pa Esikolo, si maho vagia rini si keke kata qurepi, sapu mamata hola, ke sopele nia huda rini, meke vari paleke nia ri karua tie. Kaiqa pomeqaraneti na piqi tugo, si paleki rini.

²⁴Poza nia Esikolo rini sa lolomo asa, sina sa kata qurepi si maho vagia ri na tie Izireli vasina.

²⁵Sipu hola ka made ṉavulu puta rane piko nia rini sa popoa Kenani, si pule sari ka manege rua tie piko.

²⁶Kamo pule mae koe Mosese e Eroni meke koasa butubutu Izireli pa popoa Kadesi pa korapa qega pa Parani si arini. Meke vasina si tozi vurani rini koari karua meke koari na butubutu Izireli sa inavosona sa popoa, meke va dogoroni tugo rini koarini sari na vuadi rina linetelete koasa popoa sana.

²⁷Meke zama guahe si arini koe Mosese: “Ele kamoa gami sa popoa sapu garununi gami goi, meke masuru hola sa pepeso, meke hire sari na vua huda koasa popoa.

²⁸Ba sari na tiena sa popoa si ṉiṉira hola, meke noma hola sa popoa meke sari na vasileana si ta bara valeana tugo si arini. Ba sapu kaleana hola si dogori gami sari kaiqa tie saripu tututi gore mae guadi koari na tie Anaki si koadia tugo vasina.

²⁹Sari na tie Amaleki si koa koasa popoa Neqevi, meke sari na tinoni pa Hitaiti, Zebusaiti, meke Amoraiti, si koa koari na vasidi toqetoqeredi, meke sa butubutu Kenani si koa pa raratana meke taqelena tugo sa Ovuku Zodani,” gua si arini.

³⁰Ba zama va mokomokoi e Kelebi sari na tie saripu zamazama sisigiti la koe Mosese, meke zama guahe si asa, “Aria mada la vagia sa popoa, kote boka va kilasi mo gita si arini,” gua si asa.

³¹Ba zama sari na tie piko saripu luli koasa, “Lopu kaqu boka va kilasi gita sari na tie arini, sina ṉiṉira holani gita rini si gita,” gua si arini.

³²Meke ene betoa sa inavoso kokohana sa doduruna sa butubutu Izireli, koasa guguana sa popoa sapu ele piko nia rini. Meke zama si arini, “Sa popoa si va mate betoi saripu hiva koa vasina, meke sari na tinoni pu koadi vasina si ululudi hola.