Ni Gi 25:1-10

¹Na tahuna e huriki a Israel ri made na maloku ne Sitim, lakea e huriki a bakovi o Israel ri tubu ni rata a narona molenga turane huriki a ngatavine o Moab.

²Re huriki a ngatavine nga ri gale e huriki a bakovi o Israel ri gi rata a nihabi i lakea na maka vure ne ria, ri lokovonga ne huriki a Moab ri kani turane ria, ri turume na ngalana vure ne ria.

³Lakea e huriki a Israel ri rihi a vure e Bal o Peor, lakea e BAKOVI DAGI i tahate ria.

⁴Muri e BAKOVI DAGI i takia e Moses, i ta maea, “O turari lobo e huriki a matakari ne mua e huriki a Israel, ra ri rata a naro hale, o vakatavore ria, o rabalaki ria na matane BAKOVI DAGI na haro. Bara mu rata mavonga ge lobo a rongova nau ne huriki a Israel.”

⁵Lakea e Moses i taki e huriki a mari ni pelekado ne Israel i ta maea, “Mua takutaku mu rabalaki lobo e huriki na kabu ne mua ra ri rihi e Bal o Peor.”

⁶Na tahuna e Moses turane huriki a bakovi a ngatavine ri tangi tabukoi na matana Kape na Vaponga, ri masia tara bakovi o Israel i bolea tara ngatavine o Midian i dili turana na kape vona.

⁷Na tahuna e Pinias, e tune Eleasar e tubune Aron a prister, i matai rua, i pe e huriki a bakovi a ngatavine, i vano i bole a maheto vona,

⁸i muri mai rua i dili na kape na bakovi iea, i paditata rua na maheto ru mate. Muri i lobo a gilanga dagi, ra i ratapile e huriki a Israel.

⁹E huriki ala 24,000 ri mate.

¹⁰Lakea e BAKOVI DAGI i takia e Moses i ta maea,