Ni Gi 21:4-13

⁴E huriki a Israel ri pe mulea a lolo e Hor, ri ramai a dala dagi i lakea na Dari Vururu, na tabeke ne Akaba, a vuhuna ri ngaru ni polo gege vona a robo ne huriki a Idom. Ri laho laho, ri kide tala.

⁵Ri tapuhaki na Vure ne Moses ri ta maea, “I navai muru tuli tala mia o Egipto mi gi mate tavula koea na tabeke i ngeki? I uka maki ni kani koea! I uka naru! Mi marikoi vona ra mana mi kani balea, i uka ma a maki ni kani muholi.”

⁶E BAKOVI DAGI i longo a nitapuhaki ne ria, lakea i rudu a maka mata hale ri valai ne huriki a Israel ri kanipile ria, lakea i kupo ri mate.

⁷E huriki a bakovi a ngatavine ri valai ne Moses ri ta maea, “Mi rata a naro hale pali ne BAKOVI DAGI na tahuna mi tapuhaki ne marua e BAKOVI DAGI. Ngane o vasileki ne BAKOVI DAGI ge lili vuroki a maka mata nga.” Lakea e Moses i vasileki ne ria.

⁸E BAKOVI DAGI i longoa a nivasileki ne Moses lakea i takia, “O ratea tara hanuna mata hale o vakatavorea na kai ge ola. E rei a viri i kani ia a mata, ge mata rike maia bara i mahuri.”

⁹Lakea e Moses i ratea na bras tara hanuna mata i vakatavorea na kai i ola. Na tahuna a mata hale i kani ria, bara ri mata rike maia, bara ri mahuri.

¹⁰E Huriki a Israel ri pea a lolo e Hor ri laho lokovonga ri bele na tanga e Obot, ri rata a mada.

¹¹Muri ri pea e Obot ri vano ri bele na tanga e Abarim, ri rata a mada. Ra tanga e Abarim i pesi na nirikena haro na robo e Moab, na tabeke i ngeki.

¹²Muri ri pea a hini nga, ri vano ri rata a mada na maloku ne Sered.

¹³Muri ri pea e Sered ri tulu poloa a naru e Arnon, ri rata a mada na tabeke mule sike na naru e Arnon, na tabeke i ngeki. Ra tabeke i ngeki iea i dili na robo ne huriki a Amor. Ra naru e Arnon i nagi a robo e Moab e Amor.