Ni Gi 16:18-50

¹⁸Na hatelanga e huriki a bakovi nga ri bole takutaku a pelete na havu mangisipa, ri pesi turane Moses e Aron na matana Kape na Vaponga.

¹⁹Muri e Kora i vakalipopo e huriki ri pesi tabukoi na matana Kape na Vaponga, ri mata lakea ne Moses e Aron. Na tahuna ri vapopo, e BAKOVI DAGI i ratea a bagetua vona i bele kavakava i masia e huriki.

²⁰Lakea e BAKOVI DAGI i taki e Moses e Aron i ta maea,

²¹“Muru malele ha ne huriki a bakovi a ngatavine nga. Ngane kunana ga rabalaki ria.”

²²Pali e Moses e Aron ru tabuli ngalabarara na malala, ru takia e BAKOVI DAGI ru ta maea, “Vure, ioe kunana o rata e huriki a bakovi a ngatavine ri made. I navai i madihi a hatemu ne huriki nga na naro hale na bakovi ala taku i ratea?”

²³Lakea e BAKOVI DAGI i takia e Moses,

²⁴“O taki e huriki ri gi malele ha vona a kape ne Kora, ne Datan, ne Abiram ri gi pesi basi popote.”

²⁵Lakea e Moses i vano i matai e Datan e Abiram, e huriki a gare ne Israel ri ramaia.

²⁶Lakea e Moses i taki e huriki a bakovi a ngatavine i ta maea, “Mu karuku mule na kape na bakovi hale nga. Naha ni padoi ranga maki ne tou, ma mu gu vurua turane tou na naro hale ne tou.”

²⁷Lakea ri malele ha na kape ne Kora, ne Datan, ne Abirama. Pali e Datan, e Abiram ru pagitala ru pesi na matana kape ne rua, turane girihine rua, e tune rua.

²⁸Lakea e Moses i taki e huriki i ta maea, “Ngane bara mu masia tara maki ge bele, bara mu lohoka vona, e BAKOVI DAGI kunana i rudu iau ga matakari mua, ga rata a leho vona. Iau i uka ma a rata leho na ni ngaru nau.

²⁹Na tahuna e huriki nga bara ri mate manga kunana e huriki ri mate pali, bara mu lohoka vona e BAKOVI DAGI i uka ma i rudu iau.

³⁰Pali e BAKOVI DAGI ge rata rikea a naro karaba tara, a malala ge mapoka, ge ngavapanganga, lakea e huriki ri boru dili na lovo turana a maka maki ne ria, ri puru na murine huriki ri mate pali, na tahuna ri tabana ni mahuri, bara mu lohoka vona re huriki nga ri ngalahere ne BAKOVI DAGI.”

³¹E Moses i ta lobo, i malaviriri kunana a malala i pesi vona e Datan e Abiram i mapoka, i vakabele a lovo dagi.

³²Lakea a malala i ngavapanganga, i todoa e Kora turana a tara vona, a kape ne ria, a maka maki ne ria.

³³Ri tabana ni mahuri ri boru puru na murine huriki ri mate pali turana a maka maki ne ria. A malala i makapirubu tabu, i uka ma ni matai ria tabu.

³⁴Na tahuna ri boru puru ri gale dagi hateka. Lakea e huriki a bakovi a ngatavine o Israel ri pesi tabukoi ri ta maea, “Si gi ha malaviriri, ma ge mapoka a malala ge todo hita!”

³⁵E BAKOVI DAGI i rudua a kanono, i valai i gutu parina e huriki a bakovi ala 250, ra ri rata a nihabi na havu mangisipa.

³⁶Muri e BAKOVI DAGI i takia e Moses i ta maea,

³⁷“O takia e Eleasar e tune Aron a prister, ge bole a maka pelete ne huriki ri nono na kanono, ge voro viliha basi a katona kanono i tabuli ne ria. Ge rata mavonga, a vuhuna a pelete nga a taba.

³⁸Ra maka pelete ne huriki a bakovi ri mate a taba, a vuhuna ri valai na matagu ri rata a nihabi na havu mangisipa. O tutu a pelete nga ge kabela, o naviri a dede vona, ge manga a kilakila na matane huriki a Israel.”

³⁹E Moses i takia e Eleasar, a prister i bole a pelete nga, i habi ne huriki a mari ri tutu kamumu a maki ge kabela, ne vona ni naviri a dede

⁴⁰Ra maki ni tutu i kabela ni kavitagu a dede vona, ge habi a niluhoi dagi ne huriki a Israel. Ri gi lohoka vona e huriki a tara ne Aron kunana ri gi lakea tabukoi na dede, ne vona ni habi a havu mangisipa na matane BAKOVI DAGI. E rei a bakovi tara i ratea a nihabi iea, e BAKOVI DAGI bara i ratapilea, i manga a hini i ratapile e Kora turana a tara vona. Lakea e Eleasar i rata a maka maki e BAKOVI DAGI i taki e Moses vona.

⁴¹Na parava muri, e huriki lobo ri tapuhaki ne Moses e Aron, ri ta maea, “Muru rabalaki pali ranga e huriki a tara ne BAKOVI DAGI.”

⁴²Na tahuna e huriki lobo ri vapopo ri tahate e Moses e Aron, ri mata lakea na Kape na Vaponga. Ri masia a bubu i kavitagua a kape, a bagetua dagi ne BAKOVI DAGI i bele kavakava.

⁴³E Moses e Aron ru vano ru pesi na matana Kape na Vaponga.

⁴⁴Lakea e BAKOVI DAGI i takia e Moses,

⁴⁵“Muru pesi ha. Muru vano muru pesi basi popote ne huriki a bakovi a ngatavine, bara ratapile ria malaviriri kunana. Ru longoa a ngava iea, ru ngalabarara puru na malala.”

⁴⁶Lakea e Moses i takia e Aron, “O bole a pelete na havu mangisipa, o bole na dede a katona kanono o rua na pelete vomu. O bole lakea malaviriri ne huriki a bakovi a ngatavine, o rata a nihabi ge kavitagu ria na rongova na Vure, a vuhuna e BAKOVI DAGI i madihi a hatena ne ria, i vakabele a gilanga dagi ne ria pali.”

⁴⁷Lakea e Aron i muri mai a nitane Moses. I bole a pelete ne vona ni rata a nihabi na havu mangisipa, i nunu lakea ne huriki a bakovi a ngatavine ri vapopo. I masia a gilanga hale i bele pali ne ria. Lakea e Aron i ratea a nihabi na havu mangisipa, ne vona ni kavitagu ria.

⁴⁸Lakea e Aron i pesi na kurukurune huriki ri mate pali, e huriki ri mahuri, i rata a nihabi. Muri a gilanga iea i lobo.

⁴⁹Pali e huriki ri mate vona a gilanga iea i 14,700. E huriki ri mate turane Kora, i uka ma ni gi turane ria.

⁵⁰Na tahuna a gilanga i lobo, e Aron i hamule mai e Moses na matana Kape na Vaponga.