Ni Gi 12:4-11

⁴Na tahuna ru ta lobo, e BAKOVI DAGI i malaviriri kunana i taki e Moses, e Aron, e Miriam i ta maea, “Moto valai na Kape na Vaponga.” Lakea to malaga to vano.

⁵Lakea e BAKOVI DAGI i puru valai na bubu i pesi na matana kape, i gale tala i ta maea, “O Aron, o Miriam muru valai.” Ru longo, ru karuku lokovonga popote.

⁶Lakea e BAKOVI DAGI i ta maea, “Muru longoa a nitagu. Na tahuna a propet tara i made turane mua a Israel, iau e BAKOVI DAGI a vakasiri iau vona na vurena, a habi a ngava nau na vurena.

⁷Pali a vora nau e Moses i uka ma i manga e huriki a propet ranga. A naro a ratea vona i tebi. A habi lobo vona a maka leho nau, a lohoka vona bara i rata.

⁸I mavonga, a ta turana i manga a bakovi i ta turana e turana. A ta kavakava vona, i uka ma ta vakakika. Ia tara i matai iau. Pali i navai i uka ma muru mangenge ni harogi e Moses, a vora nau?”

⁹E BAKOVI DAGI i tahate hateka ne rua, muri i pe rua i vano.

¹⁰A bubu ne BAKOVI DAGI i pe a kape, i malaviriri kunana a gilanga na patala i kavitagua a kuline Miriam, i kea hateka a kulina manga a kamagi. Muri e Aron i matagege, i masia a gilanga hale i kavitagua a kuline Miriam.

¹¹Lakea e Aron i takia e Moses i ta maea, “Bakovi dagi, maria miri manga, miri rata a naro hale. O dodo maria, naha ni rata maria miri gi bolea a maregoa na naro hale ne maria.