Ni Gi 11:10-29

¹⁰E huriki a bakovi, a ngatavine ri pesi turana a kabu ne ria na matana kape, ri tangi hateka, i longo ria e Moses. Lakea e BAKOVI DAGI i madihi hateka a hatena ne ria, pali e Moses i luhoi lege.

¹¹Lakea i takia e BAKOVI DAGI i ta maea, “I navai o rata hale iau? I navai i uka ma o vivi nau? I navai o habi kikeri a leho nau ga matakari e huriki nga?

¹²Iau i uka ma vakabele ria na tamudine kinane ria. Iau i uka ma iau e kinane ria ga poda ria. Pali i navai o taki iau ga leho manga a tagari, ga boko ria manga a koma kiroko na limagu, i vakatubu o Egipto i lakea liu na malala o ta muholi vona go habia ne huriki a gare ne ria?

¹³Re huriki a bakovi a ngatavine ri tangi ri nana iau na kania. Pali ga bole vai a maka kania ge kupo? Iau i uka ma kara ni matakana a kania ne ria.

¹⁴Iau kikeri kunana i uka ma kara ni matakari e huriki nga. I uka ma kara ni matakari ria.

¹⁵Ioe o ngaru ni rata maea iau, i kamumu hateka o dodo iau o rabalaki liu iau, i uka ma ga leho hateka tabu ga bole a maregoa nga.”

¹⁶Lakea e BAKOVI DAGI i takia e Moses i ta maea, “O gale a gare ala ravulu polorua ri gi valai nau. O tuli kunana e huriki a bakovi o lohoka ne ria, ri lohoka ni matakari. O tuli valai ria koea na Kape na Vaponga, ri gi vapopo turagu, ri gi pesi turamu.

¹⁷Ga puru valai ga ta turamu vonga. Ga bole ranga nitora na hanugu i tabuli pali vomu, ga habi ne ria. Ri gi tuhori ioe, ri gi bole a maregoa ne huriki a bakovi, a ngatavine, i uka ma ge ioe kunana go bole lobo.

¹⁸“Ngane o taki e huriki o ta maea, ‘Mu ramaia a naro ge rata mua mu gu matapado na matana Vure. Mu kisi puru mua, kuduvi bara mu kani a kania. E BAKOVI DAGI i longo mua mu deke hateka na kania. I longo mua, mu taki mua ta mu made kamumu o Egipto. Mu longo. Ngane e BAKOVI DAGI ge habi a kania ne mua mu kani.

¹⁹I uka ma mu gu kani na parava ge taku, o ga parava ge rua, o ga parava ge lima, o ga parava ge ravulu, o ga parava ge ravulu rua. I uka.

²⁰Bara mu kani a kania na keva i taku, muri bara mu kide tala ni kani a kania bara mu ngaru ni muta. E BAKOVI DAGI i made na kurukurune mua, pali mu ngalahere mu deke lakea vona mu ta maea, “I navai mi pe a robo e Egipto mi valai?” ’”

²¹Pali e Moses i koli i ta maea, “BAKOVI DAGI, o longo. Iau a made turane huriki a bakovi ri ala 600,000, lakea o taki ta go habi a kania ne ria na keva i taku. Go matakana a kania vai go habi ne ria?

²²Bara mi rabalaki lobo a maka bulmakau, a sipsip, pali ra maka sipsip, a bulmakau nga i uka ma ge kara ria, a manu lobo na dari ranga i uka ma ge kara ria.”

²³E BAKOVI DAGI i koli e Moses i ta maea, “O luhoi navai, o luhoi a nitora nau i uka ma i kara? I uka ma ge tabaka bara o matai. Bara o lohoka vona a maki a ta vona ge bele o ge i uka.”

²⁴E Moses i longo, muri i pagitala i taki e huriki vona a ngava e BAKOVI DAGI i takia. I tagui e huriki a gare ri ala ravulu polorua, i taki ria ri gi pesi halui a kape.

²⁵Muri e BAKOVI DAGI i puru valai na bubu iea, i ta turane Moses. Lakea e BAKOVI DAGI i bole a nitora na hanuna, ra i habi muga ne Moses i habi ne huriki a gare ala ravulu polorua. Na tahuna a hanuna i valai i made turane ria, popote kunana ri vakalongo a nita propet, pali i uka ma ri rata lokovonga liu.

²⁶Pali a gare ala rua, e Eldat, e Medad, i uka ma ru lakea na kape turane huriki ranga. Ru tababana ni made na mada ne BAKOVI DAGI. Pali e BAKOVI DAGI i habia ne rua a hanuna ru ta propet na mada.

²⁷Muri a riau tara i nunu lakea ne Moses i ta maea, “E Eldat, e Medad ra ru made na mada, ru rata a nita propet.”

²⁸E Iosua, e tune Nun, a bolekori ne Moses, i leho turana na tahuna i riau vona, i valai i harena mona. E Iosua i longo a nitana riau, lakea i takia e Moses i ta maea, “Bakovi dagi nau, o vano o taki rua naha ru gu ta.”

²⁹Pali e Moses i koli a ngava i ta maea, “O luhoi ge kuloi iau ranga bakovi? Naha ni loho lege lae? Iau a ngaru e BAKOVI DAGI ge habi a hanuna ne huriki a bakovi a ngatavine lobo, ri gi rata a nita propet.”