Ni Gi 10:8-30

⁸E huriki e tune Aron kunana, re huriki a prister, ri gi vaki a tavure. Mua turane huriki a hamone mua mu ramaia ra vinara iea vakaroro.

⁹Na tahuna e huriki a pile ri gi bele ri gi vaubi ne mua na malala ne mua, mu vaki a tavure ge malaga e huriki ri gi vaubi ne ria. Mua bara mu rata mavonga, ngane iau e BAKOVI DAGI a Vure ne mua, bara luhoi mua, a korimule mua ne huriki a pile.

¹⁰Na maka parava dagi ni vasileki, i manga na keva karaba o na maka parava dagi ranga, mu vaki a tavure na tahuna mu rata a nihabi gutu-vuro, a nihabi na nivalemu. Bara luhoi mua, a tuhori mua. Iau e BAKOVI DAGI a Vure ne mua, a ta pali.

¹¹Ne ravulu ruana parava (20th) na ruana keva na ruana pida, muri ne huriki a Israel ri pe e Egipto, a bubu i pe a kape na Ngava Dagi, i vano.

¹²Lakea e huriki a Israel, ri malaga ri pe mulea a malala golea ne Sinai, ri laho lokovonga. A bubu i vano i pesi na malala golea ne Paran.

¹³E BAKOVI DAGI i habi taro a nita ne Moses, muri e Moses i taki e huriki a Israel ri malaga ri laho lokovonga.

¹⁴A mada tara ne Iuda, ne Isikar, ne Sebulun ri muga. Ri vapida na tara ne ria, ri nugu a kilakila ne ria, ri laho lokovonga. E Nason e tune Aminadab i matakaria a kabu nga.

¹⁵E Nataniel e tune Suar i matakari e huriki a Isikar.

¹⁶E Eliab e tune Helon i matakari e huriki a Sebulun.

¹⁷E huriki e tune Gerson, e huriki e tune Merari na kabu ne Levi, ri muri mai ra tara nga. Ri pukea a kape na Mailo na Vure, ri bole a mahalana kape ri kaloho lokovonga.

¹⁸Muri e huriki na mada tara ne Reuben, ne Simion, ne Gad ri vapida na maka tara kiroko, ri bole a kilakila ne ria, ri malaga ri vano. E Elisur e tune Sedeur bakovi i matakari lobo ra tara nga i tolu.

¹⁹E Selumiel e tune Surisadai i matakari e huriki a tara ne Simion.

²⁰E Eliasap e tune Deuel i matakari e huriki a tara ne Gad.

²¹Muri e huriki a Kohat na kabu ne Levi ri kaloho a maka mahalana Mailo na Vure ni gamai, ri malaga ri vano. Na tahuna e huriki a Kohat ri bele na murina mada karaba, a kabu ne Levi ranga ri muga ri vakapesia pali a kape na Mailo na Vure. Na tahuna a tara ne Kohat ri bele, ri habi ne huriki a prister a maka maki ri kaloho, ri ru dili na kape.

²²Muri a mada tara ne Epraim, ne Manase, ne Bensamin ri vapida na maka tara kiroko ri nugu a kilakila ne ria, ri malaga ri vano. E Elisama e tune Amihud i matakari ra tara nga i tolu.

²³E Gamaliel e tune Pedasur i matakaria a kabu ne Manase.

²⁴E Abidana e tune Gideoni i matakaria a kabu ne Bensamin.

²⁵A iku na mada tara ne Dan, ne Aser, ne Naptali ri tagari a tabeke muri. Ri vapida na maka tara kiroko, ri nugu a kilakila ne ria, ri malaga ri vano. E Ahieser e tune Amisadai i matakari ra tara nga i tolu.

²⁶E Pagiel e tune Okran i matakaria a kabu ne Aser.

²⁷E Ahira e tune Enan i matakaria a kabu ne Naptali.

²⁸Na tahuna e huriki a Israel bara ri malaga ri pea a mada, bara ri laho palupu maea kunana ri vano.

²⁹Lakea e Moses i takia e lavona, e Hobab, e tune Ietro a bakovi na robo e Midian, i ta maea, “Ngane mi gi malaga mi gi laho maia a robo tara e BAKOVI DAGI i taki ge habia ne mia. I ta muholi pali ta mi gi made kamumu hateka vona a robo iea. Ioe o ngaru o valai turane mia, ga veru ga habi vomu a maka maki kamumu ge kupo.”

³⁰Pali e Hobab i koli i ta maea, “I uka, ga hamule na tanga nau, na kabu nau.”