Ni been ree apóstoles 8:18-34

¹⁸Chi baguiaa Simón cayu xSprijt Dios luxdoo ree bén guin guial caxhoob yaa ree apóstoles guin guijc reeman, dxel guyënman nudëëman milia loj reeman,

¹⁹rëbaman: ―Në lon gol banee guialrniabee guin din chi gaxhob yan chutëëz guijc bénan, në luxdooman chuꞌ xSprijt Dios.

²⁰Dxel badxiꞌ Bëd xtiidxaman rëbaman: ―Nitil con guidib xmilial, din rüjnl xgab guial zajc siil guialrniabee razaladx Dios.

²¹Ad rayalt ad zajc tëët güünl ziꞌc raguieenan, din niꞌquid zinaltil xnejz Dios.

²²Bayüjn xgab por ni mal beenl, gurejdx gunab tëë Dios, rupent güünman lüj perdon por ree xixgabmalil,

²³din ragbeen ganax guialralen yuꞌ luxdool, abiꞌ dol guin na̱j ni rniabee lüj.

²⁴Dxel badxiꞌ Simón xtiidxaman, rëbaman: ―Gol gurejdx gunab Dios por naj, chitëë gazaꞌcan niꞌqui tijb ni ma nadi.

²⁵Chi gulox gunee ree apóstoles guin xtiidx Dios loj ree bén guin, dxel badxin reeman Jerusalén, abiꞌ graczi ree guiedx rigaꞌ niz Samaria lod gudëd reeman gutieꞌch reeman xtiidxzaꞌc Jesucrist.

²⁶Chi ma gudëd gojc zian, gunee tijb xi anjl Dios Felip rëbaman: ―Wej niz sur nejz ni zë Jerusalén xt lod la Gaza, niz lod na̱j ganax yujbidx.

²⁷Dxel brii Felip zëman. Runejz guin banaazaman tijb bén Etiopía, najman bén zojbloj guial laaman rguꞌchaaw xmilia Candace, bén na̱j reina Etiopía. Wejman Jerusalén bignajchiꞌman Dios,

²⁸abiꞌ ma bayunejzaman zia ladxaman, zojb lën xcarrejt zagdxeman, roolaman loj guiꞌch ni bacaa Isaías, bén badëëd xtiidx Dios loj ree bejn.

²⁹Dxel rëb xSprijt Dios loj Felip: ―Bibig gajxh cwëꞌ carrejt guin.

³⁰Chi bibigaman, biguiejnman cayool bén guin loj guiꞌch bacaa Isaías. Dxel gunabdiidxaman lojman rëbaman: ―Dad, ¿rigniaꞌl ni cayoolil ya?

³¹Badxiꞌ bén guinan rëbaman: ―¿Xoza chigniaꞌnan? Awa achut gusigniaꞌ naj. Dxel rëbaman loj Felip din chëꞌpaman loj carrejt guin, cweman cwëꞌman.

³²Loj xtiidx Dios lod cayool bén guin rëban: Ziꞌc rinë reeman tijb xiil, binë reeman laaman lod gugüjt reeman laaman. Abiꞌ achet rëbaman, ziꞌc tijb xiil ma zaꞌ loj ree bén gugaj guidxladib.

³³Chi beennë reeman laaman ziꞌctzi rën reeman, achut been guialguxtis por laaman. Yan achut guzaꞌt xdiaaman, din ma bisüd reeman laaman loj guidxliuj.

³⁴Rëb bén guin loj Felip: ―Guna sii, ¿chu xcwent rniee bén bacaa diidx guie ree? ¿Xcwent gajcaman ya o xcwent ben renan?