Ni been ree apóstoles 5:8-36

⁸Dxel gunabdiidx Bëd lojman rëbaman: ―Guna, ¿batoꞌ xguidxliujdi ziꞌc na lacheelil ya? Abiꞌ rëbaman: ―An, zianqui batoꞌnan.

⁹Dxel rëb Bëd lojman: ―¿Chexc zeel bayaꞌndi diidx persi nuyëndi nusquieedi xSprijt Dios? Laa ree xin biquieꞌch lacheelil ziaad ni, yan nëgajc lüj chiquieꞌch reex.

¹⁰Loj hor zii gajc biajb Safira lod zaꞌ Bëd, abiꞌ güjtaman. Chi bayu ree xin guin baguiaa reex ma güjtaman, dxel bales reex laaman biquieꞌch reex laaman cwëꞌ lacheelaman.

¹¹Graczi ree bén rliladx Jesucrist në gra ree bén gogbee ni goc, dád bidxeb reeman.

¹²Zien ree milagr naroob been ree apóstoles guin loj ree bejn. Graczi ree bén rliladx Jesucrist radxajg lasaꞌ roꞌ curdur lod rniee reeman xcurdur Salomón.

¹³Zagdxe ruzaꞌt ree bén luguiedx guin laa reeman, per ad rayaxt reeman guchajg reeman laa reeman.

¹⁴Abiꞌ guixie guixie cayajcxhiej ree bén rliladx Dad Jesús, ziꞌc xinguiaaw ziꞌc béngunaa.

¹⁵Xt rbëë reeman bénragxuu ree lunejz, rguijxh reeman laa reeman loj ree loon në loj ree da, din chi tëd Bëd, majsi xbalazaman tëd guijc reeman.

¹⁶Në ree bén zojb guiedx rigaꞌ ree gajxh Jerusalén, zien reeman bidxin Jerusalén, bidxinnë reeman bénragxuu ree në ree bén yuꞌ xindxab luxdoo, abiꞌ graczi reeman bayajc.

¹⁷Bixhioz mazri zojbloj rniabee graczi ree bixhioz në ree bénsaducew zaꞌnë laaman, guyu guialnadëdloj luxdoo reeman,

¹⁸abiꞌ gunabee reeman biniaaz ree apóstoles guin persi badxeꞌ reeman laa reeman ladxguiib.

¹⁹Per guxhin zii tijb xi anjl Dios guxhal roꞌ ree xport ladxguiib guin, abiꞌ babëëman laa reeman, rëbaman:

²⁰―Gol chej lën yadooroꞌ, gol biguiedx loj ree bejn xhie naag gap reeman guialnaban tiblayaa con Dios.

²¹Chi biguiejn reeman ni rëb anjl guin, bareguiaal rsildoo wej reeman lën yadoo guin, guzuloj culüü reeman bejn ree xtiidx Dios. Guiáad bixhioz zojbloj guin con ree bén zaꞌnë laaman, batoꞌp reeman guxtis con gra ree bengol Israel. Abiꞌ gunabee reeman suldad ree din chicaꞌ reex apóstoles guin ree lën ladxguiib guin.

²²Per chi bidxin reex roꞌ ladxguiib guin, achutri ree apóstoles guin ree yuꞌ. Dxel bicojn reex guxtis guin ree,

²³rëb reex: ―Chi badxinan, baguiaan nayaaw roꞌ ladxguiib guin zagdxe, laa ree suldad rajp roꞌ ladxguiib guin zaꞌ, per chi baxhalan, achutczi yuꞌ lënan.

²⁴Dxel bixhioz zojbloj guin con suldad rniabee ree suldad rniaj roꞌ yadoo guin, con ree bixhioz rniabee ree bixhioz, chi biguiejn reeman zian, guzuloj rëb loj lasaꞌ reeman, ¿ban xt guin chigdiblagaa ree ni guie?

²⁵Loj hor zii gajc bidxin tijb xin rëb loj reeman: ―Laa ree bén badxeꞌdi ladxguiib yuꞌ lën yadoo culüü reeman bejn ree.

²⁶Dxel wej suldad rniabee guin con ree xsuldadix bicaꞌ reex apóstoles guin ree, per ad beennaat reex laa reeman guial rdxeb reex gucaaguiaj ree bejn laa reex.

²⁷Chi badxinnë reex laa reeman, bayü reex laa reeman loj guxtis. Dxel rëb bixhioz zojbloj guin loj reeman:

²⁸―¿Nid ranan ya guial ad zajctri gulüüdi bejn ree xtiidx Jesús? Abiꞌ yan graczi loj ree bén Jerusalén ma gutieꞌchidi xtiidxix, nëtëë yan rëndi gudxiibidi du guijcan guial dunujn bagüjt laax.

²⁹Abiꞌ badxiꞌ Bëdan në gra ree apóstoles guin, rëb reeman: ―Rayal yazooban xtiidx Dios luar yazooban xtiidx ree bénguidxliuj.

³⁰XDios dux béngulal ree basban Jesús, bén bacaadi loj crüjz.

³¹Abiꞌ nüjn Dios laaman bén zojbloj, nabeꞌcaman laaman xladbeeman, laaman na̱j bén rniabee rabëë tëëman bejn ree loj xtol reeman, abiꞌ zian guxhalaman nejz par ree bén Israel din cwëëladx xtol reeman yadxiꞌ tëë loj reeman loj Dios din güünman laa reeman perdon.

³²Dunujn në xSprijt Dios bén rudëëman loj ree bén ruzoob xtiidxaman, rayagbeen guial gra ree ni guin na̱j diidxli.

³³Chi biguiejn ree guxtis guin ni rëb reeman, dád balen reeman abiꞌ guyën reeman nugüjt reeman laa reeman.

³⁴Per loj ree guxtis guin noꞌch tijb bénfarisew laman Gamaliel, najman mextr rulüü ley abiꞌ graczi ree bejn rajp laaman respejt. Guzuliman abiꞌ gunabeeman barii ree apóstoles guin xchu tibrajt.

³⁵Dxel rëbaman loj ree guxtis guin: ―Bén Israel, gol been xgab xhienin güünnëdi bén guin ree.

³⁶Gol basaaladx, guyu tijb xin brii laj Teudas, rëbix yuꞌ chu najx abiꞌ cost tajp gayuu ree bejn binal laax. Per chi bagüjt ree bejn laax, bireꞌch gra ree bén binal laax, yagaj gulox gra ni beenx.