Ni been ree apóstoles 2:11-43

¹¹Në ree bén zëëd niz Creta nëtëë ree bén zëëd guiedx rigaꞌ ree niz Arabia noꞌch du loj ree. ¡Per dugraczi ree caycaagdiajg con dux tiidx ree nizaꞌcdxoon rüjn Dios!

¹²Graczi reeman badxa daꞌt loj xt niꞌquid badxejlt xgab nüjn reeman, abiꞌ guzuloj canabdiidx loj lasaꞌ reeman rëb reeman: ―¿Xhie rën guiëb gra ni guie?

¹³Per garol reeman bazeꞌ laa reeman, rëb reeman: ―Rëꞌ reeman.

¹⁴Dxel guzuli Bëd con zachibtib ree apóstoles guin, guneeman rejs rëbaman: ―Lëjt bén Judea në graczi ree bén zojb Jerusalén, gol bacaagdiajg gol bigniaꞌ tëë ni ganin.

¹⁵Ad rëꞌt ree bén guin ziꞌc naladxidi, din qui gojlri raca gaa rsil.

¹⁶Guie cayajc cumplid ni gunee bén brii laj Joel, bén badëë xtiidx Dios loj ree bejn, chi rëbaman:

¹⁷Na Dios, guidxin dxej gaxhal da Sprijtan luxdoo gra ree bejn, abiꞌ xiꞌndi xinguiaaw con biingunaa gudëëd reex da diidxan, zien ree ni gulüüloj loj ree xinguiag, guiáad ree bengol zien ree ni guinieꞌxchaal reeman.

¹⁸Dxej zii ree gaxhal da Sprijtan luxdoo ree bén rüjn da dxiinan, xinguiaaw ree në ree béngunaa, abiꞌ gudëëd reeman da diidxan.

¹⁹Gulün sen ree xanyabaa ni yadxa lojdi, guiáad loj guidxliuj gulün sen ree ziꞌc rejn në bajl nëtëë goꞌxh.

²⁰Guicajy loj gubijdx, guiáad bëëw yayajcan ziꞌc rejn. Chi ma gojc zian, dxel guidxin quijb dxej guin, dxej zaꞌcdxoon guiꞌt Dios bén rniabee, dxej guiguien guidib xbianiman.

²¹Abiꞌ graczi ree bén cwedx guiniab laaman güünman laa reeman perdon.

²²Rëb tëë Bëd loj reeman: ―Yan, gol bacaagdiajg ni ganin lëjt bén Israel: Lëjt ragbee guial Jesús bén Nazaret najman bén guxhaal Dios, been tëëman milagr ree në ree ni radxa loj ree bejn ziꞌc sen din gagbeedi guial Dios guxhaal laaman.

²³Diizd gocli mal nüjn Dios xgab guial zian güünnëdi Jesús, gunaazidi laaman bayüdi laaman loj ree benmal, din gugüjt reeman laaman loj crüjz.

²⁴Per basban Dios laaman stijb, babëëman laaman loj guialgüjt, din ad gojct nutëë guialgüjt guin laaman.

²⁵Chi gunee rey Davi xcwent Jesús, rëbaman: Zianczi baguian dux Dad ree Dios zaꞌnëman naj. Zaꞌman da ladbeen, achetczi zajc guchejb naj.

²⁶Zeel yuꞌ luxdon nix, ruzat tëën Dios zagdxe. majsi guiëtan ad rdxebtan,

²⁷din ad zusaꞌntil naj lën baa, ad zatiëjbtil xhin xcuerp xiꞌnl bén naya nali.

²⁸Balüül naj nejz runee guialnaban, chuꞌ tëë luxdon zagdxe guial guibannël naj.

²⁹Basnuu gunee Bëd, rëbaman: ―Ganin loj gradi compniar, diidxliczi dux béngulal ree Davi güjtaman biguieꞌch tëëman, abiꞌ laa xbaaman sta raguiaa ree yan.

³⁰Per gojcaman bén badëë xtiidx Dios loj ree bejn, abiꞌ gogbeeman been Dios promejs guial loj xdiaaman grii Cristo bén nabee.

³¹Rulüü ma cuguiaaman gra ni gac, rëbaman guial yaban Cristo loj ree bengüt, ad zayaꞌntaman lën baa ad zaxin tëët xcuerpaman.

³²Yan ma basban Dios Jesús, dugran nayajc testiw guial walican babanman.

³³Zia tëëman xanyabaa zisobaman xladbee Dios, persi badëë xSprijt Dios lojman ziꞌc ma rëbaman, yan ma guxhaal Jesús Sprijt guin loj guidxliuj, por laaman cayajc ni cuguiaadi caguiejn tëëdi.

³⁴Ad Davitan zia xanyabaa, din laagajcaman rëb: Rëb dux Dad ree Dios loj bén rniabee naj: “Gurej da ladbeen,

³⁵xt gabecan xin rdxeꞌch ree lüj guiaꞌl.”

³⁶’Gradi bén Israel gol gogbee guial Jesús bén bacaadi loj crüjz, Dios bacaabee laaman din gacaman Dad, bén nabee dunuj ree.

³⁷Chi biguiejn ree bén rigaꞌ yagaj ni rëb Bëd, dád guyu naya luxdoo reeman. Abiꞌ gunabdiidx reeman lojman në loj los demazri ree apóstoles guin, rëb reeman: ―Dad, gol guna, ¿xhie rayal yaguieenan?

³⁸Dxel rëb Bëd loj reeman: ―Gol bayagbee xtolidi, gol badxiꞌ tëë lojdi loj Dios, gol gurobnijs por xguialrniabee Jesucrist din gac xtolidi perdon, zian chuꞌ xSprijtaman luxdoodi.

³⁹Din promejs guin na̱j par lëjt në par ree xiꞌndi në par gra ree bén rigaꞌ zijt, par gra ree bén cwe Dios par laaman.

⁴⁰Con ree diidx guie në mazri ree diidx ren guneenë Bëd laa reeman, rëbaman: ―¡Gol bariica loj ree bén rüjn ni mal!

⁴¹Zian gojc, graczi bén bazoob diidx ni rëbaman gurobnijs. Dxej zii gajc bachajg cost choon mil bejn bén rliladx ree Jesús.

⁴²Graczi reeman binal ni balüü ree xi apóstoles Jesús laa reeman, gubajnnë lasaꞌ reeman zagdxe, gurejdx gunab reeman Dios abiꞌ radoꞌp reeman persi raw reeman guiadxtil tijbzi ziꞌc gunabee Jesucrist güün reeman.

⁴³Graczi ree bejn radxa daꞌt loj milagr në los demazri ree ni been ree apóstoles guin.