Ni been ree apóstoles 16:12-37

¹²Yagaj badxoon bioꞌn Filipos, guiedx mazri zojbloj niz Macedonia, per Rom rniabee guiedx zii, ni badxuꞌn bëlzi ree dxej.

¹³Abiꞌ tijb dxej raziiladx ree bejn, bariin luguiedx guin bioꞌn tijb ruguiiwroꞌ, lod rayagbeen radoꞌp ree bén Israel par cwedx reeman Dios. Abiꞌ badxuꞌn baneen xtiidxzaꞌc Jesucrist loj ree béngunaa badoꞌp yagaj.

¹⁴Tijb ree béngunaa guin la Lidia, najman bén Tiatira, rutoꞌman lajd zagdxe ni culor murad. Diidxli rdxebaman Dios abiꞌ cucaagdiajgaman. Dios guxhal xquiarguiejnman din gucaagdiajgaman zagdxe gra ni rëb Pab.

¹⁵Abiꞌ gurobnijsaman con gra xfamilaman. Dxel gunabaman favor du lojn, naman: ―Bal walidi rliladxidi guial ma rliladxan Jesucrist, gol bayaꞌn lidxan. Dxel beenman naguiejn bayaꞌnan lidxaman.

¹⁶Dxel tib volt, chi zioꞌn lod rej ree bejn par cwedx guiniab reeman Dios, badxaaglojn tijb biingunaa, yuꞌ xindxab luxdoom, abiꞌ por xguialrniabee xindxab guin rnieeyaꞌm guiáad ree bén guzii laam dád zroꞌ milia rüjn reeman gan por dxiin guin.

¹⁷Dxel bidnalim Pab con dunujn, rbidxaꞌm rëbim: ―Bén guie ree rüjn xchiin Dios yuꞌ xanyabaa, laa reeman gugojn lëjt xhienaag gaquidi perdon.

¹⁸Zien dxej daꞌt beenm zian, xt chi balenyaꞌ Pab, dxel bayejcaman rëbaman loj xindxab yuꞌ luxdoom: ―Por xguialrniabee Jesucrist, rniabeen lüj din yariil luxdoo biin guie. Loj hor zii gajc barii xindxab guin luxdoom.

¹⁹Per chi gogbee ree bén guzii laam guial ad zajctri güünm gan milia par laa reeman, dxel gunaaz reeman Pab con Silas, binë reeman laa reeman roylay loj guxtis.

²⁰Chi bayü reeman laa reeman loj ree guxtis guin, rëb reeman: ―Xin Israel guie ree rbëë reex wadijl du ladx ree,

²¹abiꞌ rulüü reex costumbr ree ni ad zatiëëbt ree yaguieen ree ad zajc tëët yaguieen ree, din ben Rom dunuj ree.

²²Dxel wajs gra ree bén guin contr laa reeman, abiꞌ gunabee ree guxtis guin gulëë xab Pab con Silas din quin reeman laa reeman con var.

²³Chi gulox gudijn daꞌt reeman laa reeman, dxel biluꞌ reeman laa reeman ladxguiib abiꞌ gunabee reeman bén rajp roꞌ ladxguiib guin din gapdxiꞌchaman laa reeman.

²⁴Chi biguiejn bén rajp roꞌ ladxguiib guin zian, dxel biluꞌman laa reeman xt lën cuart bigra yuꞌ lën ladxguiib guin, guxhiiman guiaꞌ reeman loj tabl naal con caden.

²⁵Per garol guiaal, laꞌtgaj cabejdx canab Pab con Silas Dios, cayool tëë reeman cant par laaman, dxel cucaagdiajg los demazri ree bén yuꞌ ladxguiib guin.

²⁶Dxel tijbzi golp guzuloj xudoxh, niz ni niz guie rurlia xcimiant ladxguiib guin. Loj hor zii gajc bixal gra ree xportan abiꞌ baxiec ree caden naxii gra ree bén yuꞌ lënan.

²⁷Chi baban bén rajp roꞌ ladxguiib guin abiꞌ baguiaaman zojbyal gra ree xportan, gulëë xi espadaman din nugüjt laagajcaman guial gunaladxaman gra ree bén yuꞌ ladxguiib guin ma baxüün.

²⁸Dxel gurixdiaj Pab, rëbaman lojman: ―Ad güünnaa lüj gajc, laa dugran nadxuꞌ guie.

²⁹Laa gunab gajc bén guin tijb guij, dxel ruxüünman guyuman, rnijman guial rdxebaman, bigzuxibaman loj Pab në loj Silas.

³⁰Dxel babëëman laa reeman, gunabdiidxaman loj reeman, rëbaman: ―Dad, gol guna, ¿xhie rayal günan din güün Dios naj perdon?

³¹Badxiꞌ reeman laan, rëb reeman: ―Bililadx Dad Jesucrist, zian gaquil perdon con xfamilil.

³²Abiꞌ be reeman xtiidx Dios lojman con loj gra ree bén zojb lidxaman.

³³Zianz guxhin zii gajc gudiibaman lod nadxeelguijdx reeman, dxel gurobnijsaman con gra xfamilaman.

³⁴Abiꞌ bignëman laa reeman lidxaman, dxel badëëman ni gudaw reeman. Guiáad laaman dád nix yuꞌ luxdooman con gra xfamilaman Guial ma rliladx reeman Dios.

³⁵Chi bareguiaal, guxhaal ree guxtis guin suldad ree persi biguiedx reeman loj bén rajp roꞌ ladxguiib guin guial guslaaman Pab con Silas.

³⁶Abiꞌ rëb bén rajp roꞌ ladxguiib guin loj Pab: ―Ma na ree guxtis guial guslaan lëjt. Yan ma zajc yaguiajdi ad chuꞌdi xgab.

³⁷Per rëb Pab loj ree suldad guin: ―Nayajcan quijb ben Rom abiꞌ gudijn reeman dunujn delant loj ree bén guiedx, niꞌquid baneet reeman mod nadëëdan cwent loj reeman con badxeꞌ reeman dunujn ladxguiib. Abiꞌ yan, ¿guslaa reeman dunujn ralan ya? ¡Ad zajctan zian! Guiꞌt quijb laa reeman guidgalëë reeman dunujn.