Nembayelen Muluwin 14:17-22

¹⁷Yaŋgut Kawawaŋaŋ am ekŋenaŋ nikseipmagen zemti ku enziliye. Egaŋ kululuŋen mamti am keŋ sewakŋaŋ mimndamti map ma muluwinan kwitnaŋ kwitnaŋ mme dolakŋaŋ sokbeme manimwiaŋti oloŋen palen mamanup.”

¹⁸An zulaŋ zet mulup temaŋ kegok mti zekaŋkaŋ mti zemkulumindeme sâpe sâpe bumidasât tapmambien e naman peme tage.

¹⁹Kegok mme Zuda am notnaŋ Antiok ma Aikoniam mka metatatnaŋ ekŋenaŋ animbi Zuda maŋgeen ku sokbembeŋaŋ notnaŋ keŋin walapme ekŋenaŋ Pâl nanzaŋaŋ kumti wa gakip nâmti sekŋaŋ mandamti tot mka temaŋ ganzenan baen totpeme

²⁰weme nâmkiŋpepemak am ekŋenaŋ kot ondekti mti mebene zemtapmnepeme egaŋ wat indikti met mka temanenak ke moweŋgeyaŋ msame wati Banabas ilisakwep Delebe mka teman ke meti

²¹Zet Zapat Dolakŋaŋ am ekŋengat zemkawaŋ bemalu am sambe ekŋenaŋ koti Zisasiyelen maŋge bemâbien. Âpme egelaŋ bam gilik zemti ewe Listala, Aikoniam, Antiok am nâmkiŋpepemak wiliŋgim indik indik mebun.

²²Zisasiyelen maŋge ekŋen nâmkiŋpepeŋinaset zemgwatnaŋ mimindem mimindem mti animbi keyet ŋeŋaŋine eyo aikindemti tu meu zemkulumpemti belak tati ekŋengat dundundu mulup mti Amobotnaŋgat betnanen indem indem mmebun. Mti pigok zemebun, “Nin msalen sisipeŋpeŋ palen kapi mametneti bam Kawawaŋmak mama kanzizit gwaen tatagalen zemndendeŋaŋaŋ manup.”