Text copied!
CopyCompare
Rote Tii Alkitab - Nedenuk kara Tutuin - Nedenuk kara Tutuin 1

Nedenuk kara Tutuin 1:8-23

Help us?
Click on verse(s) to share them!
8Mete ma Manetualain Dula-dale Malalaon mai maso neni ei neu ena, na, dei fo ei hambu koasa. Basa naa ei muste miu tui-bengga neu basa hatahorir laꞌe-neu Au. Tui-bengga neu hatahorir marai kota Yerusalem, ma neu basa nggorok kara marai profensi Yudea ma profensi Samaria, seku losa dae-bafok buꞌun nara.”
9Yesus kokolak basa talo naa, boe ma Ana hene neni lalai neu numa matan nara. Ana hene losa sosoꞌak mboti nalan, de ara ta mete-rita sana ena bali.
10Neu ara bei mete lalai neu, medak neu ma hambu hatahori dua rambariik ruma boboan nara ena, ma ara pake bua-loꞌa muti ndoos.
11Hatahori kaduak kara raa kokolak rae, “Wee! Hatahori Galilear ein, ee! Tao hata de ei bei nado bafam bese mboo mbali lalai miu? Bebeik kara ia ei mete-mita no ei mata deꞌe heli-helim Yesus hene neni lalai neu losa sosoꞌak mboti nalan. Ei mete-mita Ana hene lain neu talo bee, na, neu ko Ana oo konda fali mai talo naa boe.”
12Basa boe ma Yesus nedenun nara konda numa letek Setun mai fo fali reni kota Yerusalem reu. Letek naa numa kota mai nai rarain na doon kilo esa.
13Losa kota, boe ma ara dudi reni uma esa dale reu fo ara leo taak. De ara hene reni kama manai lain reu. Nedenuk kara raa naden nara sira: Petrus, Yohanis, Yakobis, Anderias, Felipus, Tomas, Bartolomeos, Mateos, Yakobis (Alpius anan), Simon (partei Selot hatahorin), ma Yudas (Yakobis anan).
14Basa sara rasiꞌe rakabua fo hule-haradoi no dalek esa. Ara oo hule-haradoi sama-sama ro Yesus inan Maria, inak laen hida, ma ro Yesus fadin nara.
15Laꞌe esa, ara rakabua seluk bali, nai rarain hambu hatahori 120. Boe ma Petrus nambariik de kokolak nae,
16“Basa ina-ama, toranoo ma kaꞌa-fadi nggara ein! Ei bei masaneda neu Yudas, fo fai maneuk kara nuni noo hatahori bubuak esa reu humu Lamatuak Yesus. Hata fo Yudas taok naa, memak ana muste mori-dadi leo naak. Lele uluk Manetualain Dula-dalen pake mane Dauk fo surak laꞌe-neu Yudas talo naa ena.
17Ndia naa, bakahulun ita hatahorin. Ana oo tungga naue-osa no ai boe.”
18(Tehuu neu Yudas seꞌo heni Lamatuak Yesus ena, boe ma ana haꞌi nala doi manggenggeok kara raa fo neu hasa nala dae faa. Boe ma dae naa dadi neu ndia mamana mamaten, te ana tuda natono bafan numa naa, losa ndara baꞌe poꞌon ma taꞌin loo dea mai.
19Basa boe ma hatahorir mulai tui numa bafak esa mai neni bafak esa neu, losa basa hatahorir fo mana leo numa kota Yerusalem ramanene laꞌe-neu Yudas mamaten naa ena. Huu naa de ara foi mamanak naa tungga sira dedeꞌa Aram rae ‘Hakeldama’, sosoa-ndandaan ‘Dae Daak’.)
20Petrus kokolak nakandoo bali nae, “Lele uluk mane Dauk surak memak talo naa nai susura Sosoda Kokoa-kikiok kara ena. Ana surak nae, ‘Elan numa naa fo mamana leleon naa, dadi neu mamana nees; ta bole hambu hatahori leo nai naa bali.’ Boe ma ana surak seluk nae, ‘Ela leo bee na ndia uen naa, ara fee lalin neni hatahori laen neu leo.’
21Dadi ita muste sangga hatahori fo nggati Yudas. Ita parluu hatahori esa fo dook ka ena ana tungga sama-sama no ita. Ndia naa, muste hatahori fo mana tungga taa-taa no Lamatuak Yesus neni bee neu a mesan, mulai numa Yohanis sarani Yesus mai. Ana oo mesa kana muste mete-nita no ndia matan boe nae, Lamatuak Yesus nasoda fali numa mamaten mai ena, losa Ana hene fali neni nusa tetuk do inggu temak neu.”
23Neu Petrus kokolak basa talo naa, boe ma hatahorir fo mana tungga rakabua ruma naa, fee nadek dua. Esa nade Matias ma esa bali nade Yusuf (fo ara rasiꞌe roken rae, Barsabas; naden esa bali, ndia Yustus).

Read Nedenuk kara Tutuin 1Nedenuk kara Tutuin 1
Compare Nedenuk kara Tutuin 1:8-23Nedenuk kara Tutuin 1:8-23