NARONAA 22:20-36

²⁰Luda bò à sùa gwãani à pìnɛ: Zaakũ gbɛ̃ díkĩnanↄ sù n sísi, ǹ futɛ ǹ gɛ́ kũńwo, ama yã kũ mani on ǹ kɛ.

²¹Balamu fùtɛ kↄnkↄ à gàarii yĩ̀ a zaakinɛ, akũ à gɛ̀ɛ kũ Mↄabu kínanɛ pìnↄo.

²²Luda pↄ fɛ̃̀ kũ à gɛ̀ɛ yãi, akũ Dikiri Malaikaa gɛ̀ɛ à zɛ̀ à zɛ́ zↄ̃̀nɛ. Balamu di a zaaki kpɛ, a zĩkɛri gbɛ̃nↄn planↄn tɛ́ kãao.

²³Kũ zaaki pìi è Dikiri Malaika zɛna zɛ́ gũn à fɛ̃nɛda wòto à kũna, akũ à lìtɛ sɛ̃̀n. Balamu a lɛ̀, akũ à ɛ̀ra à dà zɛ́n.

²⁴Dikiri Malaikaa gɛ̀ɛ à zɛ̀ zɛ́ tererennan geepi líkpɛ kũ gbɛ̀ karaa likainↄ dagura.

²⁵Kũ zaaki pì Dikiri Malaikaa è, à nà gbĩ̀ia à Balamu gbá lↄ̀a. Akũ Balamu ɛ̀ra à a lɛ̀ dↄ.

²⁶Dikiri Malaikaa ɛ̀ra à gɛ̀ɛ arɛ dↄ à zɛ̀ gu kpakoto kũ à litɛki vĩron.

²⁷Kũ zaaki pì Dikiri Malaikaa pìi è, à kùtɛ kũ Balamuo. Akũ Balamu pↄ fɛ̃̀ à a lɛ̀ kũ gòoo.

²⁸Akũ Dikiri zaaki pìi gbà lɛ́ à yã ò Balamunɛ à pì: Bↄ́n ma kɛ̀nnɛ n ma lɛ ari gɛ̃̀n aakↄ̃ↄ?

²⁹Balamu wèa à pì: Kũ n yↄ̃nkↄyã kɛ̀mɛnɛ yãimɛ. Tó má fɛ̃nɛ kũna, de ma n dɛ gↄ̃̀nↄ.

³⁰Akũ zaaki pìi pìnɛ: N zaaki kũ ndìgↄ̃ dia gↄrↄ sĩnda pínkia ari suna gbãramɛ ma ũroo? Ma kɛ̀nnɛ lɛ yã yá? À pì: Oi.

³¹Akũ Dikiri Balamu wɛ́ kɛ̃̀nɛ, à a Malaikaa è zɛna zɛ́n à fɛ̃nɛda wòto à kũna. Akũ à kùtɛ à mìi pɛ̀tɛ.

³²Dikiri Malaika a là à pì: Bↄ́yãin n n zaaki lɛ̀ ari gɛ̃̀n aakↄ̃ↄ? Ma su zɛ́ zↄ̃nnɛmɛ, zaakũ n wãmɛnɛ.

³³Kũ zaaki pì ma e, akũ à lìtɛmɛnɛ ari gɛ̃̀n aakↄ̃. Tó adi litɛmɛnɛ yãro, de ma n dɛ ma a tò.

³⁴Balamu pì Dikiri Malaikaa pìinɛ: Ma durunna kɛ̀, zaakũ má dↄ̃ kũ n zɛ́ zↄ̃̀mɛnɛro. Zaakũ ma gɛnaa kɛ̀nnɛ ĩni, mani ɛra mà tá.

³⁵Akũ Dikiri Malaikaa pì Balamunɛ: Ǹ gɛ́ kũ gbɛ̃ pìnↄ, yã kũ mani dannɛn ǹ o. Akũ Balamu gɛ̀ɛ kũ Balaki kínanɛ pìnↄo.

³⁶Kũ Balaki mà Balamu tɛn su, akũ à gɛ̀ɛ à dàalɛ wɛ̃tɛ kũ à kú Anↄ bara, Mↄabunↄ bùsu lɛ́zɛkin.