NARONAA 14:6-43

⁶Akũ bùsuyakɛrinↄ gbɛ̃nↄn pla Nuni nɛ́ Yↄsua kũ Yefunɛ nɛ́ Kalɛbuo ń utanↄ gàga ò kɛ̃̀kɛ̃

⁷ò pì gbɛ̃nↄnɛ: Bùsu kũ o bↄtɛn o yakɛ̀ɛ pì mana manamana.

⁸Tó ó yã kà Dikirigu, ani gɛ́ kũoo bùsuu pìn, bùsu kũ vĩ kũ zↄ́'io din pìia, à ó gba.

⁹Àsun bo Dikiri kpɛro. Àsun vĩna kɛ bùsupidenↄnɛro, zaakũ ó pↄ́blenↄmɛ, ò utɛki vĩ doro. Dikiri kú kũoo, àsun vĩna kɛro.

¹⁰Gbɛ̃ sĩnda pínki tɛni pi ò ń pápa kũ gbɛ̀ɛo, akũ Dikiri gakuri bò à sù Isarailanↄa dakarɛki kuta kia.

¹¹Dikiri pì Musanɛ: Gbɛ̃ pìnↄ nigↄ̃ ma gya bo gↄrↄ sĩnda pínkin yá? Bee kũ daboyã dasi kũ ma kɛ̀ ń tɛ́nↄ, onigↄ̃ gí ma náani kɛi gↄrↄ sĩnda pínkin yá?

¹²Mani gagagyã káńyĩ mà ń kakatɛ, mani n burinↄ kɛ dasi, ń gbãna nigↄ̃ de gbɛ̃ pìnↄla.

¹³Akũ Musa pì Dikirinɛ: Mↄkↄ̃n mɛ́ n gbɛ̃ pìnↄ bↄ̀tɛ Misila kũ n gbãnao. Tó Misilanↄ mà,

¹⁴oni gí o bùsu dí denↄnɛiro. Zaakũ ò dↄ̃ kũ ń kú kũoo, ndì bo ǹ suwá tɛ̃tɛ̃ntɛ̃. Ò dↄ̃ kũ n tɛ́luku dìgↄ̃ kú ó musu, ndì dowɛrɛ arɛ a gũn fãnantɛ̃, gwãani sↄ̃ tɛ́ gũn.

¹⁵Tó n gbɛ̃ pìnↄ dɛ̀ kãnto gↄ̃̀nↄ, buri kũ ò yã pìi mànↄ ni pi:

¹⁶Dikiri fùa à gɛ́ kũ gbɛ̃ pìnↄ bùsu kũ à la dàńnɛn, abire yãin à ń dɛdɛ gbárannan.

¹⁷Dikiri, ǹ n gbãna zↄ̃kↄ̃ mↄńnɛ sà, lákũ n ò nà n pì

¹⁸ndì pↄ fɛ̃ likalikaro, ń gbɛ̃kɛ vĩ zↄ̃kↄ̃, ndì gbɛ̃nↄ yã vãninↄ kũ ń taarinↄ kɛ̃ḿma, ama ndì tó taaride bò pãro. Ndì denↄ yã vãninↄ wí ń burinↄ musu ari à gɛ́ à pɛ́ ń sãkpɛnↄa kũ ń nasionↄ.

¹⁹Lákũ n sùruu kɛ̀ kũ gbɛ̃ pìnↄo nà zaa Misila ari ò gɛ̀ɛ ò kào la, ǹ ń durunna kɛ̃ḿma n gbɛ̃kɛ zↄ̃kↄ̃ↄ gũn.

²⁰Akũ Dikiri pì: Lákũ n wɛ́ kɛ̀ma nà, mani sùru kɛ kũńwo.

²¹Ama lákũ madìgↄ̃ kun nà akũsↄ̃ ma gakuri dà anduniala pínki,

²²gbɛ̃ kũ ò ma gakuri è kũ daboyã kũ ma kɛ̀ Misila kũ gbáranna gũnwo kũ ò ma lɛ ò ma gwa gɛ̃̀n kuri ò gì ma yã mainↄ,

²³ń gbɛ̃ke ni wɛ́ sí bùsu kũ ma la dà ń dizinↄnɛɛ pìlɛro. Gbɛ̃ kũ ò ma gya bònↄ ke ni wɛ́ sialɛro.

²⁴Lákũ ma zↄ̀bleri Kalɛbu nɛ̀sɛɛ bò ado nà, à tɛ́mai kũ nɛ̀sɛ doo, mani tó à gɛ̃ bùsu kũ à gɛ̀ɛn pìi gũn, a burinↄ ni le túbi ũ.

²⁵Zaakũ Amalɛkinↄ kũ Kanaanↄn kú guvutɛn gwe, à ɛra à da gbáranna zɛ́n zia Isira Tɛ̃ra kpa.

²⁶Dikiri pì Musanɛ kũ Harunao:

²⁷Gbɛ̃ vãni dínↄ ni zuka kámai gↄrↄ sĩnda pínkin yá? Ma zuka kũ òtɛn kámai mà.

²⁸Ǹ pińnɛ makũ Dikiri ma pì má kun. Lákũ ò wɛ́ kɛ̀ma nà, lɛn mani kɛńnɛ lɛ.

²⁹Ń gɛ̀nↄ ni gↄ̃ kátɛ gbárannan la, ń gbɛ̃ kũ ò kà wɛ̃̀ baro ke à dealanↄ pínki. Ń gbɛ̃ kũ ò ń náro akũsↄ̃ ò zuka kàmainↄ

³⁰ni gɛ̃ bùsu kũ ma a la dàńnɛnlo, séde Yefunɛ nɛ́ Kalɛbu kũ Nuni nɛ́ Yↄsuao baasiro.

³¹Ń nɛ́ kũ ò pì oni ń kũkũnↄn mani gɛ̃ kũńwo, de ò bùsu kũ ń denↄ gìi pì nna ma.

³²Mↄ́kↄ̃nↄ sↄ̃, ń gɛ̀nↄ ni gↄ̃ katɛna gbárannan lamɛ.

³³Ń nɛ́nↄ ni pↄ́nↄ dãdã gbárannan la ari wɛ̃̀ bupla, ò ń denↄ náani sari gbɛ̀ le. Ń denↄ gɛ̀nↄ ni gↄ̃ gbárannan la ń pínki.

³⁴Lákũ ò bùsuu pìi yakɛ̀ gↄrↄ bupla nà, lɛn onigↄ̃ ń yã vãni gbɛ̀ le lɛ ari wɛ̃̀ bupla, wɛ̃̀ dodo gↄrↄ dodo, onigↄ̃ dↄ̃ lán ibɛrɛsɛna kũmao de nà.

³⁵Makũ Dikiri makũ mɛ́ ma yã pìi ò, lɛmɛ sↄ̃ mani kɛ gbɛ̃ vãni kũ ò kàkaramai pìnↄnɛ lɛ. Oni gaga gbárannan la ń pínki.

³⁶Gbɛ̃ kũ Musa ń zĩ ò bùsuu yakɛ̀ kũ ò sù ò bùsuu pì gya bò ò tò ò zuka dↄ̀anↄ,

³⁷Dikiri gagagyã kà gbɛ̃ pìnↄgu, akũ ò gàga.

³⁸Gbɛ̃ kũ ò gɛ̀ɛ ò bùsuu yakɛ̀ɛ pìnↄ tɛ́, Nuni nɛ́ Yↄsua kũ Yefunɛ nɛ́ Kalɛbuo mɛ́ ò gↄ̃̀ kũ wɛ̃̀ndiio.

³⁹Musa yã pìnↄ gbã̀ Isarailanↄnɛ pínki, akũ ò ↄ́ↄ dↄ̀ manamana.

⁴⁰Ò fùtɛ kↄnkↄ káakukaaku, ò mìi pɛ̀ kpinↄa ò pì: À gwa, ótɛn gɛ́ gu kũ Dikiri òn. O ó durunna dↄ̃̀ sà.

⁴¹Musa pì: Bↄ́yãi átɛn pã Dikiri yãnɛɛ? Abire ni sí kɛro.

⁴²Àsun gɛ́ro, zaakũ Dikiri kú kãáoro. Á ibɛrɛnↄ ni á ble kũ zĩ̀io.

⁴³Amalɛkinↄ kũ Kanaanↄn kú á arɛ gwe. Oni á dɛdɛ kũ fɛ̃nɛdao. Dikiri nigↄ̃ kú kãáoro, kũ a gi tɛ́ii yãi.