NARONAA 13:6-29

⁶Yuda burinↄ gũn Yefunɛ nɛ́ Kalɛbu,

⁷Isaka burinↄ gũn Yusufu nɛ́ Igali,

⁸Ɛflaimu burinↄ gũn Nuni nɛ́ Osea,

⁹Biliaminu burinↄ gũn Rafu nɛ́ Paliti,

¹⁰Zɛbuluni burinↄ gũn Sodi nɛ́ Gadiɛli,

¹¹Yusufu nɛ́ Manase burinↄ gũn Susi nɛ́ Gadi,

¹²Dã burinↄ gũn Gɛmali nɛ́ Amiɛli,

¹³Asa burinↄ gũn Mukaila nɛ́ Setu,

¹⁴Nafatali burinↄ gũn Vofosi nɛ́ Nabi,

¹⁵Gada burinↄ gũn Maki nɛ́ Guɛli.

¹⁶Gbɛ̃ kũ Musa ń zĩ bùsu yakɛnↄn gwe. Musa tↄ́ kpà Nuni nɛ́ Oseanɛ Yↄsua.

¹⁷Kũ Musa tɛni ń zĩ Kanaanↄ bùsu yakɛ, à pìńnɛ: À bↄtɛ kũ Nɛgɛvi gbárannao à dí bùsu gusĩsĩdea.

¹⁸À gwa lákũ bùsuu pì de nà, tó a gbɛ̃nↄn gbãna kesↄ̃ ò busɛ, tó ò dasi kesↄ̃ ò dasiro,

¹⁹tó ń bùsu mana kesↄ̃ à vãni, tó ń wɛ̃tɛnↄn bĩni vĩ kesↄ̃ à vĩro,

²⁰tó a zĩtɛ gbãna kesↄ̃ à bùsa, tó à línↄ vĩ kesↄ̃ à vĩro. À kokari kɛ à bùsuu pì línɛnↄ sɛ́tɛ à suo. Zaakũ geepi nɛ́ káakunↄ mana gↄrↄn dí.

²¹Akũ ò gɛ̀ɛ ò bùsuu pìi yakɛ̀ zaa Zini gbárannan ari Reobo, Lebo Amata kpa.

²²Kũ ò bↄ̀tɛ kũ Nɛgɛvi gbárannao, ò kà Ɛblↄnu, gu kũ Anaki burinↄ Aima kũ Sesaio kũ Talamaio kún. Ɛblↄnu katɛna Zoã kũ à kú Misila ã wɛ̃̀ supplamɛ.

²³Kũ ò kà Ɛsɛkↄlu guvutɛn, ò geepi línɛyↄ̃ do zↄ̃̀ gwe ò lòko lía, akũ gbɛ̃nↄn planↄn sɛna. Ò bísi kũ kakapuraoo sɛ̀ dↄ.

²⁴Ò tↄ́ kpà gu pìinɛ Ɛsɛkↄlu guvutɛ, geepi línɛyↄ̃ kũ Isarailanↄ zↄ̃̀ gwe yãi.

²⁵Kũ ò bùsuu pìi yakɛ̀ gↄrↄ bupla, akũ ò ɛ̀ra ò sù.

²⁶Kũ ò sù Kadɛsi, Parani gbárannan, ò gɛ̀ɛ Musa kũ Harunao kũ Isarailanↄ kĩnaa pínki. Ò sù kũ baaruuo Isarailanↄnɛ ń pínki, akũ ò bùsuu pì línɛnↄ mↄ̀ńnɛ.

²⁷Ò yã pìi gbã̀ Musanɛ ò pì: O gɛ bùsu kũ n ó zĩn. Vĩ kũ zↄ́'io di gwe. A línɛnↄn dí.

²⁸Ama bùsupidenↄ gbãna. Ń wɛ̃tɛnↄn bĩni vĩ akũsↄ̃ ń wɛ̃tɛ pìnↄn zↄ̃kↄ̃ manamana. O Anaki burinↄ è gwe se.

²⁹Amalɛkinↄn kú Nɛgɛvi gbárannan. Itinↄ kũ Yebusinↄ kũ Amↄrinↄn kú bùsu gusĩsĩden, akũsↄ̃ Kanaanↄn kú ísira sarɛ kũ Yoda sarɛo.