NARONA 22:2-26 - Luda yã takada kↄ̃n Bokobaru yão

NARONA 22:2-26

Click on verse(s) to share them!

²Zipo nɛ́ Balaki Mↄabunↄ kína è lán Isarailinↄↄ kɛ̀ Amↄrinↄnɛ nà,

³ben swɛ̃̀ kɛ̃̀ Mↄabunↄn, vĩa ń kũ Isarailinↄ parikɛɛ yãnzi.

⁴Ben Mↄabunↄ bè Midiã gbɛ̃nsinↄnɛ: Parii kɛ̀kii é pↄ́ kɛ̀ ligawaziinↄ ble píngi lán zù è sɛ̃̀ ble nà.

⁵Ben Balaki gbɛ̃nↄ zĩ̀ Bɛↄ nɛ́ Balamua ai Peto, Yuflati saɛ à bɛ bùsun. À bèńnɛ aↄ̃ à sísi à mↄ́ aↄ̃ benɛ: Gbɛ̃kenↄ bↄ̀ Igipiti aↄ̃ dàgula aↄ̃ↄ káɛ ma saɛ.

⁶N yã nna! Ǹ mↄ́ ǹ ń kámɛ, zaakɛ aↄ̃ gbãaa dɛmala. Wègↄ̃ dↄ̃ro ke mɛ́ e mà zĩ̀ bleḿma mà pɛ́ḿma bùsu kɛ̀n gwɛɛ. Má dↄ̃ kɛ̀ gbɛ̃ kɛ̀ n sa maaa ònɛ égↄ̃ dɛ aubarikadee ũmɛ. Gbɛ̃ kɛ̀ sↄ̃ n sa zaaa ònɛ, eégↄ̃ dɛ kana pↄ́ ũmɛ.

⁷Mↄabu kↄ̃n Midiã gbɛ̃nsinↄ dà zɛ́n, aↄ̃ↄ màsokɛna gbaa kɛ̀ aↄ̃é da Balamunɛ kũna. Kɛ̀ aↄ̃ kà à kiia, aↄ̃ yã kɛ̀ Balaki ń zĩo ònɛ.

⁸À bèńnɛ: À i kɛ̀, mɛ́ yã kɛ̀ Dii é omɛɛ oare. Ben Mↄabu kínɛ pìnↄ ì Balamu bɛ.

⁹Ben Luda bↄ̀ à mↄ̀ Balamuzi à à là à bè: Dénↄn gbɛ̃ kɛ̀ aↄ̃ↄ kúnyo kɛ̀kiinↄ ũu?

¹⁰À wèàla à bè: Zipo nɛ́ Balaki, Mↄabunↄ kína bé à ń zĩma. Aↄ̃ bè

¹¹gbɛ̃ kenↄ bↄ̀ Igipiti aↄ̃ dàgula. Ben à bè mà mↄ́ mà ń káare lɛ à e à zĩ̀ bleḿma à pɛ́ḿma.

¹²Ben Luda bènɛ: Ǹton tɛ́ńziro. Ǹton sa zaaa ońnɛro, zaakɛ ma aubarika dàńgu kↄ̀.

¹³Kɛ̀ Balamu fɛ̀ɛ kↄngↄ, à bè Balaki kínɛnↄnɛ: À tá a bùsun, zaakɛ Dii gìmɛ mà tɛ́azi.

¹⁴Ben Mↄabu kínɛ pìnↄ fɛ̀ɛ wà tà Balaki kiia aↄ̃ bè: Balamu gì mↄ́waozi.

¹⁵Balaki ɛ̀ara à kínɛ pãndenↄ zĩ̀ dↄ, aↄ̃ pari kↄ̃n ń gakuio dɛ gbɛ̃ káakunↄla.

¹⁶Kɛ̀ aↄ̃ kà Balamu kiia, aↄ̃ bè: Zipo nɛ́ Balaki bè ǹton tó pↄ́ke kpánnɛ kↄ̃n mↄna a kiiaoro,

¹⁷zaakɛ eé gbaa kɛnnɛ maamaa. Pↄ́ kɛ̀ ń ònɛ píngi é kɛ. N yã nna! Ǹ mↄ́ ǹ gbɛ̃ pìnↄ kámɛ.

¹⁸Ben Balamu bè Balaki zĩ̀ri pìnↄnɛ: Baa tó Balaki kondogi kↄ̃n vura kɛ̀ kú a bɛɛo kpàma píngi, mɛ́ fↄ̃ mà bↄ Dii ma Luda yã kpɛɛro, baa féte.

¹⁹À i kɛ̀ gwãavĩa lán gbɛ̃ káakunↄↄ kɛ̀ nà ai mà ma dↄ yã kɛ̀ Dii é kaaramɛ.

²⁰Luda bↄ̀ à mↄ̀zi gwãavĩ à bènɛ: Zaakɛ gbɛ̃ kɛ̀nↄ mↄ̀ n sísi, ǹ fɛɛ ǹ gáńyo, mↄde yã kɛ̀ mɛ́ oon ǹ kɛ.

²¹Balamu fɛ̀ɛ kↄngↄ à gàari yì a zaakinɛ, ben à gàa kↄ̃n Mↄabu kínɛ pìnↄo.

²²Luda pↄ fɛ̃̀ à gana yãnzi, ben Dii Malaika gàa à zɛ à zɛ́ zↄ̃̀nɛ. Balamu di a zaaki kpɛɛ, à zĩkɛri gↄ̃ↄn plaaanↄn tɛ́o.

²³Kɛ̀ zaaki pì è Dii Malaika zɛna zɛ́ guu à fɛ̃ɛdaa wòto à kũna, ben à lìɛ sɛ̃̀n. Balamu à lɛ̀, ben à ɛ̀ara à dà zɛ́n.

²⁴Dii Malaika gàa à zɛ̀ zɛ́ wɛ́wɛn geepi líkpɛ kɛ̀ gbɛ̀ kara ligazinↄ dagura.

²⁵Kɛ̀ zaaki pì Dii Malaika è, à nà gũ̀a à Balamu gbá lↄ̀a. Ben Balamu ɛ̀ara à à lɛ̀ dↄ.

²⁶Dii Malaika ɛ̀ara à gàa aɛ dↄ à zɛ̀ gu kpaatogoo kɛ̀ liɛkii vĩroon.