NARONA 11:20-35 - Luda yã takada kↄ̃n Bokobaru yão

NARONA 11:20-35

Click on verse(s) to share them!

²⁰Aↄ̃é só mↄ do gbãngbãn ai à bↄ ń yĩn à nii bↄ ń pↄↄ guu. Zaakɛ mamↄma Dii má kú ń tɛ́, ben aↄ̃ pã kpàmazi. Aↄ̃ zↄka dↄ̀ma wà bè, bↄ́yãnzi wà bↄ̀ Igipitizi?

²¹Ben Musa bè: Gↄ̃gbɛ̃nↄↄ kúmao tá guu gↄ̃ↄn bↄrↄ wàa aagↄ̃, ben n bè nɛ́ nↄ̀bↄ kpáḿma wà só ai mↄ do gbãngbãn-ↄ́?

²²Baa tó wà sãanↄ kↄ̃n zùnↄ dɛ̀dɛ paripari, eé mↄ́ḿmaↄ́? Tó wà ísia kpↄ̀nↄ sɛ̀ɛ píngi, eé mↄ́ḿmaↄ́?

²³Dii wèàla à bè: Ma gbãaa é kánloo? Nɛ́ e tia, tó yã kɛ̀ má ònnɛɛ é kɛ ke eé kɛro.

²⁴Musa bↄ̀ à Dii yã pìnↄ òńnɛ. À Isaraili gbɛ̃nsinↄ kàkↄ̃a gↄ̃ↄn baaagↄ̃ akuri à ń zɛ́ wà lìga kutaa pìzi.

²⁵Ben Dii pìta tɛ́luguu guu à yã òo. À a Ninii kɛ̀ kúa kpadoo gò à dì gbɛ̃nsi gↄ̃ↄn baaagↄ̃ akuri pìnↄnɛ. Kɛ̀ à a Ninii pì dìńnɛ lɛ, aↄ̃ annabikɛɛ kɛ̀, beee gbɛra aↄ̃ↄe ɛara wà kɛ̀ dↄro.

²⁶Gbɛ̃ kɛ̀ Musa ń sɛ́ gↄ̃ↄn plaaanↄ gↄ̃̀ bùran, gbɛ̃ doo tↄ́n Ɛlɛdada, gbɛ̃ doo sↄ̃ Mɛdada. Aↄ̃ↄe gá kutaa kiiaro, mↄde Ninii pì sùḿma se, ben aↄ̃ annabikɛɛ kɛ̀ bùran.

²⁷Gↄ̃kparɛ ke bàa lɛ̀ à gàa à bè Musanɛ: Ɛlɛdada kↄ̃n Mɛdadao e annabikɛyã oo bùran.

²⁸Nuni nɛ́ Yↄsuan Musa kpàasi ũ zaa a ↄ̀wazikɛgurↄ, ben à bè: Baa Musa, ǹ gíńnɛ.

²⁹Ben Musa bènɛ: Nɛ́ɛ nↄ̀sɛgↄ̃aanↄ kɛɛńyo ma yã musun yↄ́? Tó Dii a Ninii dì a gbɛ̃nↄnɛ aↄ̃ gↄ̃̀ annabinↄ ũ ń píngi, à maaroo?

³⁰Ben Musa ɛ̀ara bùran kↄ̃n Isarailinↄ gbɛ̃nsi pìnↄo.

³¹Dii tò ĩa bↄ̀ ísiaa kpa à mↄ̀ kↄ̃n bùrunↄ, aↄ̃ dà bùrala. Aↄ̃ lìga bùrazi baama píngi à kà tágurↄ doo ũ, bensↄ̃ aↄ̃ vĩana lezĩ kà gã̀sãsuu plaa.

³²Fãantɛ̃ beeea kↄ̃n gwãavĩo kↄ̃n à gu làa dↄnao aↄ̃ fɛ̀ɛ wà gàa wà bùrunↄ kũ̀kũ. Gbɛ̃ kɛ̀ èe kũkũ bítaroo kũ̀kũ sùu baro. Ben aↄ̃ↄ fã̀ɛ à gàga.

³³Kɛ̀ aↄ̃ à nↄ̀bↄ dà ń lɛ́n gↄ̃ↄ, aↄ̃ↄe e wà só bítaro, ben Dii pↄ fɛ̃̀ńzi à gagyãa kàńgu.

³⁴Ben wà tↄ́ kpà guu pìnɛ Lóudeenↄ Mira, zaakɛ gwen wà gbɛ̃ kɛ̀ nↄ̀bↄ lóu ń kũnↄ vĩ̀in.

³⁵Ben Isarailinↄ fɛ̀ɛ gwe aↄ̃ gàa Azero aↄ̃ gurↄplaa kɛ̀ gwe.