Naokɛa 24:9-25

⁹Aaì gaɛ, aaì wúlɛ lán nↄ̀ↄmusuwa, démɛ a fↄ̃ ń vui? Lua báaada gbɛ̃́ pↄ́ aa samaa'onɛ́ↄgu, aà gbɛ̃́ pↄ́ aa savãi'onɛ́ↄ ká.

¹⁰Balaki pↄ pà Balaaũzi, à ↄtona dↄ̀wà à mɛ̀: Ma ibɛɛↄ kaa yã́i ma n sisii, ↄ̃ n samaa'ònɛ́ gɛ̃n àaↄ̃a?

¹¹Ta n bɛ gↄ̃̀ↄ. Ma mɛ̀ yãa má n kpɛlaɛ, ↄ̃ Dii gìnɛ ǹ asea e.

¹²Balaaũ òɛ̀: Má ò gbɛ̃́ pↄ́ n ń zĩ́aↄnɛɛ fá!

¹³Ma mɛ̀, baa tó n ã́nusu ń vua pↄ́ kú n bɛo kpàa píi, má bↄ Dii yã́ kpɛ mà yãkɛ ń mazĩaoo, a maa ge a vãi. Yã́ pↄ́ Dii a omɛɛ ↄ̃ má o.

¹⁴Málɛ tá ma gbɛ̃́ↄ kĩ́i sa. Mↄ mà onɛ lá gbɛ̃́piↄ kɛ n gbɛ̃́ↄnɛ zia.

¹⁵Ɔ̃ Balaaũ yã́ pↄ́ á è ò à mɛ̀: Bɛↄↄ nɛ́ Balaaũ yã́n kɛ, ma gbɛ̃́ pↄ́ ma wɛ́ zɛ̃a yã́n kɛ:

¹⁶Ma gbɛ̃́ pↄ́ mi Lua yãma, ma yã́n kɛ: Má Lua Musude pↄeã dↄ̃. Ma Gbãapiide wɛ́pungu è, má kúlɛa, ma wɛ́ kɛ̃a.

¹⁷Málɛ Isailiↄ e, i kɛ tia no, málɛ ń gwa, a gↄↄ i ka gĩao. Saana a bↄ Yakↄbu buiↄ guu, kpalablena a bↄ Isailiↄ guu, i Mↄabuↄ mi wíwi, i zↄakanapiↄ dↄ́ fↄ̃́fↄ̃.

¹⁸Ɛdↄũ bùsu a gↄ̃ aà pↄ́ ũ, aà ibɛɛ Sei bùsu a gↄ̃ aà pↄ́ ũ, Isailiↄ gbãa iↄ kã́fĩɛ.

¹⁹Yakↄbu buie a kiblemá, a mɛɛwiade pↄ́ bↄ̀ↄ kaalɛ.

²⁰Balaaũ Amalɛki buiↄ è, ↄ̃ à yã́ pↄ́ á è ò à mɛ̀: Amalɛki buiↄá buiↄ mideɛ, kási aa kaalɛ zia.

²¹Kɛ́ Balaaũ Keniↄ è, ↄ̃ à yã́ pↄ́ á è ò à mɛ̀: Á kúkĩi gbãa gíũgiũ, á sakpɛ kú gbɛ musu.

²²Ń beeo wa á kaalɛɛ, Asiliↄ mɛ́ aa á kṹkũ zĩ̀zↄↄ ũ.

²³Balaaũ yã́ pↄ́ á è ò lↄ à mɛ̀: Wàlɛ kↄ̃ kãaa gugbãntoo oi,

²⁴gó'ilɛnaↄ lɛ́ bↄ Sipi bùsuu, aa zĩble Asiliↄ ń Ɛbɛluↄwa, kási ampiↄ kaalɛ sↄ̃ɛ.

²⁵Balaaũ fɛ̀lɛ tà a bɛ, ↄ̃ Balaki dàzɛu sↄ̃.