Naokɛa 21:5-22

⁵aa Lua ń Mↄizio tàae è aa mɛ̀: Bↄ́yãi a wá bↄ́lɛ Egipi, kɛ́ wà gaga guwaiwaiui? Pↄblea kuo, í kuo, wá ye blɛ giaɛ bee gĩyãi lↄo.

⁶Ɔ̃ Dii mlɛ̃̀ pãsĩnaↄ zĩ̀má, aa ń soso, ↄ̃ aa gàga dasidasi.

⁷Bíla mↄ̀ Mↄizi kĩ́i aa mɛ̀: Wa duunakɛ̀, asa wa Dii ń mpio tàae è. Awakpaɛ̀wɛ̃ɛ aà mlɛ̃ↄ kɛ̃́wá. Ɔ̃ à awakpàɛ̀nɛ́.

⁸Dii òɛ̀: Mlɛ̃ pi ǹ na líwa ǹ pɛ́lɛ. Tó mlɛ̃ gbɛ̃́ sò mɛ́ a gwà, a gao.

⁹Ɔ̃ à mlɛ̃ pì ń mↄgotɛ̃o, a nà líwa a pɛ̀lɛ. Tó mlɛ̃ gbɛ̃́ sò, mɛ́ à mↄgotɛ̃ mlɛ̃pi gwà, ìli gao.

¹⁰Isailiↄ dàzɛu, ↄ̃ aa bòokpà Obo.

¹¹Bↄa Obo aa gɛ̀ bòokpà Iye'abaliũ bɛzia guwaiwaiu Mↄabu bùsu gukpɛ oi.

¹²Bↄa we aa gɛ̀ bòokpà Zeledi guzulɛu.

¹³Bↄa we aa bòokpà Aanↄ baale, guwaiwai pↄ́ kú Amↄle bùsu zↄ̃lɛu. Aanↄpi mɛ́ Mↄabu ń Amↄle bùsuↄ kↄↄ ũ.

¹⁴Ayãmɛto wa ò Dii zĩkataala guu wà mɛ̀: Waɛbu pↄ́ kú Sufa bùsuu ń Aanↄ swa'ↄnaↄ,

¹⁵ń a í bàasizɛ pↄ́ ì gɛ́ e Aa ń Mↄabu bùsu zↄ̃lɛo.

¹⁶Bↄa we lↄ aa gɛ̀ Lↄ̀ↄ, gu pↄ́ Dii ò Mↄiziɛ: Bíla kãaa, mí í kpámá.

¹⁷We ↄ̃ Isailiↄ lɛɛ bee sìu: Lↄ̀ↄ, ibↄ, wí lɛsi n yã́ musu.

¹⁸Dↄaanaↄ lↄ̀ↄ yↄ̃̀ ń ń goↄ, wá kíaↄ lↄ̀ↄ bↄ̀ ń ń lípanaↄ. Bↄa guwaiwaiu aa gɛ̀ Matana.

¹⁹Matana gbɛa Naaliɛli, Naaliɛli gbɛa Bamↄti.

²⁰Bamↄti gbɛa guzulɛ pↄ́ kú Mↄabu bùsuu Pisiga gbɛpↄlɛu bↄaa ń guwaiwaio.

²¹Isailiↄ gbɛ̃́ↄ zĩ̀ Amↄleↄ kí Siↄ̃wa aa mɛ̀:

²²Wá gba zɛ́ wà gɛ̃ ń n bùsuo. Wá pã buaↄ ge vɛ̃ɛbuↄlao, wá á lↄ̀ↄ'i mio. Wáↄ bɛ kía zɛ́kpaa guuɛ e wà gɛ vĩò n bùsua.