Naokɛa 19:6-15

⁶Sa'onapi i sɛdɛ yàa ń ése ṹao ń sãkã tɛ̃ao sɛ zu tɛ́ pↄ́ kũ̀ zupiwa guu.

⁷Bee gbɛa i a pↄkasaↄ pí, i zu'o, i gbasa su bòou. Kási aↄ gbãlɛaɛ e oosi.

⁸Gbɛ̃́ pↄ́ zupi kpàsa sↄ̃, aà a pↄkasaↄ pí, i zu'o. Kási aↄ gbãlɛaɛ e oosi.

⁹Gbɛ̃́ pↄ́ gbãlɛao i zununupi túfu sɛ́lɛ, i ka gugbãlɛsaiu bòo kpɛ. Isailiↄ ìↄ kũa gbãbↄbↄ pↄ́ wì íkaɛ̀ wà duuna woloomá ũ.

¹⁰Gbɛ̃́ pↄ́ túfupi sɛ̀lɛ aà a pↄkasaↄ pí. Kási aↄ gbãlɛaɛ e oosi. Yã́pi i gↄ̃ ikoyã ũ Isailiↄnɛ ń bↄ̀mↄ pↄ́ kú ń guuↄ píi.

¹¹Gbɛ̃́ pↄ́ ↄnà gɛwa aↄ gbãlɛaɛ e gↄↄ sopla.

¹²Ali gbãbↄ azĩaɛ ń ípio a gↄↄ àaↄ̃de ń a gↄↄ soplade zĩ́o, i gↄ̃ gbãlɛsai. Tó i gbãbↄ azĩaɛ a gↄↄ àaↄ̃de ń a gↄↄ soplade zĩ́oo, a gi àↄ gbãlɛaɛ.

¹³Gbɛ̃́ pↄ́ ↄnà gɛwa mɛ́ i gbãbↄ azĩaɛo, a tò Dii kpɛ́ gbãlɛ̀ɛ. Wà ade bↄ Isailiↄ guu, kɛ́ wi gbãbↄ'i káwào yã́i. À gbãlɛ̀ɛ mɛ́ a kú ń a gbãsĩoɛ.

¹⁴Tó gbɛ̃́ gà kpɛ́u, yã́ pↄ́ wa dìlɛ a musun kɛ: Gbɛ̃́ pↄ́ gɛ̃̀ kpɛ́piu ń gbɛ̃́ pↄ́ kú a guuↄ, aaↄ gbãlɛaɛ e gↄↄ sopla.

¹⁵Pↄ́ pↄ́ da lɛ́'ɛ, wì a nɛ́ taɛo gbãlɛa lↄɛ.