Naokɛa 16:1-27 - Bibeli Luayãtaalá

Naokɛa 16:1-27

Click on verse(s) to share them!

¹Isaa nɛ́ Kole, Kɛata tↄũna, Levii bui, ń Ɛliabu nɛ́ↄ Datani ń Abilaũo ń Pɛlɛti nɛ́ Onio, Lubɛni buiↄ, bã̀nkũ̀

²aa fɛ̀lɛ Mↄiziwa. Isaili gbɛ̃zↄ̃ↄ tↄde pↄ́ wì ń sísi kↄ̃kãaauↄ kúńnↄ gbɛ̃ↄn ↄ̀aa do ń blakwio.

³Aa kã̀aa Mↄizi ń Aalonaozi aa ònɛ́: Á yã́ↄ kɛ̀ zài! Isailiↄ píiá Dii gbɛ̃́ↄnɛ, a kúńnↄ. Bↄ́yãi i ázĩa dilɛ dɛ Dii gbɛ̃́piↄlai?

⁴Kɛ́ Mↄizi yã́pi mà, à wùlɛ a gbɛɛu,

⁵a ò Koleɛ ń a gbɛ̃́ↄ à mɛ̀: Zia kↄↄ Dii a gbɛ̃́ pↄ́ dɛ a gbɛ̃́ ũ ↄlↄɛ́, a to gbɛ̃́ pↄ́ a sɛ sↄ̃azi.

⁶Mpi ń n gbɛ̃́ↄ, lá á kɛn la: Á baade tɛ́sibↄ sɛ

⁷à tɛ́siò zia, í tulaletikaa Dii aɛ. Gbɛ̃́ pↄ́ Dii a sɛ mɛ́ aↄ dɛ aà gbɛ̃́ ũ. Á yã́ↄ kɛ̀ zài Levii buiↄ.

⁸Ɔ̃ Mↄizi ɛ̀a ò Kole buipiↄnɛ: Levii buiↄ, à yãma.

⁹Lá Isailiↄ Lua á sɛ́ a gbɛ̃́ↄ guu, a tò i dↄaanɛ́ a sísia guu, i sↄ̃azi a zwã̀akpɛ zĩ kɛi, bee i mↄ́wáoa?

¹⁰A tò i sↄ̃azi, mpi ń n Levii deeↄ, ↄ̃ álɛ sa'onkɛ wɛɛlɛ lↄa?

¹¹Mpi ń n gbɛ̃́ↄ a kãaa Diiziɛ. Dén Aalona ũ kɛ́ álɛ zↄadↄwài?

¹²Mↄizi gbɛ̃́ zĩ̀ Ɛliabu nɛ́ↄ Datani ń Abilaũo sísii, ↄ̃ aa mɛ̀: Wá mↄo.

¹³N bↄwanↄ bùsu pↄ́ vĩ ń zↄ́'io diu, kɛ́ wà gaga guwaiwaiuɛ. Bee i mↄmao, ↄ̃ ń ye ǹ gbãablewá lↄa?

¹⁴I kɛ bùsu pↄ́ vĩ ń zↄ́'io diu ↄ̃ n gɛuwanↄo. I kɛ bua ń vɛ̃ɛbuↄ ↄ̃ n wá gbáo. Ń ye wɛzɛ̃ kɛwɛ̃ɛ yã̀? Wá mↄo.

¹⁵Ɔ̃ Mↄizi pↄ fɛ̃̀ maamaa, a ò Diiɛ: Ńsu ǹ ń gba sio. Baa zàa'ĩna mi símáo, mi yãvãikɛ an gbɛ̃eɛo.

¹⁶Ɔ̃ Mↄizi ò Koleɛ: Mpi ń n gbɛ̃́ↄ píi, à gɛ́ Dii kĩ́i zia. Aalona a gɛ́ sↄ̃ɛ.

¹⁷Á baade a tɛ́sibↄ sɛ à tɛsi à tulaletikaa, í sↄ̃ò Diizi. Gbɛ̃ↄn ↄ̀aa do ń blakwio, baade ń a tɛ́sibↄo. Mpi ń Aalonao sↄ̃, baade ń a tɛ́sibↄo.

¹⁸Ɔ̃ an baade a tɛ́sibↄ sɛ̀, à tɛsì à tulaletikàa. Aa gɛ̀ zɛ̀ kpaaũkpɛ kpɛɛlɛ ń Mↄizio ń Aalonao.

¹⁹Kɛ́ Kole gbɛ̃́pii kã̀aa Mↄizi ń Aalonaozi kpaaũkpɛ kpɛɛlɛ, ↄ̃ Dii gawi bↄ̀ Isailiↄwa píi.

²⁰Ɔ̃ Dii ò Mↄiziɛ ń Aalonao à mɛ̀:

²¹À ázĩa kɛ̃ gbɛ̃́piↄwa mà ń midɛ gↄ̃̀ↄ.

²²Ɔ̃ Mↄizi ń Aalonao wùlɛ ń gbɛɛu aa mɛ̀: Lua! Lua pↄ́ ì wɛ̃ni kpa pↄ́piiwa! Gbɛ̃́ mɛ̀ndo mɛ́ duunakɛ̀, ↄ̃ ńyↄ̃ pↄfɛ̃bↄbↄ gbɛ̃́ pↄ́ kãaaapiↄwa píia?

²³Ɔ̃ Dii yã'ò Mↄiziɛ à mɛ̀:

²⁴O bílaɛ aa go Kole ń Datanio ń Abilaũo fã́ani oi.

²⁵Ɔ̃ Mↄizi fɛ̀lɛ à gɛ̀ Datani ń Abilaũo bɛ. Isaili gbɛ̃zↄ̃ↄↄ tɛaàzi.

²⁶A ò bílaɛ à mɛ̀: À go gbɛ̃vãipiↄ fã́ani. Ásu ↄkã an pↄewao, kɛ́ ásu gagańnↄ an duuna yã́io.

²⁷Ɔ̃ aa gò Kole ń Datanio ń Abilaũo fã́ani. Kɛ́ Datani ń Abilaũo bↄ̀lɛ, aa zɛ̀zɛ ń kpɛɛlɛ ń ń naↄ ń ń nɛ́ↄ ń ń nɛ́fɛ̃nɛnaↄ.