Naokɛa 15:3-34 - Bibeli Luayãtaalá

Naokɛa 15:3-34

Click on verse(s) to share them!

³mɛ́ a zu ge sã sɛ̀ à sa pↄ́ wì a pↄ́ kátɛu à tɛ́kũ ge sa pãle oòa, sa pↄ́ a pↄ́ tɛ́kũa gĩ ì kɛmɛɛ na ũ, lɛ́gbãdↄa pↄ́n nò, gban nò, dikpɛ pↄ́n nò,

⁴àli ma gba ń pↄ́wɛntio kiloo do yãalɛa ń nísio litili do,

⁵í vɛ̃ɛ kpa litili dodo sã ge ble bↄlↄna pↄ́ álɛ sapi oò miwa.

⁶Tó sãsaɛ sↄ̃, pↄ́wɛnti kiloo pla yãalɛa ń nísio litili do ń kĩnio,

⁷í vɛ̃ɛ kpaoa litili do ń kĩnio sa pↄ́ a pↄ́ tɛ́kũa gĩ ì kɛmɛɛ na ũ.

⁸Tó a zugaae yãkɛ̀kɛ sa pↄ́ wì a pↄ́ kátɛu à tɛ́kũ ge sa pↄ́ wì lɛ́gbã dↄoa ge sáaukpa sa'obↄ ũ,

⁹àli ma gba ń pↄ́wɛntio kiloo àaↄ̃ yãalɛa ń nísio litili pla,

¹⁰í vɛ̃ɛ kpaoa litili pla sa pↄ́ a pↄ́ tɛ́kũa gĩ ì kɛmɛɛ na obↄ ũ.

¹¹Àli kɛ màa zu ge sãsa ge sãnɛbↄlↄ ge blenɛbↄlↄ miwa.

¹²Àli kɛ màa pↄ́ pↄ́ a a yãkɛ̀kɛ dasilɛu.

¹³Tó á bùsu gbɛ̃e lɛ́ sa pↄ́ a pↄ́ tɛ́kũa gĩ ì kɛmɛɛ na oa, aàli kɛ màa.

¹⁴E á buiwa tó bↄ̀mↄ ge gbɛ̃pãle kúánↄ, mɛ́ a ye sa pↄ́ a pↄ́ tɛ́kũa gĩ ì kɛmɛɛ na oa, sema aà kɛ lá i kɛwa.

¹⁵Á kↄ̃kãaa guu ikoyãpi doũ ápiↄnɛ ń bↄ̀mↄ pↄ́ kúánↄↄɛ. Ikoyãpi iↄ ku e á buiwa. Ápiↄ ń bↄ̀mↄↄ á doũ mɛɛɛ.

¹⁶Ikoyã pↄ́ má dìlɛ doũ ápiↄnɛ ń bↄ̀mↄ pↄ́ kúánↄↄɛ.

¹⁷Yã́ pↄ́ Dii ò Mↄiziɛ

¹⁸a ò Isailiↄnɛn kɛ lↄ. Tó a gɛ̃ bùsu pↄ́ málɛ táuánↄ guu,

¹⁹mɛ́ a bùsupi blɛ blè, àli ma gba.

²⁰Àli kàa kɛ ń pↄ́wɛn káau tío, í ma gba pↄgbɛ̃zɛ pↄ́ ũ.

²¹Àliↄ ma gba á pↄ́wɛn káau típi e á buiwa.

²²Tó a zãmɛɛ yã́wa, mɛ́ á yãdilɛa pↄ́ má ò Mↄiziɛpi kee kũao,

²³yã́ pↄ́ má dìlɛ Mↄizi òɛ́ za a dilɛzĩ e á buiwapi,

²⁴tó a zã yã́piwa, mɛ́ i gĩkɛ no, àli sa pↄ́ wì a pↄ́ kátɛu à tɛ́kũ a pↄ́ tɛ́kũa gĩ ì kɛmɛɛ na o ń zugaaeo ń a pↄ́wɛntio ń a vɛ̃ɛo, lá má òwa ń blesanao duun awakpabↄ ũ.

²⁵Sa'ona lí mↄa awau Isaili píi yã́ musu, mí ń duuna kɛ̃́má, asa aa zã̀ yã́waɛ, ↄ̃ aa mↄ̀mɛɛ ń sa pↄ́ wì a pↄ́ nísi kátɛu à tɛ́kũo ń duun awakpabↄo.

²⁶Má sùuukɛ ń á Isailiↄ píi ń bↄ̀mↄ pↄ́ kúánↄↄ, asa zãayãwapiá ápii yã́ɛ.

²⁷Tó gbɛ̃e zã̀ yã́wa à duunakɛ̀, aàli blè núnu wɛ̃dona kpa duun awakpabↄ ũ,

²⁸sa'ona lí awagbɛaa adeɛ. Tó à awagbɛ̀aa, má aà kɛ̃́.

²⁹Gbɛ̃́ pↄ́ zã̀ yã́wa píi, ikoyã doũpiɛ, Isaili bùsu gbɛ̃́n nò, bↄ̀mↄ pↄ́ kúńnↄn nò.

³⁰Ãma gbɛ̃́ pↄ́ duunakɛ̀ ń mio daa ía, bùsu gbɛ̃́ ge bↄ̀mↄn nò, à dↄ̀ɛmanↄɛ, wa ade bↄ a gbɛ̃́ↄ guu wà dɛ.

³¹Asa a sakà ma yã́u, à bↄ̀ ma yãdilɛa kpɛɛ. Wà ade dɛ, aàpi ń a tàaeo.

³²Gↄↄ pↄ́ Isailiↄ ku guwaiwaiu, aa ń gbɛ̃́dee kũ̀ ń yàawɛo kã́mabogↄↄzĩ.

³³Gbɛ̃́ pↄ́ aa aà èↄ gɛ̀aànↄ Mↄizi ń Aalonao kĩ́i ń gbɛ̃́ kĩniↄ.

³⁴Ɔ̃ aa aà dàkpɛu, asa aa yã́ pↄ́ aa kɛɛ̀ sã́asã dↄ̃o.