Naokɛa 10:20-36

²⁰Deuɛli nɛ́ Ɛliasafa mɛ́ Gada zĩgↄ̃ↄ dↄaana ũ.

²¹Ɔ̃ Kɛata buiↄ Lua pↄ́ↄ sɛ̀ aa dàò zɛ́u. Wà zwã̀akpɛpi pɛ̀ɛpɛɛ e aaↄ gɛ́ kái.

²²Ɔ̃ Ɛflaiũ zĩgↄ̃ↄ fɛ̀lɛ ń bòou gã ń gão ń ń dàlapooo. Amihudu nɛ́ Ɛlisama mɛ́ ń dↄaana ũ.

²³Pedazuu nɛ́ Gamaliɛli mɛ́ Manase zĩgↄ̃ↄ dↄaana ũ.

²⁴Gidoni nɛ́ Abidã mɛ́ Bɛ̃yãmɛɛ zĩgↄ̃ↄ dↄaana ũ.

²⁵Ɔ̃ Dã zĩgↄ̃ↄ fɛ̀lɛ ń bòou gã ń gão ń ń dàlapooo. Aamɛ aa ku gbɛzã. Amisadai nɛ́ Ahiɛzɛɛ mɛ́ ń dↄaana ũ.

²⁶Ɔkɛlana nɛ́ Pagiɛli mɛ́ Asɛɛ zĩgↄ̃ↄ dↄaana ũ.

²⁷Enana nɛ́ Ahila mɛ́ Nɛfatali zĩgↄ̃ↄ dↄaana ũ.

²⁸Lá Isailiↄ ì fɛlɛ ń bòon we gã ń gão.

²⁹Obaba mɛ́ Mↄizi ã̀nsue Leuɛli nɛ́ ũ, Madiã buiɛ. Mↄizi òɛ̀: Wálɛ dazɛu, wálɛ gɛ́ bùsu pↄ́ Dii mɛ̀ á wá gbau. Mↄ ǹ gɛ́wanↄ, wí maakɛnɛ, asa Dii namablea we lɛgbɛ̃̀wɛ̃ɛɛ.

³⁰Ɔ̃ a òɛ̀: Má gɛo. Má tá ma bùsuu ma bɛdeↄ kĩ́iɛ.

³¹Mↄizi mɛ̀: N yã́ na. Ńsu wá tó weo, asa ń bòokpakĩi maa dↄ̃, mɛ́ ńyↄ̃ fↄ̃ kɛ wá wɛ́ ũ.

³²Tó n gɛwanↄ, wá maa pↄ́ Dii a kɛwɛ̃ɛ kɛnɛ sↄ̃ɛ.

³³Isailiↄ fɛ̀lɛ Dii gbɛ saɛ, aa táa'ò gↄↄ àaↄ̃. Wà dↄ̀aa ń Dii bàakuańnↄ kpagoloo bòokpakĩi wɛɛlɛinɛ́.

³⁴Kɛ́ aa fɛ̀lɛ aa dàzɛu, Dii tɛlupi kúńla fãanɛ.

³⁵Tó wà dàzɛu ń kpagoloo, Mↄizi ì mɛ: Fɛlɛ Dii, n ibɛɛↄ i fãaa, n zangudeↄ i bàalɛnɛ.

³⁶Tó wa dìlɛ, Mↄizi ì mɛ: Dii, ɛa su Isaili dasidasiↄwa.