Nambase 23:2-21

²Baame lamaiyamuli pyuo Belekeme piya. Piyamo dokopa baapa Belamepa mena bulamakao kalipi mena sipisipi kalipi larapu nenge kiso maingi kana pyare dusipana mendaki mendaki lao kiso maiyambi.

³Dokopa Belameme Beleke lamaiyuo, Kamongome namba mende langilyape mee lao kandala paroleŋe embena mena kiso maipinyi mare dakena karape. Baame namba pano langiramuli pyuo emba langiru, leya. Dopa lapala baa iki yuu kyau dokona ketae pulyuo peya.

⁴Peyamo dokopa Anatumi baa kando nyiya. Nyiyamopa Belameme baa kando lao, Nambame nenge kiso maingi kana pyare yanda ipingi nyepo lapala dokona mendaki mendaki lao mena bulamakao kalipi mena sipisipi kalipi kisapu, leya.

⁵Kamongome Belame aki pii laramo dupwa lamaipala pii dupwa Beleke lamaila kapu kyuo pena leya.

⁶Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya.

⁷Belameme poropeta pii pyongo pyao lao lao, Yuu Moape range kiŋi Beleke dokome namba kyakale lao ipu, leya. Neta pyakaenge yuu kyau dorena karapunupa baame namba pii lakala ipu, leya. Isaraele wambu dupwa keta randa maiyakape, leya.

⁸Kamongome wambu dupwa keta randa epena lao laa nalyamo dokona nambame apa pyuo wambu dupwa keta randa epena larose? Kamongome wambu dupwa koo keta pena laa nalyamo dokona nambame apa pyuo dopa pyuo larose?

⁹Yuu kyau dupwana karo dokopa nambame wambu dupwa kandenge. Nakama wambu rara wakale ingyuo palyuo kamame wakasa ingyuo Kamongome wambu lapo dupwa kaepala nakama elyape keta pisingi lao silyaminyi.

¹⁰Sinjimu dupwa kapa yaka laa nange doko suu pyao Isaraele para pyasi dupwa sinjimu ingyapyasa kapa yaka laa nalyaminyi. Anatunya wambu mende yuu gii otapyamo kumulyaminyi dopale ingyuo namba kumapuli. Anatunya yulu rolae pingi wambu dupwa mona kyuu lao sipyamo kumulyaminyi dopale ingyuo namba mona kyuu lao seramo kumapuli, leya.

¹¹Dokopa Belekeme Belame lamaiyuo, Aki yulunde namba keta pilisi? Nambame emba dae lanyuo epeyono doko nambana nyisu petenge dupwa randa maiyakalase lao piyu. Dopa piyunupape embame pipinyi doko wambu dapwa peparae elyape keta pisinyi pyambulini doko iki, leya.

¹²Baame isingi lao, Kamongome laa lao namba langilyamo dusipa iki nambame kapa laro, leya.

¹³Dokopa Belekeme Belame kando lao, Namba role pyao yuu mendasa bona ipu. Yuu dokona karo dokopa Isaraele wambu dupwana lapo iki kandare. Yuu dokona pao karapala dokopa wambu dupwa keta randa maiyakare, leya.

¹⁴Belekeme Belame Sopiminya yuu dokona Pisika kyau dokona ketae singi dokona nyuo lanyuo peya. Peyamo dokopa Belameme yuu dokona opetae nenge kiso maingi kana pyare yanda ipingi nyepo lapala mena bulamakao kalipi mena sipisipi kalipi mendaki mendaki lao larapu kiso maiyambi.

¹⁵Belameme Beleke kando lao, Embena kiso maipinyi mare dakena karape. Namba dumunya Anatu kando nyela paro, leya.

¹⁶Lapala peyamo dokopa Kamongome Belame kando nyepala aki pii laramo dupwa lamaipala pii dupwa Beleke lamaiyakala pena leya.

¹⁷Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya. Kamongome apa lalamo lao Belekeme piso siya.

¹⁸Dokopa Belameme poropeta pii pyongo pyao lao dake leya. Sipona ikinyingi Beleke, epapu namba aki pii letene lao sela ipu.

¹⁹Anatu doko baa akali kyambo lenge dopakale daa. Isa akalinya suu pingi alowa pyuo lenge. Anatu baa dopakale daa. Aki yulu mende baame piru lao lalu lao lenge doko baa angi pingi. Baame piru lapala dokopa angi pingi.

²⁰Namba elyape keta pisa lao langilyamuli pyuo wambu dupwa elyape keta pisaro. Anatumi elyape keta pisaramo nambame nyuo alowa pii naro ingilyamo.

²¹Rengya Isaraele keta randa mende epa nao embone pisira lao dakepa soo gisilyu. Kamongo nakamana Anatu doko nakama keta role karamo. Wambu dupwame pii poraiyuo lao, Kamongo namwana kiŋi lao karaminyi.