Nambase 22:6-27

⁶Wambu dupwa ama malu mee namwa isa palyilyaminyi dokona emba waiya lao epo nambana lao nakama koo keta palyuo mende pyakape. Dopa piri ramo namwame kapa pyuo anamasi minyuo yuu dakena pyao ralinyi nembarama rapisi. Embame wambu dupwa elyape keta petena lapinyi dokopa elyape keta petaminyiko. Randa maiyuo koo keta pena lapinyi dokopa kooko keta pelyaminyi. Doko namba silyu.

⁷Dokona lao Moape rangepe Mitiane rangepe akali mupwa dupwame Isaraele wambu dupwa randa maiyuo koo keta pena lara lao Belame kareyamo dokona papala kana mone maiyuo Belekena pii doko lamaiyuo piyami.

⁸Piyaminyi dokopa Belameme nakama lamaiyuo lao, Epapu kukwa nembo dae palimanalese. Dopa pyuo palirama dokopa Kamongome namba pii langiramo dusipa rakya nambame nakama langiru. Dokona lao Moape range akali mupwa dusipa Belamemoo pipya paleyami.

⁹Anatumi Belame kareyamo dokona epapala piso soo, Akali embamoo petaminyi dasipa apimoose? leya.

¹⁰Baame isingi lao, Yuu Moape range kiŋi Beleke dokome pii langyala pena lapyasa imi.

¹¹Doko wambu lapo Isipi yaki nyuo dae epapala yuu dakena wakale wakale nyuo yoko lapala palaminyi lapya. Baame wambu dupwa pyao ralinyi nembaro lao nambame banya lao wambu dupwa randa maiyuo koo keta palyakape lapya, leya.

¹²Anatumi Belame lamaiyuo, Akali dasipa pipya role pyao paa napipi. Nambame Isaraele wambu dupwa elyape keta pisingiŋi dokona randa maiya napipi.

¹³Dokopa yangama Belame Belekena wai pii minyuo epeyaminyi akali dupwa lamaiyuo, Anda kapu kyuo pupwape. Kamongome namba nakama role pyao paa napipi letamo, leya.

¹⁴Dokopa akali dusipa Beleke kareyamo dokona peyami. Papala dopa lamaiyuo, Namwa pipya role pyao epa naro lapya, leyami.

¹⁵Dokopa Belekeme akali wambo pena leyamopape enakana konda pyuo akali kamongo dupwa pena leya.

¹⁶Akali dupwa Belame kareyamo dokona papala Beleke pii leyamo dupwa lamaiyuo, Namba keta epa naroŋo lapala yulu mende wakale pii napipi.

¹⁷Nambame emba kando yano pyao bange joo kamonganyi pyambuo embame langirinyili pyuo pyakao piru. Dokona wambu dapwa randa maiyakala ipupi lapya, leyami.

¹⁸Dopa leyamopape Belameme isingi lao, Beleke baame namba kana kulingipi golope banya anda dokona singi dupwa peparae jeramopape namba Anatumi langilyamuli pyuo kamba laa naro ingilyamo. Kamame randa kuki laponape Kamongo nambana Anatunya pii kuki mende iki kapa isa pena lapala piru ingya nalyamo.

¹⁹Dopa pipyamopape akali lapo dae paleyami dopale ingyuo nakama epapu kukwa dae palimanale. Dokona Kamongome namba pii lapo dupwana lao langilyape mee lao sero, leya.

²⁰Kukwa yuu gii dokopa Belame paleyamo dokona epapala Anatumi dopa lamaiyuo, Akali dusipame emba role pyao mona lao piso simi ramo doko panya rapa rapa pii. Dopa pirinyipape nambame langiru doko iki piri, leya.

²¹Dokona lao yangama dokopa Belame sipurapala mena donge mende nyepala piso Moape akali kamongo dupwa pipya role pyao peyami.

²²Belame banya mena donge matana piso banya kendemande akali lama pipya role pyao peyamisa Anatumi imbwaya. Imbwayamo dokona nakama panya peyaminyi dokona Kamongona aŋala mendeme kata roko kareya.

²³Dokopa aŋala dokome kata dokona wua gela minyaro kareyamo mena donge dokome kandapala panya peyamo kata doko yaki nyuo ee yuu dokona peya. Peyamo dokopa Belameme mena donge doko pyaroko pyapala kapu kyuo kata dokona lanyuo epeya.

²⁴Dokopa isa girapo ee paki paki pinya kata kuki sukusa siyamo dokona nemba nemba dolapona kana kame piru kareyamo kata dokona aŋala doko kareya.

²⁵Dokopa donge dokome aŋala doko kandapala pakao pupuli lao kata koteyamo dokopa kana kame dokona Belamena kimbu doko pyao pisiya. Pyao pisiyamo dokopa Belameme donge doko pyaroko piya.

²⁶Aŋala dokome dee mendasa papala kata paki pakipi parami kata see nayandena kata upi lao kareyamosa donge panya saka naya.

²⁷Dokopa donge dokome aŋala doko kandapala baa isa yuu dokona siya. Siyamosa Belameme imbwuapala banya pangali isa dokome donge doko pyaroko piya.